డాక్టర్ సలహా..షుగర్ ఉన్నవారు తప్పకుండా తినాల్సిన 3 కూరగాయలు, 3 పండ్లు..

మారుతున్న జీవనశైలి, ఆహారపు అలవాట్లు, శారీరక శ్రమ లోపించడం వల్ల ఈ రోజుల్లో మధుమేహం(డయాబెటిస్ లేదా షుగర్ వ్యాధి) అనేది ప్రతి ఇంట్లో సాధారణ సమస్యగా మారిపోయింది. ప్రపంచంలో ఎక్కడా లేని విధంగా మనదేశంలో షుగర్ పేషెంట్లు ఉన్నారు. అందుకే మనదేశాన్ని వరల్డ్ డయాబెటిస్ క్యాపిటల్ అని కూడా పిలుస్తుంటారు.

అయితే షుగర్ వ్యాధి రాగానే చాలామందిలో ఒక రకమైన ఆందోళన మొదలవుతుంది. నేను ఇకపై ఇష్టమైనవి ఏమీ తినకూడదా?, అన్నం మానేయాలా?, పండ్లు అసలే తినకూడదా? వంటి ఎన్నో సందేహాలు వారిని వేధిస్తుంటాయి. కానీ వాస్తవానికి మధుమేహం అనేది ఒక వ్యాధి కాదు, అది కేవలం జీవనశైలి రుగ్మత మాత్రమే. సరైన ఆహార నియమాలు పాటించడం ద్వారా దానిని పూర్తిగా మన అదుపులో ఉంచుకోవచ్చు.

షుగర్ ఉన్నవారు ఏది పడితే అది తినకుండా కాస్త జాగ్రత్తగా వ్యవహరించాలి. ప్రకృతి మనకు ప్రసాదించిన కొన్ని కూరగాయలు, పండ్లు మధుమేహాన్ని నియంత్రించడంలో అద్భుతమైన ఔషధాల్లా పనిచేస్తాయి. షుగర్ పేషెంట్లు తమ రోజువారీ డైట్ లో తప్పనిసరిగా చేర్చుకోవాల్సిన 3 కూరగాయలు, 3 పండ్ల గురించి ప్రముఖ ఫ్యామిలీ ఫిజిషియన్ డాక్టర్ యర్రగోల్ల సాయి మళ్లిక తన ఇన్ స్టాగ్రామ్ అకౌంట్ లో పోస్ట్ చేసిన ఒక వీడియోలో తెలిపారు.

షుగర్ వ్యాధిగ్రస్తులకు అమృతం లాంటి 3 కూరగాయలు

మధుమేహాన్ని నియంత్రించడంలో కూరగాయల పాత్ర అత్యంత కీలకం. ముఖ్యంగా తక్కువ కార్బోహైడ్రేట్లు, ఎక్కువ ఫైబర్ ఉన్న కూరగాయలు ఎంచుకోవడం చాలా ముఖ్యం. వాటిలో ఈ కింది మూడు కూరగాయలు అగ్రస్థానంలో ఉంటాయి.

కాకరకాయ

పేరు వినగానే చాలామందికి చేదు గుర్తుకువచ్చి ముఖం చిట్లిస్తారు. కానీ షుగర్ వ్యాధిగ్రస్తులకు కాకరకాయ ఒక సంజీవని లాంటిది. ప్రకృతి సిద్ధంగా బ్లడ్ షుగర్ ను కంట్రోల్ చేసే గుణాలు ఇందులో పుష్కలంగా ఉన్నాయి కాబట్టే దీనిని నేచర్ షుగర్ సపోర్ట్ అని పిలుస్తారు.

ఎలా పనిచేస్తుంది?: కాకరకాయలో చరాంటిన్, పాలీపెప్టైడ్-పి అనే సహజ సమ్మేళనాలు ఉంటాయి. ఇవి అచ్చం ఇన్సులిన్ లాగా పనిచేసి, రక్తంలోని గ్లూకోజ్ లెవల్స్ ను నేచురల్ గానే తగ్గించడంలో సహాయపడతాయి. శరీరంలోని కణాలు గ్లూకోజ్ ను సమర్థవంతంగా వినియోగించుకునేలా కాకరకాయ ప్రేరేపిస్తుంది.

ఎలా తినాలి?: కాకరకాయను కూరగా వండుకుని తినవచ్చు. మరీ నూనెలో డీప్ ఫ్రై చేయకుండా తక్కువ నూనెతో ఫ్రై చేయడం లేదా ఉడకబెట్టి తినడం మంచిది. ఉదయాన్నే పరగడుపున చిన్న గ్లాసు కాకరకాయ జ్యూస్ తాగడం వల్ల అద్భుతమైన ఫలితాలు ఉంటాయి.

మెంతికూర

ఆకుకూరలు ఆరోగ్యానికి మంచివే, కానీ షుగర్ పేషెంట్లకు మెంతికూర ఒక సూపర్ ఫుడ్. మెంతికూరను ఫైబర్ పవర్ అని చెప్పవచ్చు.

ఎలా పనిచేస్తుంది?: మెంతికూరలో కరిగే ఫైబర్ (Soluble fiber) అత్యధికంగా ఉంటుంది. మనం ఆహారం తీసుకున్న తర్వాత, అందులోని కార్బోహైడ్రేట్లు గ్లూకోజ్ గా మారి రక్తంలో కలుస్తాయి. అయితే మెంతికూరలోని ఫైబర్ జీర్ణక్రియను నెమ్మదింపజేస్తుంది. దీనివల్ల చక్కెర ఒక్కసారిగా రక్తంలోకి వెళ్లకుండా, నెమ్మదిగా, క్రమంగా శోషించబడేందుకు సహాయపడుతుంది. ఇది ఇన్సులిన్ సెన్సిటివిటీని పెంచుతుంది.

ఎలా తినాలి?: పప్పులో వేసి వండుకోవచ్చు లేదా చపాతీ పిండిలో కలుపుకుని మేతీ రోటీ లాగా చేసుకోవచ్చు. మెంతికూరను రెగ్యులర్ గా డైట్ లో చేర్చుకోవడం వల్ల షుగర్ మాత్రమే కాకుండా కొలెస్ట్రాల్ కూడా అదుపులో ఉంటుంది.

బెండకాయ
చాలామందికి ఇష్టమైన కూరగాయ బెండకాయ. ఇది రుచితో పాటు ఆరోగ్యానికి చేసే మేలు అంతా ఇంతా కాదు. మధుమేహులకు ఇది ఒక స్మార్ట్ ఛాయిస్.

ఎలా పనిచేస్తుంది?: బెండకాయలో పిండిపదార్థాలు (కార్బ్స్) చాలా తక్కువగా ఉంటాయి, పీచుపదార్థం (ఫైబర్) చాలా ఎక్కువగా ఉంటుంది. బెండకాయను కోసినప్పుడు వచ్చే జిగురు పదార్థం జీర్ణవ్యవస్థలో అద్భుతంగా పనిచేస్తుంది. మనం భోజనం చేసిన తర్వాత రక్తంలో షుగర్ లెవెల్స్ అకస్మాత్తుగా పెరగడాన్ని ఈ జిగురు, ఫైబర్ అడ్డుకుంటాయి.

ఎలా తినాలి?: బెండకాయను జిగురు పోయేదాకా నూనెలో వేయించి (డీప్ ఫ్రై) తినడం వల్ల దానిలోని పోషకాలు నశిస్తాయి. కాబట్టి ఆవిరి మీద ఉడికించి లేదా తక్కువ నూనెతో కూరలా వండుకుని తినడం ఉత్తమం.

మధుమేహులకు బెస్ట్ ఫ్రెండ్స్ లాంటి 3 పండ్లు

షుగర్ ఉన్నవారు పండ్లు తినకూడదనేది ఒక అపోహ మాత్రమే. పండ్లలో ఉండేవి సహజమైన చక్కెరలు. ఫైబర్ ఎక్కువగా ఉండి, గ్లైసెమిక్ ఇండెక్స్ తక్కువగా ఉండే పండ్లను మితంగా తినడం వల్ల ఎలాంటి నష్టం ఉండదు. పైగా పండ్లలోని విటమిన్లు వ్యాధి నిరోధక శక్తిని పెంచుతాయి. షుగర్ వ్యాధిగ్రస్తులు నిర్భయంగా తినగలిగే 3 పండ్లు ఏవో ఇక్కడ చూడండి.

జామపండు

పండ్ల రాజు మామిడిపండు కావచ్చు, కానీ షుగర్ వ్యాధిగ్రస్తులకు మాత్రం పండ్ల రారాజు జామపండే. అందుకే దీనిని డయాబెటిస్ ఫ్రెండ్లీ ఫ్రూట్ అని అంటారు. మనకు అత్యంత చవకగా, సులభంగా దొరికే జామకాయల వల్ల ఎన్నో లాభాలున్నాయి.

ఎలా పనిచేస్తుంది?: జామకాయలో డైటరీ ఫైబర్ చాలా ఎక్కువగా ఉంటుంది. ఇది రక్తంలోకి గ్లూకోజ్ విడుదలను ఆలస్యం చేస్తుంది. అలాగే ఇందులో విటమిన్ సి పుష్కలంగా ఉంటుంది, ఇది రోగనిరోధక శక్తిని పెంచుతుంది. జామకాయ గ్లైసెమిక్ ఇండెక్స్ చాలా తక్కువ, అంటే ఇది తిన్న తర్వాత షుగర్ లెవెల్స్ పెరగవు. బాగా పండిపోయి, మెత్తగా ఉన్న జామపండు కంటే.. దోరగా ఉన్న జామకాయ అంటే కొద్దిగా గట్టిగా ఉన్నది తినడం షుగర్ పేషెంట్లకు ఎంతో మంచిది.

యాపిల్

రోజుకో యాపిల్ తింటే డాక్టర్ కు దూరం ఉండొచ్చు అనే నానుడి డయాబెటిక్ పేషెంట్లకు కూడా వర్తిస్తుంది. సాయంత్రం వేళ ఆకలిగా అనిపించినప్పుడు సమోసాలు, బిస్కెట్లు తినే బదులు ఒక యాపిల్ తినడం అనేది స్మార్ట్ స్నాక్ ఆప్షన్.

ఎలా పనిచేస్తుంది?: యాపిల్ లో పెక్టిన్ అనే కరిగే ఫైబర్ ఉంటుంది. భోజనం లేదా స్నాక్స్ తర్వాత బ్లడ్ షుగర్ ఒక్కసారిగా పెరగకుండా చూసుకోవడంలో ఈ పెక్టిన్ అద్భుతంగా సహాయపడుతుంది. యాపిల్ ను ఎప్పుడూ తొక్కతో సహా తినాలి. తొక్కలోనే ఫైబర్, యాంటీ ఆక్సిడెంట్లు ఎక్కువగా ఉంటాయి. తొక్క తీసేసి తింటే దాని పూర్తి ప్రయోజనాలు శరీరానికి అందవు.

నారింజ లేదా బత్తాయి

సిట్రస్ జాతికి చెందిన నారింజ, బత్తాయి పండ్లు డయాబెటిక్ పేషెంట్లకు చాలా మేలు చేస్తాయి. ఇవి శరీరానికి కావలసిన విటమిన్ సి, పొటాషియం అందిస్తాయి. అయితే ఇక్కడ గుర్తుంచుకోవాల్సిన అతి ముఖ్యమైన నియమం ఒకటుంది.చాలామంది బత్తాయి లేదా నారింజను జ్యూస్ తీసుకుని తాగుతుంటారు. షుగర్ పేషెంట్లు ఎప్పుడూ జ్యూస్ తాగకూడదు, మొత్తం పండును తినాలి. జ్యూస్ చేసినప్పుడు అందులోని అద్భుతమైన ఫైబర్ అంతా వేస్ట్ గా వెళ్లిపోతుంది, కేవలం చక్కెర నీరు మాత్రమే మిగులుతుంది. ఇది తాగితే రక్తంలో షుగర్ వెంటనే పెరిగిపోతుంది. అదే తొనలతో సహా పండును నమిలి తింటే, అందులోని ఫైబర్ కారణంగా చక్కెర నెమ్మదిగా శరీరానికి అందుతుంది. షుగర్ అదుపులో ఉంటుంది.

షుగర్ వ్యాధి అనేది మనం భయపడాల్సిన మహమ్మారి కాదు. మనం తినే ఆహారమే మనకు మందు. కాకరకాయ, మెంతికూర, బెండకాయ లాంటి కూరగాయలను మీ రోజువారీ మధ్యాహ్నం లేదా రాత్రి భోజనంలో చేర్చుకోండి. అలాగే ఉదయం లేదా సాయంత్రం స్నాక్ సమయంలో జామ, యాపిల్, నారింజ లాంటి పండ్లను మితంగా ఆస్వాదించండి. దీనితో పాటు రోజూ కనీసం 30 నిమిషాల పాటు నడక, తగినంత నీరు త్రాగడం, వైద్యుల సలహా మేరకు మందులు వాడటం ద్వారా మీ బ్లడ్ షుగర్ లెవెల్స్ ను పూర్తిగా కంట్రోల్ లో ఉంచుకోవచ్చు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.