అరటిపండు ఆరోగ్యానికి మంచిదే.. కానీ ఈ సమయంలో తింటే మాత్రం గుండెకే ప్రమాదం!

ప్రస్తుత ఉరుకుల పరుగుల జీవితంలో ఉదయం పూట ప్రశాంతంగా కూర్చుని బ్రేక్ ఫాస్ట్ తయారుచేసుకుని తినేంత సమయం, ఓపిక చాలా మందికి ఉండటం లేదు. వంట చేసే శ్రమను తప్పించుకోవడానికి, అలాగే విలువైన సమయం ఆదా చేయడానికి చాలామంది సులభంగా దొరికే అరటిపండును ఆశ్రయిస్తుంటారు. అరటిపండ్లు తినడం ఆరోగ్యానికి ఎంతో మేలు చేస్తుందన్నది అందరికీ తెలిసిన విషయమే. ఇది శరీరానికి తక్షణ శక్తిని ఇస్తుంది, ఎన్నో రకాల పోషకాలతో నిండి ఉంటుంది.

కానీ ఉదయం నిద్రలేవగానే ఖాళీ కడుపుతో అరటిపండ్లు తినడం వల్ల మీ ఆరోగ్యానికి మేలు జరిగే మాట అటుంచితే నష్టమే ఎక్కువగా జరుగుతుందని మీకు తెలుసా? ఉదయాన్నే పరిగడుపున అరటిపండ్లు తినవద్దని మన ప్రాచీన ఆయుర్వేద శాస్త్రం కూడా గట్టిగా హెచ్చరిస్తోంది. ఖాళీ కడుపుతో అరటిపండ్లు తినడం వల్ల మన శరీరంలో ఎలాంటి ప్రతికూల మార్పులు జరుగుతాయో, దీనివల్ల వచ్చే దుష్ప్రభావాలు ఏమిటో ఇక్కడ చూడండి.

శక్తి స్థాయిల్లో హెచ్చుతగ్గులు

అరటిపండ్లలో సహజసిద్ధమైన చక్కెరలు అత్యధిక మోతాదులో ఉంటాయి. మీరు పరిగడుపున వీటిని తిన్నప్పుడు, ఆ చక్కెరలు వెంటనే రక్తంలో కలిసిపోయి శరీరానికి తక్షణ శక్తిని అందిస్తాయి. దీంతో మీరు ఆ క్షణానికి ఎంతో యాక్టివ్ గా మారినట్లు అనుభూతి చెందుతారు. కానీ ఈ ఉత్సాహం ఎక్కువసేపు నిలవదు.

రెండు మూడు గంటలు గడిచేసరికి రక్తంలో చక్కెర స్థాయిలు అంతే వేగంగా పడిపోతాయి. దీనివల్ల అకస్మాత్తుగా విపరీతమైన అలసట, నీరసం మిమ్మల్ని ఆవహిస్తాయి. మధ్యాహ్నం కాకముందే తిరిగి తీవ్రమైన ఆకలి వేయడం మొదలవుతుంది.

పేగుల ఆరోగ్యానికి హానికరం

జీర్ణక్రియను మెరుగుపరచడంలో ఫైబర్ (పీచుపదార్థం) చాలా ముఖ్యమైన పాత్ర పోషిస్తుంది. అరటిపండ్లలో ఈ ఫైబర్ చాలా అధికంగా ఉంటుంది. అయితే, కడుపు పూర్తిగా ఖాళీగా ఉన్నప్పుడు ఈ ఫైబర్ లోపలికి ప్రవేశిస్తే, అది సున్నితమైన పేగులపై అదనపు ఒత్తిడిని కలగజేస్తుంది.

దీనివల్ల కొంతమందిలో ఉదయం పూట అకస్మాత్తుగా కడుపులో నొప్పి రావడం లేదా కడుపు బరువుగా, బిగుతుగా అనిపించడం వంటివి జరుగుతాయి. అందుకే ఉదయం పూట ఖాళీ కడుపుతో ఈ పండును తినడం మానుకోవడం మంచిది.

కాల్షియం, మెగ్నీషియం సమతుల్యతకు ముప్పు

సాధారణంగా అరటిపండ్లలో గుండెకు మేలు చేసే మెగ్నీషియం, పొటాషియం వంటి ఖనిజాలు పుష్కలంగా ఉంటాయి. అయితే మీరు రాత్రి అంతా నిద్రపోయి, ఉదయాన్నే ఖాళీ కడుపుతో అరటిపండు తిన్నప్పుడు, మీ రక్తంలో మెగ్నీషియం లెవల్స్ అకస్మాత్తుగా గణనీయంగా పెరిగిపోతాయి. మన శరీర ఆరోగ్యానికి రక్తంలోని కాల్షియం, మెగ్నీషియం లెవల్స్ ఎప్పుడూ ఒక క్రమ పద్ధతిలో సమతుల్యంగా ఉండటం ఎంతో ముఖ్యం.

ఎప్పుడైతే మెగ్నీషియం ఒక్కసారిగా పెరిగిపోతుందో, ఈ బ్యాలెన్స్ పూర్తిగా దెబ్బతింటుంది. దీంతో మీ గుండె ఆరోగ్యంపై నేరుగా ప్రతికూల ప్రభావం పడుతుంది. ఇది భవిష్యత్తులో మీ హృదయనాళ వ్యవస్థకు సంబంధించిన సమస్యలను కొనితెచ్చే ప్రమాదం ఉంది.

జీర్ణవ్యవస్థపై అదనపు భారం, ఎసిడిటీ సమస్యలు

అరటిపండ్లు సహజంగానే కొద్దిగా ఆమ్ల (Acidic) స్వభావాన్ని కలిగి ఉంటాయి. రాత్రంతా ఖాళీగా ఉన్న కడుపులోకి ఉదయాన్నే ఈ ఆమ్ల స్వభావం ఉన్న అరటిపండు చేరగానే, కడుపులో ఆమ్లాల (యాసిడ్) పరిమాణం ఒక్కసారిగా పెరుగుతుంది. దీనివల్ల జీర్ణవ్యవస్థకు భారం పెరిగి, జీర్ణక్రియ బాగా నెమ్మదిస్తుంది.

దీంతో గ్యాస్ ట్రబుల్, అజీర్ణం, పుల్లటి త్రేన్పులు, గుండెల్లో మంట లేదా కడుపు ఉబ్బరం వంటి ఇబ్బందికరమైన సమస్యలు మొదలవుతాయి. చురుకుగా పని చేసుకోవాల్సిన ఉదయం వేళ, కడుపులో ఇలాంటి అసౌకర్యం మిమ్మల్ని తీవ్రంగా ఇబ్బంది పెడుతుంది.

అరటిపండును సరైన పద్ధతిలో ఎలా తినాలి?

ఇన్ని సమస్యలు ఉన్నాయి కదా అని అరటిపండును పూర్తిగా మానేయాల్సిన అవసరం లేదు. కానీ దానిని తినే విధానాన్ని మార్చుకుంటే సరిపోతుంది. ఉదయం పూట ఖాళీ కడుపుతో కేవలం అరటిపండును మాత్రమే ఒంటరిగా తినడానికి బదులుగా, దానిని ఇతర బలవర్ధకమైన ఆహార పదార్థాలతో కలిపి తీసుకోవాలి. మీరు తినే ఓట్‌మీల్, పాలు, పెరుగు, లేదా బాదం, వాల్‌ నట్స్ వంటి డ్రై ఫ్రూట్స్ తో కలిపి అరటిపండును తింటే ఆరోగ్యానికి మంచిది.

అరటిపండు తినడానికి అత్యుత్తమమైన సమయం ఏదంటే.. మంచి అల్పాహారం చేసిన తర్వాత లేదా మధ్యాహ్న భోజనానికి కాస్త ముందు తినవచ్చు. ఒకవేళ మీరు ప్రతిరోజూ వ్యాయామం చేసే వారైతే, వర్కవుట్ చేయడానికి కనీసం 30 నిమిషాల ముందు అరటిపండు తినడం కూడా బెస్ట్.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.