30 ఏళ్లకే కీళ్ల నొప్పులా? వంటింట్లో ఉండే ఈ గింజలతో ఉక్కులాంటి ఎముకలు మీ సొంతం!

ఈ ఉరుకుల పరుగుల జీవితంలో మన ఆరోగ్యం గురించి పట్టించుకునే సమయం కరువైంది. ముఖ్యంగా మారుతున్న ఆధునిక జీవనశైలి, గంటల తరబడి ఒకేచోట కూర్చుని పనిచేయడం, జంక్ ఫుడ్ కు అలవాటు పడి సరైన పోషకాహారం తీసుకోకపోవడం, వ్యాయామం లేకపోవడం వల్ల నేడు చాలా మంది ఎముకల సమస్యలతో సతమతమవుతున్నారు.

ఒకప్పుడు వృద్ధాప్యంలో మాత్రమే వచ్చే కీళ్ల నొప్పులు, ఇప్పుడు 30 ఏళ్ల యువతను కూడా తీవ్రంగా వేధిస్తున్నాయి. ముఖ్యంగా 30 ఏళ్లు దాటిన తర్వాత సహజంగానే మన శరీరంలో ఎముకల సాంద్రత (Bone Density) తగ్గడం ప్రారంభమవుతుంది. ఎముకలు అరిగే ప్రక్రియ వేగవంతం అవుతుంది. దీనివల్ల ఎముకలు పెళుసుగా మారడం, ఆస్టియోపొరోసిస్ వంటి వ్యాధుల బారిన పడటం, చిన్నపాటి దెబ్బలకే ఎముకలు విరిగే ప్రమాదం (ఫ్రాక్చర్స్) పెరుగుతుంది.

ఈ సమస్యల నుండి బయటపడాలంటే మీ శరీరానికి అత్యంత అవసరమైన కాల్షియం, విటమిన్ డి అందించడంతో పాటు, మన వంటింట్లో సులభంగా లభించే ఒక అద్భుతమైన దివ్యౌషధం మెంతులు వాడటం చాలా మేలు చేస్తుంది.

ఎముకలకు ఉక్కు లాంటి బలాన్నిచ్చే మెంతులు
మెంతులు కేవలం వంటలకు రుచిని, సువాసనను ఇవ్వడానికే కాదు ఎముకల ఆరోగ్యానికి కూడా ఎంతో మేలు చేస్తాయి. మెంతులలో కాల్షియం, ఫాస్ఫరస్, ఐరన్, మెగ్నీషియం వంటి ఖనిజాలు పుష్కలంగా ఉంటాయి. నేషనల్ ఇన్‌స్టిట్యూట్స్ ఆఫ్ హెల్త్ (NIH) అధ్యయనాల ప్రకారం, ఎముకల ఆరోగ్యానికి మెంతులు ఒక ప్రభావవంతమైన సహజ నివారణగా పనిచేస్తాయి.

విరిగిన ఎముకలు త్వరగా అతుక్కోవడానికి, ఎముకల పునర్నిర్మాణానికి ఇవి ఎంతగానో సహాయపడతాయి. వయసు పెరిగే కొద్దీ వచ్చే ఆస్టియోపొరోసిస్ ప్రమాదాన్ని ఇవి సమర్థవంతంగా అడ్డుకుంటాయి.

కీళ్ల నొప్పులు, ఆర్థరైటిస్ నుండి శాశ్వత ఉపశమనం
మెంతులలో శక్తివంతమైన యాంటీఆక్సిడెంట్లు, యాంటీ ఇన్ఫ్లమేటరీ లక్షణాలు మెండుగా ఉన్నాయి. ఇవి కీళ్లలో వచ్చే వాపును, నొప్పిని ఇట్టే తగ్గిస్తాయి. ఆర్థరైటిస్ తో బాధపడేవారికి మెంతులు ఒక వరం లాంటివి. క్రమం తప్పకుండా మెంతులను తీసుకోవడం వల్ల కీళ్ల మధ్య ఉండే చికాకు, బిగుసుకుపోవడం తగ్గి కదలికలు సాఫీగా అవుతాయి.

మెంతులను సరైన పద్ధతిలో ఎలా తీసుకోవాలి?

మెంతి నీరు (నానబెట్టిన మెంతులు): ఇది అత్యంత సులభమైన పద్ధతి. రాత్రి పడుకునే ముందు ఒక గ్లాసు నీటిలో ఒక టీస్పూన్ మెంతులను నానబెట్టండి. ఉదయం నిద్రలేవగానే పరగడుపున ఆ నీటిని వడకట్టి తాగాలి. ఆ మెంతులను కూడా నమిలి మింగవచ్చు.

మెంతి పొడి: మెంతులను దోరగా వేయించి, మెత్తటి పొడిలా మిక్సీ పట్టుకోవాలి. ఈ పొడిని ప్రతిరోజూ ఒక గ్లాసు గోరువెచ్చని నీటిలో కలుపుకుని తాగవచ్చు. లేదా మజ్జిగలో, కూరల్లో కూడా ఈ పొడిని కొద్దిగా కలుపుకుని తీసుకోవచ్చు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.