ఒత్తిడి, ఆందోళనను యోగా ఎలా తగ్గిస్తుంది?

నేటి ఉరుకులు పరుగుల జీవితంలో ఉదయం లేచినప్పటి నుండి రాత్రి పడుకునే వరకు ఏదో ఒక తెలియని ఒత్తిడి. ఆఫీసు పనులు, కుటుంబ బాధ్యతలు, పోటీ ప్రపంచం.. ఇలా కారణాలు ఏవైనా ఒత్తిడి, ఆందోళన మన జీవితంలో ఒక అతిథిలా మారిపోయాయి. మనం ఒత్తిడికి గురైనప్పుడు, మన శరీరం వెంటనే పోరాటం లేదా పలాయనం అనే అత్యవసర స్థితిలోకి వెళుతుంది. దీనివల్ల రక్తంలోకి కార్టిసాల్, అడ్రినలిన్ వంటి ఒత్తిడి హార్మోన్లు ఒక్కసారిగా విడులవుతాయి.

ఇలాంటప్పుడు మనల్ని ప్రశాంతపరిచే అద్భుత ఔషధం యోగా. యోగా అనేది మన నాడీ వ్యవస్థపై నేరుగా పనిచేసి మనసుకు సాంత్వన చేకూర్చే ఒక స్వచ్ఛమైన సైన్స్. ప్రతిరోజూ కేవలం 20 నుండి 30 నిమిషాల పాటు యోగా సాధన చేయడం వల్ల మానసిక ఆరోగ్యంలో వచ్చే అద్భుతమైన మార్పులను మీరే గమనిస్తారు.

యోగా మనల్ని శాస్త్రీయంగా ఎలా శాంతపరుస్తుందో ఇక్కడ చూడండి

నాడీ వ్యవస్థను నిద్రలేపడం (పారాసింపథెటిక్ సిస్టమ్)
మనం ఆందోళనలో ఉన్నప్పుడు గుండె వేగంగా కొట్టుకోవడం, రక్తపోటు పెరగడం జరుగుతుంది. యోగాలోని నెమ్మదైన కదలికలు, దీర్ఘ శ్వాసలు మనలోని పారాసింపథెటిక్ నాడీ వ్యవస్థను ఉత్తేజపరుస్తాయి. శాస్త్రీయ పరిభాషలో దీనిని రెస్ట్ అండ్ డైజెస్ట్ (విశ్రాంతి తీసుకో) విధానం అంటారు. ఇది యాక్టివ్ అవ్వగానే గుండె కొట్టుకునే వేగం తగ్గి, కండరాలు సడలిపోయి.. మెదడుకు అంతా సురక్షితమే, ప్రశాంతంగా ఉండు అనే సంకేతం వెళుతుంది.

సంతోషాన్నిచ్చే హార్మోన్ల ఉత్పత్తి
చాలాసార్లు మెదడులోని రసాయనాల అసమతుల్యత వల్లే ఆందోళన కలుగుతుంది. క్రమం తప్పకుండా యోగా చేయడం వల్ల మెదడులో GABA అనే రసాయనం స్థాయిలు పెరుగుతాయి. ఇది అతిగా ఆలోచించే మెదడుకు బ్రేకులు వేసి ఆందోళనను తగ్గిస్తుంది. అలాగే, ఒత్తిడిని పెంచే కార్టిసాల్ హార్మోన్‌ ను వేగంగా తగ్గించి, మనసుకు ఆనందాన్నిచ్చే ఎండార్ఫిన్లు, సెరోటోనిన్ హార్మోన్లను ఉత్పత్తి చేస్తుంది.

శ్వాసతో ఆలోచనలకు కళ్లెం (ప్రాణాయామం)
మీకు భయం వేసినప్పుడు మీ శ్వాస చాలా వేగంగా, నిస్సారంగా మారుతుంది గమనించారా? మన శ్వాసకు, మెదడుకు విడదీయరాని సంబంధం ఉంది. అనులోమ్ విలోమ్, భ్రమరి లాంటి ప్రాణాయామాల ద్వారా మనం ఉద్దేశపూర్వకంగా శ్వాసను నెమ్మదింపజేసినప్పుడు, అది నేరుగా వేగస్ నాడిని ఉత్తేజపరుస్తుంది. ఈ నాడి మెదడుకు ప్రశాంత సంకేతాలను పంపి ఆలోచనల తుఫానును క్షణాల్లో ఆపేస్తుంది.

వర్తమానంలో జీవించడం (మైండ్‌ ఫుల్‌ నెస్)

ఆందోళన అంటే నిన్నటి గతం గురించిన పశ్చాత్తాపం లేదా ఇంకా జరగని భవిష్యత్తు గురించి భయపడటమే. యోగా చేస్తున్నప్పుడు మీ ధ్యాస మొత్తం మీ శ్వాస, ఆసనం పైనే ఉంటుంది. ఇది మిమ్మల్ని భవిష్యత్తు చింతల నుంచి లాక్కొచ్చి ప్రస్తుతంలో ఉంచుతుంది. వర్తమానంలో ఉన్నప్పుడు చింతలు వాటంతట అవే మాయమవుతాయి.

ఒత్తిడిని ఇట్టే మాయం చేసే 3 సులభమైన ఆసనాలు

మీరు మానసికంగా అలసిపోయినప్పుడు ఈ మూడు ఆసనాలు తక్షణ ఉపశమనాన్ని ఇస్తాయి.

శవాసనం: నేలపై వెల్లకిలా పడుకుని శరీరాన్ని పూర్తిగా విశ్రాంతి స్థితికి తీసుకురావడం. ఇది మానసిక అలసటను పారద్రోలుతుంది.

బాలాసనం (శిశు భంగిమ): మోకాళ్లపై కూర్చుని ముందుకు వంగే ఈ ఆసనం.. వెన్నెముకపై ఒత్తిడిని తగ్గించి మనసుకు ప్రశాంతతను ఇస్తుంది.

ఉత్తానాసనం: నిలబడి ముందుకు వంగి పాదాలను తాకే ఆసనం. ఇది తలకు రక్త ప్రసరణను మెరుగుపరిచి, మెదడుకు స్పష్టతను ఇస్తుంది.

అద్భుత చిట్కా
తర్వాతిసారి మీకు ఎప్పుడైనా ఆందోళనగా లేదా భయంగా అనిపిస్తే.. ప్రశాంతంగా కళ్లు మూసుకుని 5 సెకన్ల పాటు గాలి పీల్చండి, 5 సెకన్లు బిగపట్టండి, మళ్లీ 5 సెకన్ల పాటు నెమ్మదిగా బయటకు వదలండి. దీనినే బాక్స్ బ్రీతింగ్ అంటారు. యోగాలోని ఈ చిన్న టెక్నిక్ మీ మనసును ఎంత అద్భుతంగా, ఎంత త్వరగా పునరుద్ధరిస్తుందో మీరే స్వయంగా అనుభూతి చెందుతారు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.