కిచెన్ పరిశుభ్రతకు- పాటించండి పధ్ధతులు!

ఎలా సర్దుకోవాలి? డబ్బాలన్నిటికి పైన లేబుల్స్ వేసి దేనిలో ఏముందో తేలికగా తెలుసుకోండి. అన్ని గుర్తుంటాయిలే అనుకుంటారు. కాని ఒక్కొక్కపుడు తొందరలో అవి గుర్తుకు రాక పంచదార బదులు ఉప్పు, ఉప్పు బదులు పంచదార కూడా వేసే పరిస్ధితి వస్తుంది. కనుక ప్రతి డబ్బాకు లేబుల్ వేసి వుంచుకోడం మంచి పద్ధతి. కిచెన్ కేబినెట్లు లో ఏది ఎక్కడ వుండాలనేది నిర్ధారించి అవసరమైనవన్ని ఒక క్రమపద్ధతిలో వుంచండి. ఒక సారి తీసి వాడిన తర్వాత దానిని మరల అదే ప్లేస్ లో వుంచటం మరచిపోకండి. లేదంటే సర్దుకున్న సమయమంతా వృధా అయినట్లే. కిచెన్ లో వాడే ఎలక్ట్రానిక్ పరికరాలన్ని ఒక పక్కన పెట్టండి. కడిగిన పాత్రలన్ని మరో వైపు వుంచండి. ఈ పరికరాలు కడిగిన పాత్రలవైపు పెడితే వాటి నీరు అంటుకుంటుంది.

కిచెన్ లో వచ్చే చెత్తను వారానికోసారి పారేద్దాములే అనుకోకుండా ఎప్పటికపుడు బయట పడవేయండి. తడి చెత్త అయితే కుళ్ళు కంపు కొడుతుంది. ఖాళీ ప్లాస్టిక్ కోలా బాటిళ్ళు, బ్రెడ్ కవర్లు, ఇతర కవర్లు మొదలైనవి కిచెన్ నుండి వెంటనే తొలగించండి. బద్ధకిస్తే కిచెన్ శుభ్రత పోతుంది. కిచెన్ తుడిచే గుడ్డలు - కనీసం నాలుగైనా వుంచుకోండి. ఒకటే పెట్టుకుంటే దానిని ఉతికి శుభ్రం చేసే వరకు మీ కిచెన్ శుభ్రత కోల్పోతుంది.