ధనత్రయోదశి రోజున ధన్వంతరిని ఎందుకు పూజిస్తారో తెలుసా?

భాగవత గాధ

భాగవతంలోని అష్టమ స్కంధంలో క్షీరసాగర మధనం గురించి చెప్పబడింది. క్షీరసాగర సమయంలో మొదట హాలాహలం ఉద్భవిస్తుంది. దానిని మహా శివుడు సేవించి కంఠంలో దాస్తాడు. అందుకే పరమేశ్వరుడిని నీలకంఠేశ్వరుడిగా పిలుస్తారు. తర్వాత క్షీరసాగర మధనం లో కామధేనువు, ఉఛ్చైశ్రవం, ఐరావతం, పారిజాతం, అప్సరసలు అవతరిస్తారు. అనంతరం రమాదేవి అవతరించి విష్ణువు వక్షస్థలాన్ని అలంకరిస్తుంది.

సాగర గర్భం నుండి ఒక పురుషుడు పీనాయుత బాహు దండాలను, కంబుకంఠాన్ని, పద్మారుణ లోచనాలను, విశాల వక్ష స్థలాన్ని, సుస్నిగ్ద కేషజాలాన్ని, నీల గాత్ర తేజాన్ని, పీతాంబరం కట్టి, మణికుండలాలు ధరించి, పుష్పమాలా సమలంకృతుడై, హస్తతలాన అమృత కలశంతో ఆవిర్భవిస్తాడు. ఆయన విష్ణు అంశ ద్వార పుట్టినవాడని, యజ్ఞభాగ భోజనుడు, ఆయుర్వేద జ్ఞానం కలవాడు, మహనీయుడని దేవతలు గ్రహించి ఆయనకు ధన్వంతరి అనే పేరు పెడతారు.

ఆయుర్వేద శాస్త్రం ఎన్ని భాగాలంటే..

1. కాయ చికిత్స

2. బాల చికిత్స

3. భూత వైద్యం

4. శలాక్యతంత్ర

5. శల్యతంత్ర

6. విషతంత్ర

7. రసాయన తంత్ర

8. వశీకరణ తంత్ర

కేరళ అష్టవైద్యం

కేరళలో సిద్ధ, ఆయుర్వేద వైద్య విధానంలో అష్టవైద్యం అనే విధానం చాలా ప్రసిద్ధి చెందింది. శతాబ్దాలు గడుస్తున్నా.. పెద్దగా మార్పులు లేకుండా పాత పురాతన పద్ధతిలోనే వైద్యం చేస్తున్నారు. ఇలాంటి వైద్యం చేసే కుటుంబాలు ధన్వంతరిని పూజిస్తాయి. కేరళలోని అలయిత్తూర్, కుట్టంచేరి, తైక్కాడ్, వయస్కార, వెల్లోడ్, చిరత్తమన్ లలో అష్టవైద్య విధానాన్ని అనుసరించే కుటుంబాలు ఉన్నట్లు నిపుణులు చెబుతున్నారు.

ధన్వంతరి మంత్రం

ఓ నమో భగవతే వాసుదేవాయి

ధన్వంతరయే అమృతకలశ హస్తాయ

వజ్రజలౌక హస్తాయ సర్వామయవినాశనాయ

త్రైలోక్య నాథాయ శ్రీ మహా విష్ణవే నమః