ఉగాది పండుగరోజు పూజ ఎలా చేయాలి?

Insync

oi-Nageswara

By B N Sharma

Published: Monday, March 19, 2012, 14:57 [IST]

ఉగాది పండుగనే సంవత్సరాది అని కూడా అంటారు. ఈ రోజున బ్రాహ్మ ముహూర్తంలో లేచి, తలంటు స్నానం చేయాలి. తలంటు స్నానం తర్వాత కొత్త బట్టలు కట్టుకోవాలి. షడ్రుచులతో అంటే ఆరు రుచులతో కూడిన పచ్చడి తయారు చేస్తారు. దీనిలో వేప పూవు, మామిడికాయముక్కలు, కొత్తబెల్లం, లేతకొబ్బరి, చింతపండు గుజ్జు, పచ్చిమిరప కాయలు వుంటాయి. ఈ పచ్చడిని ఇష్టదేవతలకు నైవేద్యంగా పెట్టి, సంవత్సరం అంతా ఆనందంగా జరగాలని కోరుతూ దేవతా ప్రసాదంగా స్వీకరిస్తారు.

పూజగది, ఇల్లు మొత్తం శుభ్రం చేస్తారు. తెలుగు వారి లోగిళ్ళలో ఇంటి ముంగిట గడపలకు పసుపు కుంకుమపెట్టి ఆకర్షణీయం చేస్తారు. గుమ్మానికి మామిడి తోరణాలు, అరటి ఆకులు, పచ్చటి కొబ్బరి ఆకులు వంటి వాటితో అలంకరిస్తారు. పూజా మందిరాన్నిముగ్గులతో అలంకరించాలి. పూజకు వివిధ రంగుల పుష్పాలు వాడాలి. ఉగాది పండుగ రోజున ఉదయం ఆరు గంటల నుంచి 10 గంటల వరకు పూజ చేయవచ్చు. సాయంత్రం వేళ పంచాంగ శ్రవణం తప్పక వినాలి.

అలాగే ఉగాది నాడు కుటుంబంలోని సభ్యులందరూ కలసి ఇంతకుముందు చూడని పుణ్యక్షేత్రాన్ని లేదా దేవాలయాన్ని దర్శించుకోవడం మంచిది. ఆలయాల్లో వసంత నవరాత్ర ఉత్సవముల పేరుతో ఉత్సవాలు నిర్వహిస్తారు. ప్రతిఒక్కరూ తమ శక్తికొలది ఈ ఉత్సవాలలో పాల్గొని భగవంతుని ఆశీస్సులు పొందుతారు.