జీవితంలో 3 సార్లే స్నానం..అయినా ఈ మహిళల చర్మం అంత కాంతివంతంగా ఎలా ఉంటుందంటే?

స్నానం చేయకపోతే మనకు రోజు గడవదు. కొందరు అయితే రోజుకి 2 రెండుసార్లు, చాలామంది రోజుకు ఒక్కసారైనా స్నానం చేస్తుంటారు.ఒక్కరోజు స్నానం మానేస్తేనే చర్మం జిడ్డుగా, అనారోగ్యంగా కనిపిస్తుంది. కానీ ఒక ఆఫ్రికన్ తెగకు చెందిన మహిళలు తమ జీవితకాలంలో కేవలం మూడే మూడు సార్లు స్నానం చేస్తారు. అయినా సరే, రోజూ సబ్బులతో స్నానం చేసే మనకంటే వారి చర్మం ఎంతో ఆరోగ్యంగా, కాంతివంతంగా ఉంటుంది. ఆ మహిళల జీవనశైలి వెనుక ఉన్న సైన్స్ శాస్త్రవేత్తలనే విస్మయానికి గురిచేస్తోంది.

మూడే స్నానాల రూల్ ఎక్కడ

నమీబియా ఎడారి ప్రాంతంలో నివసించే హింబా(Himba) తెగ మహిళలు తమ జీవితంలో నీటిని ఉపయోగించి చేసే స్నానాలు మూడే మూడు. ఒకటి పుట్టినప్పుడు, రెండవది పెళ్లి రోజున, మూడవది చనిపోయిన తర్వాత. మిగతా రోజుల్లో వారు పొరపాటున కూడా నీటితో స్నానం చేయరు. దీనికి కారణం వారికి శుభ్రత మీద ఆసక్తి లేకపోవడం కాదు. భూమ్మీద అత్యంత పొడి వాతావరణం ఉండే తీవ్రమైన ఎడారి ప్రాంతం వారి నివాసం కావడమే.

వారు ఉండే ఏరియాలో త్రాగడానికి నీరు దొరకడమే గగనం. అలాంటి పరిస్థితుల్లో నీటిని స్నానానికి వృథా చేయడం వారికి ప్రాణసంకటంతో సమానం. అందుకే వారు ప్రత్యామ్నాయ మార్గాలను ఎంచుకున్నారు.

ఎర్రటి మట్టి లేపనం

నీటితో స్నానం చేయకపోయినా వారి చర్మం ఎంతో మృదువుగా ఉంటుంది. దీనికి కారణం ఓట్జిజ్ అనే లేపనం. ఎర్రటి మట్టి, ఆవు లేదా మేక వెన్న, ఎడారిలో దొరికే సుగంధ మూలికలను కలిపి ఒక పేస్ట్‌ లా తయారు చేస్తారు. రోజూ ఉదయాన్నే తల నుంచి పాదాల వరకు ఈ ఎర్రటి లేపనాన్ని పూసుకుంటారు.

చూడటానికి ఇదొక గిరిజన ఆచారంలా కనిపిస్తుంది కానీ, దీని వెనుక అద్భుతమైన ఎడారి జీవశాస్త్రం దాగి ఉంది. ఈ లేపనం సూర్యుడి నుంచి వచ్చే ప్రమాదకరమైన అతినీలలోహిత కిరణాలను అడ్డుకుంటుంది, కీటకాలను దరిచేరనివ్వదు, చర్మంలోని తేమ ఆవిరి కాకుండా కాపాడుతుంది.

పొగతో స్నానం - నీరు లేని శుభ్రత

హింబా తెగ మహిళలు నీటితో స్నానం చేయకపోయినా, ప్రతిరోజూ పొగతో స్నానం చేస్తారు. ఒక చిన్న పాత్రలో సుగంధభరితమైన మూలికలు, చెట్ల రెసిన్ (జిగురు) వేసి నిప్పుల మీద కాలుస్తారు. ఆ పాత్ర పైన వంగి కూర్చొని, ఆ పొగ తమ శరీరానికి, జుట్టుకు పూర్తిగా అంటేలా చూసుకుంటారు. ఈ మూలికల పొగ చర్మంపై ఉన్న బ్యాక్టీరియాను చంపేయడమే కాకుండా, చెమట వాసనను పూర్తిగా పోగొడుతుంది.

ఓట్జిజ్ లేపనం, ఈ పొగ స్నానం.. రెండూ కలిపి సబ్బు కంటే అద్భుతంగా పనిచేస్తాయి. నీటి అవసరం లేదు, ఎలాంటి సైడ్ ఎఫెక్ట్స్ లేవు. 500 ఏళ్ల వారి చరిత్రే దీనికి సజీవ సాక్ష్యం. ప్రకృతిని అర్థం చేసుకొని, అక్కడి వాతావరణానికి తగ్గట్టుగా తమను తాము మార్చుకున్న వారి జీవనశైలి మాత్రం ప్రపంచానికే ఆదర్శమనే చెప్పాలి. వందల ఏళ్ల క్రితమే వారు కనుగొన్న ఈ స్కిన్ కేర్ రొటీన్ ముందు ఆధునిక సైన్స్ కూడా తలవంచాల్సిందే

ఈ ఆచారం వెనుక ఉన్న ఆశ్చర్యకరమైన సైన్స్
ఆధునిక శాస్త్రవేత్తలు హింబా మహిళలు వాడే ఓట్జిజ్ లేపనాన్ని ల్యాబ్‌లో పరీక్షించి షాక్ అయ్యారు. ఎందుకంటే ఆ ఎర్రటి మట్టి సహజసిద్ధంగా 80 శాతం UV కిరణాలను అడ్డుకుంటున్నట్లు తేలింది. మనం వాడే ఖరీదైన సన్‌ స్క్రీన్ లోషన్ల కంటే ఇది ఎంతో మెరుగైనది. అందులోని వెన్న తీవ్రమైన ఎండలో చర్మం పగలకుండా మాయిశ్చరైజర్‌ లా పనిచేస్తోంది.

ఇక వారు వాడే మూలికల్లో సహజమైన యాంటీ మైక్రోబయల్ లక్షణాలు ఉన్నట్లు గుర్తించారు. అందుకే చుట్టుపక్కల ఉండే ఇతర తెగల వారితో పోలిస్తే, హింబా మహిళల్లో చర్మ వ్యాధులు దాదాపుగా శూన్యం.