ఈ ఏడాది చివరి సూర్యగ్రహణం ఇదే..సమయం,ఎలా చూడాలి,ముఖ్యమైన విషయాలు మీకోసం..

ఆకాశంలో మరో అద్భుతమైన ఖగోళ విన్యాసం జరగనుంది. ఆదివారం(సెప్టెంబర్ 21,2025)ఏర్పడబోయే పాక్షిక సూర్యగ్రహణం కోసం ప్రపంచవ్యాప్తంగా ఖగోళ ప్రేమికులు ఎంతో ఉత్సాహంగా ఎదురుచూస్తున్నారు. 2025 సంవత్సరంలో ఇదే చివరి సూర్యగ్రహణం కావడంతో దీనిపై ఆసక్తి మరింత పెరిగింది. సూర్యుడికి, భూమికి మధ్య చంద్రుడు అడ్డుగా వచ్చినప్పుడు ఏర్పడే ఈ దృశ్యం.. ఈసారి ఓ సరికొత్త అనుభూతిని పంచనుంది.

ఈసారి ఏర్పడేది సంపూర్ణ సూర్యగ్రహణం కాదు, పాక్షిక సూర్యగ్రహణం మాత్రమే. అంటే చంద్రుడు సూర్యబింబాన్ని పూర్తిగా కప్పివేయడు. సూర్యుడి నుంచి ఎవరో ఒక ముక్క కొరికేసినట్లుగా, ఓ అద్భుతమైన దృశ్యం ఆవిష్కృతమవుతుంది. చంద్రుడి నీడలోని తేలికైన భాగమైన పెనుంబ్రా భూమిపై పడటంతో ఈ పాక్షిక గ్రహణ ప్రభావం ఏర్పడుతుంది. కొన్ని ప్రాంతాలలో అయితే ఏకంగా శాతం సూర్యబింబం చంద్రుడి నీడ కిందకు వెళ్ళిపోతుంది, ఇది చూపరులకు ఒక నాటకీయమైన అనుభవాన్ని ఇస్తుంది.

భారతదేశంలో గ్రహణం కనిపిస్తుందా?
ఈ అద్భుత దృశ్యం భారతదేశంలో కనిపించదు. దీనికి కారణం గ్రహణం సంభవించే సమయం. మన దేశంలో సూర్యాస్తమయం జరిగి, గాఢమైన చీకటి అలుముకున్న తర్వాత ఈ గ్రహణం ఏర్పడుతుంది.

భారత కాలమానం ప్రకారం గ్రహణ సమయాలు
ప్రారంభం: సెప్టెంబర్ 21, రాత్రి 10:59 గంటలకు
గరిష్టం: సెప్టెంబర్ 22, తెల్లవారుజామున 1:11 గంటలకు
ముగింపు: సెప్టెంబర్ 22, తెల్లవారుజామున 3:23 గంటలకు

ఈ సమయాల్లో భారతదేశంలో రాత్రి కావడంతో ఈ ఖగోళ అద్భుతాన్ని మనం ప్రత్యక్షంగా వీక్షించే అవకాశం లేదు. కేవలం భారతదేశమే కాకుండా, ఆసియా, ఆఫ్రికా, యూరప్, అమెరికా ఖండాల్లోని చాలా దేశాలు ఈ గ్రహణాన్ని చూడలేవు.

గ్రహణం ఎక్కడ స్పష్టంగా కనిపిస్తుంది?
ఈ సెప్టెంబర్ గ్రహణం ప్రధానంగా దక్షిణార్ధ గోళంలో అద్భుతంగా దర్శనమిస్తుంది. తూర్పు ఆస్ట్రేలియా, న్యూజిలాండ్, అంటార్కిటికా, పసిఫిక్ దీవులలో నివసించే ప్రజలు ఈ అరుదైన దృశ్యాన్ని ఆస్వాదించగలరు. ముఖ్యంగా అంటార్కిటికాలో అత్యంత నాటకీయమైన దృశ్యాలు ఆవిష్కృతమవుతాయి.

భారత్‌ లో తదుపరి గ్రహణం ఎప్పుడు?
త్వరలోనే మన దేశంలో మరో సూర్యగ్రహణాన్ని చూసే అవకాశం రానుంది. ఆగస్టు 2, 2027న సంభవించే సూర్యగ్రహణం భారతదేశంలోని చాలా ప్రాంతాల్లో పాక్షికంగా కనిపిస్తుంది. ఆ రోజు మధ్యాహ్నం, సాయంత్రం వేళల్లో ఈ ఖగోళ అద్భుతాన్ని వీక్షించవచ్చు.

జాగ్రత్తలు తప్పనిసరి
ఒకవేళ మీరు గ్రహణం కనిపించే ప్రాంతంలో ఉన్నట్లయితే, కొన్ని జాగ్రత్తలు తీసుకోవడం అత్యంత ముఖ్యం. సూర్యగ్రహణాన్ని నేరుగా కంటితో చూడటం చాలా ప్రమాదకరం. దీనివల్ల కంటిచూపు శాశ్వతంగా దెబ్బతినే అవకాశం ఉంది. గ్రహణాన్ని వీక్షించడానికి ప్రత్యేకంగా తయారు చేసిన సోలార్ ఫిల్టర్లు కలిగిన సూర్యగ్రహణ కళ్లద్దాలు తప్పనిసరిగా వాడాలి. సాధారణ సన్ గ్లాసెస్ ఏమాత్రం సురక్షితం కాదు.