మార్కెట్‌లో దొరికే నకిలీ కారం పొడిని ఎలా గుర్తించాలంటే,ఇంత సింపులా!

ప్రతి ఇంటి వంటగదిలో తప్పకుండా ఉండాల్సిన వస్తువు కారం. ఈ కారం లేకపోతే ఏ వంటకమూ రుచికరంగా ఉండదు. అసలు తినలేము కూడా. చాలా మంది ఈ కారం ఎంచుకునేటప్పుడు ప్రత్యేకమైన ప్రమాణాలను పరిగణలోకి తీసుకొని కొంటుంటారు. కానీ ఈ ఆధునిక యుగంలో మార్కెట్‌లో చాలా నకిలీ కారం పొడులు వచ్చేశాయి. ఇవి రుచికరంగా అస్సలు ఉండవు. పైగా ఆరోగ్యానికి చాలా హానికరం కూడా.

తాజాగా పతంజలి కంపెనీకి చెందిన కారం పొడిని ఆ కంపెనీ వెనక్కి తీసుకుంది. భద్రతా నిబంధనలను ఉల్లంఘించినందుకు కారంపొడిని మార్కెట్‌ నుంచి పూర్తిగా ఉపసంహరించుకోవాలని బాబా రామ్‌దేవ్‌ నేతృత్వంలోని సంస్థను ఫుడ్‌ సేఫ్టీ రెగ్యులేటర్‌ ఆదేశించింది. దీంతో నకిలీ కారంపొడి విషయం వెలుగులోకి వచ్చింది. అసలు మార్కెట్‌లో ఉండే నకిలీ కారం పొడిని ఎలా గుర్తించాలి? అనేది ఈ స్టోరీలో తెలుసుకుందాం.

నకిలీ కారంపొడిని ఎలా గుర్తించాలి

ముందుగా కారం పౌడర్లలో సాధారణంగా ఏమి కలుపుతారో తెలుసుకోండి. చాలా మంది కారం పొడిలో ఎర్ర ఇటుక, ఎర్ర ఇసుక, కొన్ని చెక్కల పొడి, స్టార్చ్, సబ్బుపొడి కలుపుతున్నారు. ఇవి అచ్చం కారంపొడి రంగులోనే ఉంటాయి. దీంతో పాటు కారంపొడి పూర్తిగా ఎర్రటి రంగులో కనిపించడానికి కొని కృత్రిమ రంగును జోడిస్తారు. ఇవి కారం ఎర్రగా, అద్భుతమైనదిగా కనిపిస్తుంటుంది.

అయితే మీరు నకిలీ కారంపొడిని గుర్తించాలనుకుంటే.. ఒక గ్లాసులో నీరు నింపి, ఆపై కారం పొడిని చల్లండి. ఆ కారం పొడి పూర్తిగా నీళ్లలో కరిగిపోతే అది ఒరిజినల్‌గా నిర్థారించుకోవచ్చు. ఒకవేళ ఆ కారం పొడి నీటిలో కరగకపోతే.. అది నకిలీదని నిర్ధారించుకోవచ్చు. అందులో కలిపిన బియ్యం పొట్టు, ఇటుక, మరేదైనా వస్తువులు ఉంటే.. వాటిని చూడొచ్చు

అలాగే ఒక ప్లేట్‌లో కారం పొడి వేసి, ఆపై ఉప్పునీరు లేదా అయోడిన్ చుక్కలను చల్లండి. ఈ పరీక్షలో కారం పొడి నీలం రంగులోకి మారితే, అది నకిలీదని అర్థం. అలాగే ఒక గ్లాసులో నీళ్ళు తీసుకుని అందులో ఉప్పు పొడి వేసి కలపాలి. తర్వాత దాని నీటిని తీసి చేతులకు రుద్దినప్పుడు నురగ వస్తే అందులో సబ్బుపొడి కలిపినట్లు అర్ధం చేసుకోవాలి. ఈ విధంగా మార్కెట్‌లో దొరికే నకిలీ పౌడర్లను గుర్తించొచ్చు.