International Day of the Midwife: ప్రసూతి సహాయకుల సేవలు ఎంత విలువైనవో తెలుసా...

ఓ అధ్యయనం ప్రకారం..

మన దేశంలో ఓ అధ్యయనం ప్రకారం ప్రతి తొమ్మిది నిమిషాలకు ఓ గర్భిణి మహిళ మరణిస్తోందట. అంతేకాదు ప్రతి ముప్పై సెకన్లకు ఒక శిశువు కూడా తల్లి కడుపులో చనిపోవడమో లేదా పుట్టిన వెంటనే చనిపోవడమో జరుగుతుందట.

ఇతర కారణాలు కూడా..

ప్రతి సంవత్సరం ప్రపంచవ్యాప్తంగా 27 లక్షల మందికి పైగా గర్భవతులు మరియు నవజాత శిశువులు ఇతర కారణాల వల్ల మరణిస్తున్నారని నిపుణులు ఆందోళన వ్యక్తం చేస్తున్నారు. ఇంకా కొందరు శిశువులు పుట్టిన నెలరోజుల్లోపై చనిపోతున్నారట. అయితే మన దేశంలో కూడా ఈ సంఖ్య దాదాపు లక్షల వరకు ఉండటం విచారకరం.

ప్రసూతి సహాయకులుంటే..

ఇలాంటి మరణాలు సంభవించకుండా ఉండాలంటే మనం ప్రతిచోటా ప్రసూతి సహాయకులను అందుబాటులో ఉంచితే వీరిలో చాలా వరకు మరణాలను తగ్గించవచ్చని.. తల్లీబిడ్డలు సురక్షితంగా ఉండేందుకు ఎక్కువ అవకాశం ఉంటుందని నిపుణులు చెబుతున్నారు.

పిల్లలు పుట్టే సమయంలో..

గర్భిణులకు పిల్లలు పుట్టే సమయంలో ప్రసూతి సహాయకులు గనుక అందుబాటులో ఉంటే ఒక్క మన దేశంలోనే దాదాపు 56 శాతం మంది గర్భిణులు మరియు నవజాత శిశువుల మరణాలను తగ్గించే అవకాశం ఉందట. అంతేకాదు వారికి మెరుగైన వైద్యం అందించేందుకు వారే చర్యలు తీసుకుంటారట.

ఒక్కో గర్భిణి బాధ్యతను..

ప్రసూతి సహాయకులు ఉన్న చోట ఒక్కో గర్భిణి బాధ్యతను వారు గనుక తీసుకుంటే తల్లీకి, బిడ్డకు ఇద్దరికీ చాలా మంచిగా ఉంటుందని డాక్టర్లు చెబుతున్నారు. డాక్టర్లు ఒక్కరే కాదు. వరల్డ్ హెల్త్ ఆర్గనైజేషన్ (WHO)వారు కూడా ఇదే విషయమే చెబుతున్నారు.

మంచి నైపుణ్యం ఉన్న వారిని...

అందుకే మనం ఇప్పటినుంచి మంచి నైపుణ్యం ఉన్న ప్రసూతి సహాయకులను తయారు చేసుకోవాలి. అలాంటి సమయంలోనే తల్లులకు, నవజాతశిశువులకు పూర్తి సంరక్షణ ఉంటుంది.

అందరికీ అవగాహన...

ఈ విషయాల గురించి ప్రపంచంలో ప్రతి ఒక్కరికి వీరి సేవల గురించి తెలియజేసేందుకు.. ప్రసూతి సహాయకులపై అవగాహన కల్పించేందుకే మే 5వ తేదీన ప్రసూతి సహాయకుల దినోత్సవంగా పాటిస్తున్నారు.