Martyrs' Day 2022:గాంధీ వర్ధంతి రోజునే ‘షాహిద్ దివాస్’ ఎందుకు జరుపుకుంటారో తెలుసా...

ప్రపంచ దేశాలకు పాఠంగా..

‘ఈ భూమి మీద కేవలం రక్తమాంసాలు ఉండే శరీరంతో మనుగడ సాగించిన గొప్ప వ్యక్తి మహాత్మ గాంధీ'అని ప్రముఖ శాస్త్రవేత్త ఐన్ స్టీన్ గాంధీనుద్దేశించి అన్నారు. ఆయన జీవితం గురించి తెలుసుకున్న వారికి, గాంధీయిజాన్ని అర్థం చేసుకున్న వ్యక్తులకు ఈ మాటలు ఏ మాత్రం అతిశయోక్తిగా అనిపించవు. కేవలం సత్యం, అహింస అనే నినాదాలతో ప్రపంచానికి కొత్త దారి చూపిన మహాత్ముడు గాంధీజీ. అందుకే గాంధీయిజం ప్రపంచదేశాలకు ఇప్పుడొక పాఠంగా మారిపోయింది. అందుకే మహాత్ముడు మన దేశానికి ‘జాతి పిత'గా మారారు.

ఎంతో ధైర్యంతో..

రవి అస్తమించని ఆంగ్లేయుల సామ్రాజ్యాన్ని సత్యాగ్రహం, అహింస, శాంతి అనే ఆయుధాలతో బెంబేలెత్తించాడు. 20వ శతాబ్దంలోనే మానవాళిని అత్యంత ఎక్కువగా ప్రభావితం చేసిన నాయకుల్లో గాంధీజీ ప్రథముడిగా నిలిచాడనడంలో ఎలాంటి అతిశయోక్తి లేదు. అంతేకాదు చేతిలో ఓ కర్రను పట్టుకుని, నూలు బట్టలు ధరించి.. మురికి వాడలను శుభ్రం చేస్తూ.. అన్ని మతాలూ, కులాలూ ఒకటే అని చాటి చెప్పారు. సత్యాగ్రహం, అహింస వంటివి పాటించేందుకు ఎంతో ధైర్యం కావాలని నిరూపించి ఎందరికో స్ఫూర్తిగా నిలిచారు.

గాడ్సే గన్ తో..

మన దేశానికి ఆంగ్లేయుల నుండి విముక్తి కలిగించడంలో మహాత్మ గాంధీ కీలకపాత్ర పోషించారు. అయితే అంతటి గొప్ప మహాత్ముడిని 1948వ సంవత్సరంలో జనవరి 30వ తేదీన అత్యంత దారుణంగా హత్య చేశారు. ఢిల్లీలో బిర్లా నివాసం వద్ద ప్రార్థనా మందిరానికి వెళ్తున్న సమయంలో నాథూరామ్ గాడ్సే గాంధీజీని తన తుపాకితో కాల్చి చంపాడు. అప్పటినుండి ప్రతి సంవత్సరం జనవరి 30న గాంధీ వర్ధంతిని జరపనున్నారు.

భావితరాలకు బాటగా..

అప్పటినుంచి గాంధీజీ చూపిన సత్యం, అహింసా, శాంతి మార్గాలు భావితరాలకు బంగారు బాటగా నిలిచాయి. ఒక సామాన్య కుటుంబంలో జన్మించిన గాంధీజీ తను నమ్మిన సిద్ధాంతాలను అనునిత్యం ఆచరించాడు. అందుకే భారతదేశంతో పాటు ప్రపంచ చరిత్రలోనే తనదైన గుర్తింపు పొందారు. ప్రపంచంలోనే గొప్ప మహాత్ముడిగా అవతరించారు. అందుకే ఆయన జన్మించిన అక్టోబర్ రెండో తేదీన ఐక్య రాజ్య సమితి ‘అంతర్జాతీయ అహింసా దినోత్సవం'గా ప్రకటించింది.

అందరికీ స్ఫూర్తిదాయకం..

గాంధీజీ సిద్ధాంతాలు అప్పటితరం వారికే కాదు.. నేటి తరం ప్రజలకు, పాలకులకు ఎంతో స్ఫూర్తిదాయకంగా ఉంటాయి. ఎందుకంటే ‘అహింసే అత్యున్నత కర్తవ్యం. మనం దాన్ని పూర్తి స్థాయిలో ఆచరించకపోయినా.. దాని గొప్పతనాన్ని కనీసం అర్థం చేసుకునేందుకు ప్రయత్నించాలి. సాధ్యమైనంత వరకు హింసా మార్గానికి దూరంగా ఉండాలి' మహాత్మ గాంధీ వర్థంతి సందర్భంగా ఆ మహనీయుని స్మరించుకుంటూ నివాళులు అర్పిస్తున్నట్లు పలువరు ప్రముఖులు తెలియజేశారు.