ప్రేమ గుడ్డిది బ్రో: 72 ఏళ్ల మహిళను పెళ్లాడిన 22 ఏళ్ల యువకుడు

ప్రేమ గుడ్డిది.. దానికి వయసు, అంతస్తు, దేశం, సరిహద్దులు వంటి అడ్డంకులు ఏవీ ఉండవు అని పెద్దలు చెబుతుంటారు. ఈ మాటను అక్షరాలా నిజం చేసింది ఒక జంట. సాధారణంగా పెళ్లి అనగానే వధూవరుల మధ్య నాలుగైదేళ్ల వయసు వ్యత్యాసం ఉండటం సహజం. కానీ,ఏకంగా 50 ఏళ్ల వయసు వ్యత్యాసం ఉన్న ఇద్దరు వ్యక్తులు ఏడడుగులు నడిచి ప్రపంచాన్ని ఆశ్చర్యపరిచారు.

22 ఏళ్ల యువకుడు తనకంటే ఐదు పదుల వయసు పెద్దదైన 72 ఏళ్ల వృద్ధురాలిని వివాహం చేసుకున్నాడు. ఇప్పుడు ఈ విలక్షణమైన జంట ఫోటోలు, వారి ప్రేమకథ సోషల్ మీడియాను షేక్ చేస్తోంది.

విహారయాత్రలో చిగురించిన ప్రేమ..
డొమినికన్ రిపబ్లిక్‌కు చెందిన 22 ఏళ్ల డేనియల్ రామిరెజ్ తన కుటుంబం నడుపుతున్న ఒక చిన్న కేఫ్‌ లో సహాయం చేస్తూ జీవనం సాగించేవాడు. సరిగ్గా రెండేళ్ల క్రితం అమెరికాలోని ఫ్లోరిడాకు చెందిన 72 ఏళ్ల ఎలియనోర్ హేస్ అనే రియల్ ఎస్టేట్ కోటీశ్వరురాలు పుంటా కానా ప్రాంతానికి విహారయాత్ర కోసం వచ్చింది. ఆ సమయంలో ఆమె డేనియల్ పనిచేస్తున్న కేఫ్‌కు వెళ్లడం, అక్కడే వారిద్దరి మధ్య తొలి పరిచయం ఏర్పడటం జరిగింది. ఆ చిన్న పరిచయం కాస్తా స్నేహంగా మారి, ఆపై గాఢమైన ప్రేమకు దారితీసింది. ఆ విహారయాత్ర వారి జీవితాల్లో సరికొత్త అధ్యాయానికి శ్రీకారం చుట్టింది.

ఆమె నా ప్రాణం.. నా సర్వస్వం..
రెండేళ్ల పాటు తమ బంధాన్ని ఎంతో అపురూపంగా కాపాడుకున్న ఈ జంట, గత నెలలో అమెరికాలోని మయామిలో అత్యంత సన్నిహితుల మధ్య అంగరంగ వైభవంగా వివాహం చేసుకున్నారు. 50 ఏళ్ల వయసు అంతరం వారి ప్రేమకు ఏమాత్రం అడ్డుకట్ట వేయలేకపోయింది. ఈ సందర్భంగా డేనియల్ మీడియాతో ఎంతో ఉద్వేగంగా మాట్లాడుతూ.. ఆమె నా ప్రాణం. వయసు అనేది కేవలం ఒక సంఖ్య మాత్రమే. మేము ఒకరినొకరం ప్రాణంగా ప్రేమిస్తున్నాము. ఆమె నన్ను పూర్తిగా అర్థం చేసుకుంటుంది. జీవితాన్ని మళ్లీ సరికొత్తగా, స్వేచ్ఛగా ఎలా ఆస్వాదించాలో నేను ఆమెకు నేర్పిస్తున్నాను అని అన్నాడు. అలాగే ఎలియనోర్ స్పందిస్తూ.. తన భర్త మరణం తర్వాత ఒంటరిగా ఉన్న తనకు, డేనియల్ రూపంలో ఒక నిజాయితీ గల, స్వచ్ఛమైన ప్రేమను పంచే భాగస్వామి దొరికాడని సంతోషం వ్యక్తం చేసింది.

రెండుగా చీలిపోయిన ఇంటర్నెట్ లోకం..
అయితే, ఈ వింత పెళ్లి వార్త ఎలియనోర్ పిల్లలను తీవ్ర గందరగోళానికి గురిచేసింది. మరోవైపు, ఈ జంట ఫోటోలు ఇన్‌ స్టాగ్రామ్‌ లోని @psychological అనే అకౌంట్ లో పోస్ట్ చేయడంతో అవి వైరల్ అయ్యాయి. ఈ వార్తతో నెటిజన్లు రెండు వర్గాలుగా విడిపోయి కామెంట్ల వర్షం కురిపిస్తున్నారు. కొందరు వారి ప్రేమను సమర్థిస్తుంటే, మరికొందరు విమర్శిస్తున్నారు. ఈ ప్రపంచంలో నిజమైన ప్రేమ ఇంకా బతికే ఉందనడానికి వీళ్లే నిదర్శనం అని ఒక నెటిజన్ ప్రశంసించగా.. మరొకరు సెటైరికల్‌ గా స్పందిస్తూ ఇది తొలిచూపు ప్రేమ కాదు బ్రో.. ఆ కుర్రాడికి ఆమె బ్యాంక్ బ్యాలెన్స్ మీద ప్రేమ పుట్టింది అని కామెంట్ చేశారు. 50 ఏళ్ల గ్యాప్ ఉన్నా.. ఈ రోజుల్లో ఇవన్నీ కామనే అని ఇంకొందరు సరదాగా వ్యాఖ్యానించారు.

ప్రజలు, నెటిజన్లు ఎన్ని రకాలుగా విమర్శించినా ఈ జంట మాత్రం అవేవీ పట్టించుకోవడం లేదు. ప్రేమలో పడటానికి వయసు, డబ్బుతో పనిలేదని, ఇద్దరి మధ్య పరస్పర అవగాహన ఉంటే చాలని ఈ జంట ప్రపంచానికి చాటిచెప్పింది.