ఈద్ మిలాద్-ఉన్-నబీ పండుగను ఎందుకు జరుపుకుంటారో తెలుసా...

ప్రవక్త జన్మించడంతో..

మహమ్మద్ ప్రవక్త జన్మించిన కారణంగా.. ఆయన జ్ణాపకార్థం ఈద్-ఎ-మిలాద్-ఉన్ పండుగను జరుపుకుంటారు. 570లో రబీ-ఉల్-అవ్వాల్ పన్నెండో రోజు ప్రవక్త మక్కాలో జన్మించాడని నమ్ముతారు.

మరోపేరు..

మిలాద్-ఉన్-నబీ అనే పండుగను మావ్లిద్ అన్-నబీ పండుగ అని కూడా పిలుస్తారు. అరబిక్ భాషలో ‘మావ్లిద్' అంటే జన్మనివ్వడం లేదా బిడ్డ పుట్టడం అని అర్థం. ఇస్లామిక్ క్యాలెండర్లో మూడో నెల అయిన రబీ అల్-అవ్వాల్ నెలలో ఈ పండుగను జరుపుకుంటారు.

చరిత్రను పరిశీలిస్తే..

మహమ్మద్ ప్రవక్త తుది శ్వాస విడిచిన తర్వాత, అతని ఇంటిని తన వారసులలో ఒకరు ప్రార్థన ఇంటిగా మార్చారు. 11వ శతాబ్దంలో ఈద్-ఎ-మిలాద్ వేడుకలు బాగా ప్రాచుర్యం పొందాయి. వీటిని మొట్టమొదటిసారిగా ఈజిప్టు దేశంలో అధికారిక పండుగగా జరుపుకున్నారు.

12వ శతాబ్దంలో..

12వ శతాబ్దంలో, ఈజ్టిపుతో పాటు సిరియా, మొరాకో, టర్కీ మరియు స్పెయిన్ వంటి దేశాల్లో కూడా ఈద్-ఎ-మిలాద్ ఉత్సవాలు జరుపుకోవడం ప్రారంభించారు. పురాతన కాలంలో, ఆధునిక కాలంతో పోలిస్తే, ఈ పండుగను చాలా భిన్నంగా జరుపుకుంటున్నారు.

ప్రార్థనలు చేస్తూ..

ఈజిప్టులో ప్రముఖ వంశం చేత 11వ శతాబ్దంలో ప్రారంభించబడిన ఈ వేడుకలు, అనంతరం ప్రజలు ప్రార్థనలు చేయడం ద్వారా ఈరోజును ప్రారంభించారు. దీని తర్వాత పాలక వంశానికి చెందిన ప్రజలు ప్రసంగాలు ఇచ్చారు. పవిత్ర ఖురాన్ నుండి శ్లోకాలు పఠించారు.

నమాజ్ తర్వాత..

ప్రవక్త పుట్టినరోజు సందర్భంగా విశ్వం మొత్తం శాంతి, సహనంతో తలతూగాలని ప్రతి ఒక్క ముస్లిం ప్రార్థిస్తారు. మిలాద్-ఉన్-నబీ వేడుకల సందర్భంగా మన తెలుగు రాష్ట్రాల్లోని రాత్రి వేళల్లో విద్యుత్ అలంకరణలతో ప్రార్థనా మందిరాలను అలంకరించి.. ఆధ్యాత్మిక సభలు, నాతియాకలామ్(ప్రవక్త కీర్తనలు) నిర్వహిస్తారు.

అన్నదాన కార్యక్రమాలు..

ఈ పండుగ సమయంలో వేకువ జామున నమజా తర్వాత అన్నదాన కార్యక్రమాలు నిర్వహిస్తారు. కడప వంటి జిల్లాలతో పాటు చాలా చోట్ల ఈ పండుగ సమయంలో ముస్లింలతో పాటు హిందువులు కూడా ఎంతో పవిత్రంగా బార్మి అన్నదానాలు నిర్వహించడం ఈ పండుగ యొక్క ప్రత్యేకత. ఇది మత సామరస్యానికి ప్రతీకగా చెప్పొచ్చు.