మళ్లీ లాక్ డౌన్ తప్పదా? కరోనా కేసులు పెరుగుదలే కారణమా?

అక్కడంతా లాక్ డౌనే...

కరోనా వైరస్ కేసులు రోజురోజుకు విపరీతంగా పెరిగిపోతుండటంతో మహారాష్ట్ర, తమిళనాడు, వంటి రాష్ట్రాలతో పాటు పలు రాష్ట్రాలలో కూడా లాక్ డౌన్ ఇప్పటికే పొడిగించాయి. ఇందుకు సంబంధించిన మార్గదర్శకాలను కూడా విడుదల చేశారు.

క్వారంటైన్ ను పెంచారు..

అంతేకాదు ఇప్పటివరకు క్వారంటైన్ పీరియడ్ 14 రోజుల వరకు ఉన్న ఈ కాల వ్యవధిని కాస్త మరో వారం రోజులు, అంటే 21 రోజులకు పెంచుతూ ఆయా ప్రభుత్వాలు ఆదేశాలు సైతం జారీ చేశాయి.

హోం క్వారంటైన్..

మిగిలిన రాష్ట్రాల పరిస్థితి ఎలా ఉన్నప్పటికీ, మన తెలుగు రాష్ట్రాల పరిస్థితి మాత్రం విచిత్రంగా ఉంది. ముఖ్యంగా తెలంగాణ రాష్ట్రంలోని హైదరాబాదులో 80 శాతం వరకు కరోనా కేసులు నమోదవుతున్నాయి. ఆంధ్రప్రదేశ్ లో కూడా ఇలా కోవిద్-19 కేసులు పెరగడంతో ఏపీ ప్రభుత్వం హోం క్వారంటైన్ కు కూడా అనుమతి ఇచ్చింది.

హైదరాబాద్ లాక్ డౌన్..

ఇలా హైదరాబాదులో విపరీతంగా కరోనా కేసులు పెరుగుతుండటంతో.. తెలంగాణ ప్రభుత్వం మరోసారి హైదరాబాదులో సంపూర్ణ లాక్ డౌన్ విధిస్తుందని వార్తలు వెలువడుతున్నాయి. దీనికి సంబంధించి ప్రభుత్వ ప్రకటనలు కూడా లాక్ డౌన్ కు సానుకూలంగా వస్తున్నాయి.

సెల్ఫ్ లాక్ డౌన్..

కరోనా విపరీతంగా వ్యాపిస్తుండటంతో ఇప్పటికే హైదరాబాద్ నగరంలో కొందరు వ్యాపారులు స్వచ్ఛందంగా లాక్ డౌన్ ను పాటిస్తున్నారు. తాము వ్యాపారంలో భారీగా నష్టపోతామని తెలిసినా, వారు దుకాణాలను మూసేందుకే మొగ్గు చూపుతున్నారు.

మరణాల రేటు తక్కువ..

కరోనా దేశవ్యాప్తంగా విపరీతంగా పెరుగుతున్న సమయంలో.. ఇతర రాష్ట్రాలతో పోలిస్తే, తెలంగాణలో మరణాల రేటు తక్కువగా ఉంది. ఇది కొంత ఊరటనిచ్చే విషయమే. కానీ పరిస్థితి మాత్రం భయంకరంగా ఉన్నట్లు స్పష్టంగా తెలుస్తోంది.

స్వీయ నియంత్రణ..

అయితే కరోనా నుండి కాపాడుకునేందుకు ప్రస్తుతానికి స్వీయ నియంత్రణ ఒక్కటే మార్గం. ముఖ్యంగా మాస్కులను కచ్చితంగా ధరించడం.. శానిటైజర్ వాడటం.. భౌతిక దూరాన్ని మెయింటెయిన్ చేయడం వంటి వాటిని కచ్చితంగా పాటించాలి.