పింక్ మూన్ 2020 : పింక్ సూపర్ మూన్ అంటే ఏమిటి? అది ఎప్పుడు కనిపిస్తుందో తెలుసా?

పింక్ సూపర్ మూన్ అంటే..

సాధారణంగా మన దేశంలో పౌర్ణమి వేళ కనిపించే చంద్రుడు అత్యంత ప్రకాశవంతంగా, సాధారణ రోజుల్లో కంటే, పెద్దగా ఆకాశవీధిలో అందాల జాబిలిలా కనువిందు చేస్తుంటాడు. అయితే అంతకంటే ప్రకాశవంతంగా, దానికన్నా భారీ ఆకారంలో కనిపించే మూన్ సూపర్ పింక్ మూన్ అంటారు. భూ కక్ష్యలో చంద్రుడు దగ్గరగా ఉండే స్థానాన్ని పెరోజి అంటారు.

పెరోజీలోకి వచ్చినప్పుడు..

ఈ పెరోజీలోకి వచ్చినప్పుడు చంద్రుడు భారీగా, మరింత ప్రకాశవంతంగా కనిపించి అందరినీ అలరిస్తాడు. సాధారణంగా భూమికి, చంద్రుడికి మధ్య దూరం సుమారు మూడు లక్షల 84 వేల కిలోమీటర్ల దూరం ఉంటుది. అయితే ఏప్రిల్ 7, 8వ తేదీలలో మాత్రం ఆ దూరం 3 లక్షల 56 వేల కిలోమీటర్లకు తగ్గిపోతుందని శాస్త్రవేత్తలు చెబుతున్నారు.

పౌర్ణమి నాడు..

దీని ఫలితంగానే పౌర్ణమి వేళ కనిపించే చంద్రుడి కంటే 14 శాతం పెద్దగా, 30 శాతం ఎక్కువ ప్రకాశవంతంగా కనిపించి సూపర్ పింక్ మూన్ లా దర్శనమిస్తాడట. 20 ఏళ్లలో ఇప్పటివరకు 79 సూపర్ మూన్ లు వచ్చాయని శాస్త్రవేత్తలు చెబుతున్నారు. సగటున మూడు నెలలకో సూపర్ మూన్ కనిపిస్తుందట. ఈ సంవత్సరం కూడా నెలలో ఒక సూపర్ మూన్ వచ్చే అవకాశముందట.

2016 నుండి..

ఈ ‘సూపర్ మూన్‘ అనే పదం 40 సంవత్సరాలుగా ఉన్నప్పటికీ 2016 సంవత్సరంలో మూడు సూపర్ మూన్లు కనిపించేసరికి దీనికి ప్రజాదరణ బాగా పెరిగింది. ఇది ఎక్కువగా వసంత కాలంలో అది కూడా ఏప్రిల్ మాసంలో ఎక్కువగా కనిపిస్తుంది.

పింక్ కలర్ కు సంబంధం లేదు..

ఉత్తర అమెరికాలో ముందుగా కనిపించే ఈ సూపర్ మూన్ ను ‘పింక్ మూన్‘ లేదా ‘సూపర్ పింక్ మూన్‘ అని అంటారు. అయితే ఈ పేరుకు సూపర్ మూన్ రంగుకు ఎలాంటి సంబంధం లేదు.