Ramzan 2023: రంజాన్ ఉపవాసం లాభనష్టాలు తెలుసా? ఇప్పుడు తెలుసుకుందాం

రంజాన్.. ముస్లింల పవిత్రమైన పండగ. రంజాన్‌ను రమదాన్ అని కూడా కొందరు పిలుస్తుంటారు. రంజాన్ కు నెల రోజుల ముందు నుండే రోజా ఉంటారు. రోజా అంటే ఉపవాసం. నెల రోజుల పాటు కఠిన ఉపవాసాన్ని పాటిస్తారు. ఈ ఉపవాసం సెహ్రీతో మొదలై ఇఫ్తార్ తో ముగుస్తుంది.

రంజాన్ ఉపవాసం కఠినంగా ఉంటుంది. తెల్లవారుజాము సెహ్రీతో మొదలవుతుంది. మధ్యాహ్నం వేళ ఎలాంటి ఆహార పదార్థాలు తినరు, ఏదీ తాగరు. సాయంత్రం ఇఫ్తార్ వరకు ఉపవాసం కఠినంగా పాటిస్తారు. అయితే ఈ ఉపవాసం వల్ల అనేక ఆరోగ్య ప్రయోజనాలు ఉన్నాయని వైద్య నిపుణులు చెబుతున్నారు. లాభాలతో పాటు కొన్ని రిస్క్‌లు కూడా ఉన్నాయన్నది వాస్తవం.

రంజాన్ ఉపవాసంతో ఆరోగ్య ప్రయోజనాలు ఏంటి, ఉపవాసం పాటించడం వల్ల ఎదురయ్యే రిస్క్‌లు ఏమిటో ఇప్పుడు తెలుసుకుందాం.

ఉపవాసం వల్ల కలిగే ఆరోగ్య ప్రయోజనాలు:

* ఉపవాసం వల్ల కేలరీలు కరిగి బరువు తగ్గుతారు.
* అయితే ఉపవాసం ఉండే వారు సెహ్రీ ముందు ఇఫ్తార్ తర్వాత సమతుల్య ఆహారం తీసుకోవాలని వైద్యుల సూచిస్తుంటారు.
* ఊబకాయం, అధిక బరువు ఉన్నవారు, వారి రెగ్యులర్ డైట్ మార్చుకోవడం వల్ల రంజాన్ సమయంలో బరువు తగ్గవచ్చు.
* రంజాన్ మాసంలో పాటించే ఉపవాసం వల్ల కొలెస్ట్రాల్ స్థాయిలు తగ్గుతాయి.
* ఈ తరహా ఉపవాసం వల్ల రోగనిరోధక శక్తి పెరుగుతుంది.

ఉపవాసం వల్ల ఆరోగ్య ప్రమాదాలు:

* గర్భిణీలు, దీర్ఘకాలిక ఆరోగ్య సమస్యలతో బాధపడే వారు, మధుమేహం ఉన్న వారికి రంజాన్ ఉపవాసం వల్ల ఆరోగ్య సమస్యలు వస్తాయి.
* గాయాలు, శస్త్రచికిత్సలు చేయించుకున్న వారు ఉపవాసం వేళ మందులు దాటవేయడం చేయకూడదు.
* సెహ్రీ ముందు ఇఫ్తార్ తర్వాత మందులు వేసుకోవడం గురించి వైద్యులను సంప్రదించిన తర్వాతే నిర్ణయం తీసుకోవాలి.
* రక్తంలో చక్కెర స్థాయిలు ప్రభావితమయ్యే ప్రమాదం ఉంది. కాబట్టి జాగ్రత్తలు తీసుకోవడం ముఖ్యం.
* నీరు తాగకపోవడం వల్ల డీహైడ్రేషన్ కు గురికావొచ్చు.
* ఏమీ తినకపోవడం వల్ల అలసట, తలనొప్పి, చికాకు రావొచ్చు.
* ఆహారపు అలవాట్లలో మార్పు, పగటిపూట ఎలాంటి ద్రవాలు తీసుకోకపోవడం వల్ల కొంత మందిలో మలబద్ధకం రావొచ్చు.

అయితే ఈ ఆరోగ్య సమస్యలు అధిగమించడానికి ఉపవాసం లేని సమయంలో తృణధాన్యాలు, అధిక ఫైబర్, తాజా పండ్లు, కూరగాయలు, బీన్స్, కాయధాన్యాలు, ఎండిన పండ్లు, గింజలు వంటి అధిక ఫైబర్ ఆహారాలను తినాలని వైద్యులు సూచిస్తున్నారు. పోషకాహారం తీసుకోవడం, నడక లాంటి తేలికపాటి శారీరక శ్రమ కూడా మలబద్ధకం ప్రమాదాన్ని తగ్గించవచ్చని వైద్యులు సూచిస్తున్నారు.

రంజాన్ ఉపవాసం రకాలు:

రంజాన్ వేళ పాటించే ఉపవాసాలను మూడు అష్రాలుగా విభజిస్తారు. తొలి 10 రోజుల ఉపవాస కాలాన్ని రహ్మత్ అని, తదుపరి 10 రోజుల ఉపవాస కాలాన్ని బర్కత్ అని, చివరి 10 రోజుల ఉపవాస కాలాన్ని మగ్ఫిరత్ అని పిలుస్తుంటారు. ఉపవాసానికి ముందు అంటే ఉపవాసం ప్రారంభించే ఉదయం వేళను సెహ్రీ అని విరమించే సమయాన్ని అంటే సాయంత్రాన్ని ఇఫ్తార్ అని అంటారు.