చలికాలంలో చిన్నారులకు జాగ్రత్తలు!

By B N Sharma

Published: Monday, December 12, 2011, 16:29 [IST]

తల్లిగర్భంలో అప్పటివరకు వెచ్చగా ఉన్న శిశువులు బయటి వాతావరణంలోకి రాగానే చలిని తట్టుకోలేరు. మరి అది చలికాలమైతే సమస్య తీవ్రతరమవుతుంది. కాబట్టి శిశువును ఎప్పుడు వెచ్చగా ఉంచేందుకు ప్రయత్నించాలి. శిశువు చర్మం చాలా సున్నితంగా ఉంటుంది. అలాంటి చర్మానికి అంతకంటే మృదువైన, మెత్తనైన దుస్తులు వేస్తే సౌకర్యంగా వుంటుంది. తేలికపాటి రంగులైన తెలుపు, పసుపు వంటి రంగులు వేయటం మంచిది. వీలైనంత వరకు పొడుగు చేతుల షర్టులు వేస్తే బాగుంటుంది. వేసే దుస్తులు తేలికగా తీసేవిగాను ఉండాలి.

చలికాలంలో పిల్లల చర్మం పొడారిపోతుంది. కనుక పిల్లలను రకరకాల దుస్తులతో నిండా కప్పేస్తారు. ఇవి ఒక్కోసారి పిల్లలకు ఎలర్జీలు కూడా కలిగిస్తాయి. అలా అని అశ్రద్ధ చేస్తే చలిగాలి పిల్లలను తాకి అనారోగ్యం పాలు చేస్తుంది. కాబట్టి చలికాలంలో చిన్నారుల గుడ్డల విషయంలో జాగ్రత్త వహించాలి.

చలిగాలి చెవులకు సోకుకుండా చెవుల్లో దూదిపెట్టండి. చెవులు పూర్తిగా కవర్ అయ్యేలా లోపల మెత్తగా ఉండే టోపీని పెట్టండి. ఎక్కువ మందం కలిగిన కాటన్ దుస్తులను మాత్రమే వేయండి. కాళ్లకు సాక్స్ చేతులకు గ్లోవ్స్ వంటివి కూడా ఇపుడు లభిస్తున్నాయి. అలా అని ఎక్కువ బట్టలు వేయడం వల్ల గాలి సరిగా ఆడక శిశువుకు అసౌకర్యంగా ఉంటుంది. మెత్తటి కుషన్లు, మెత్తని కాటన్ దుప్పట్లు వంటివి మాత్రమే వాడండి. బేబీ దుస్తులు ఈ కాలంలో తడిస్తే వాటిని వెంటనే మార్చాలి. ఏమాత్రం ఆలస్యం చేసినా స్కిన్ ఇరిటేషన్, రాషెస్ వంటివి కలుగుతాయి. వీటితో బేబీ అనారోగ్యం పొందటమే కాదు. మీరు సైతం ఇబ్బంది పడాల్సి వస్తుంది.