మహిళ రిస్కులు తగ్గించే సంతానం!

మహిళలు తాము తమ చిన్న పిల్లలతో వున్నపుడు ఎంతో జాగ్రత్తగా వుంటారు. చేసే ప్రతిపనిలోను రిస్కును అంచనా వేసి వెనుకడుగు వేస్తారు. అయితే, పురుషులు అంచనా వేసినప్పటికి ముందడుగే వేస్తారు. వెనుకడుగు వేయటానికి ఇష్టపడరు.

పురుషులు, స్త్రీలలో కల ఈ ప్రవర్తన వ్యత్యాసానికి కారణం పురుషులు తమ ఆధిక్యత, గొప్పతనం, పురుషుడననే అహంకారం వంటివి ప్రదర్శించటానికిముందుకే సాగుతాడని, అయితే మహిళ తన సంతతిని రక్షించుకోవడానికి వెనుకడుగు వేస్తుందని, ఇది సృష్టిలోనే సహజంగా వుండే లక్షణమని రీసెర్చర్లు వెల్లడించారు.

వార్విక్ యూనివర్శిటీ మరియు బేసెల్ యూనివర్శిటీలు నిర్వహించిన సంయుక్త పరిశోధనలో సైంటిస్టులు మహిళా విద్యార్ధులు జూదపు ఆటలను వారు వంటరిగా వున్నపుడు అధిక రిస్కుతోను, వారికిష్టమైన, పురుషులు లేదా పిల్లల ఫొటోలు వారితో వున్నపుడు రిస్కు తక్కువతోను ఆడటాన్ని గ్రహించారు.

మరో ఆశ్చర్యకరమైన విషయం ఏమంటే, పురుషులు తాము ఒంటరిగా ఆడే సమయంలో కంటే కూడా తోటి పురుషులతో కలసి ఆట ఆడే సమయంలో మరింత అధిక రిస్కు తీసుకొని వారితో పోటీచేసే తత్వం కలిగి వుంటారని, తోటి వారికంటే అధికంగా పేరు ప్రఖ్యాతులు కలిగి వుండాలనే భావనలు కలిగి వుంటారని రీసెర్చర్లు వెల్లడించారు.

కాని పురుషులు వారివెంట కనుక ఒక మహిళ వున్నపుడు ఈ రకమైన అధిక రిస్కు తీసుకునే తత్వం ప్రదర్శించలేదని, గెలిచిన ఆటలను వారి పార్టనర్ గెలుపుగా కూడా భావించారని తెలిసింది. చేయబడిన ఈ రీసెర్చిలో పురుషులు తాము కట్టుబడిన సంబంధాలకు తక్కువ రిస్కు ప్రవర్తన కలిగి వుంటారని తోటిపురుషులతో అధికంగా తలపడరని, వారికి వారు కోరే మహిళ కనుచూపు వుంటే చాలని భావించినట్లు తెలిపారు.

అయితే, పిల్లలతో వున్నపుడు స్త్రీ, పురుషుల ప్రవర్తన అంచనాలు స్టడీ చేయటం ఇదే మొదటి సారని వార్విక్ యూనివర్శిటీ సైకాలజిస్ట్ డా. ధామస్ హిల్స్ తెలిపారు. రిస్కు తీసుకోవడంలో మన వ్యక్తిత్వ తీరు మన ప్రవర్తనను అన్ని రంగాలలోను ప్రతిబింబ చేస్తుంది. అది ఆర్ధిక అంశమైనా, వేరే అంశమైనా ఒకటిగానే వుంటుంది.

ఈ ఆటలలో మహిళ తనతోపాటు వున్నది తన సంతానం కాకపోయినప్పటికి, తనతోపాటు ఒక బేబీ వుందంటే చాలు, రిస్కు తీసుకోవటంలో విభిన్నంగా వ్యవహరిస్తుందని రీసెర్చర్లు తెలిపారు. ఈ మహిళల తీరునే వారు మహిళలలో రిస్కు తీసుకోవటంలో గల ఒక ఆన్ మరియు ఆఫ్ స్విచ్ గా వర్ణించారు. స్టడీ ఫలితాలను ఎవల్యూషన్ మరియు హ్యూమన్ బిహేవియర్ అనే జర్నల్ లో ప్రచురించారు.