బేబీ పెరుగుదలలో కొన్నిఆశ్చర్యకర విషయాలు

అభివృద్ధి చెందుతున్న దేశాలలో ఇప్పుడున్న పరిస్థితులను బట్టి 20-30 శాతం పిల్లలు తక్కువ బరువుతో పుడుతున్నారు. డబ్లూహెచ్‌ఓ ప్రకారం శిశువు 2,500 గ్రా. మరియు అంతకన్నా ఎక్కువుండాలి.పిల్లలు బరువు తక్కువగా పుట్టినపుడు వారిని పెంచడం చాలా కష్టంతో కూడుకున్న పని. వారి పెంపక వ్యయం కూడా ఎక్కువవుతుంది. ఇది ఆర్థిక స్థోమతలేనివారికి కష్టమవుతుంది. అలా పుట్టినవారిని ఎంతో జాగ్రత్తగా పెంచితేనే వ్యాధులనుండి కాపాడవచ్చు. అయినా, వారి పెరుగుదల ఒక్కొక్కసారి సరిగ్గా ఉండకపోవచ్చు. అలా జరిగే నష్టం భౌతికంగాను, మానసికంగాను రెండువిధాలా వుంటుంది. శిశువు తక్కువ బరువుతో పుట్టినపుడు వారిని తక్కువ బరువున్న పిల్లలుగా నిర్థారిస్తారు. పట్టణాల్లో 18-20 శాతం ఉంటే పల్లెల్లో 26-30 శాతం వరకూ ఇలా తక్కువ బరువుతో పిల్లలు పుడుతున్నారు.

ఆరోగ్యకరమైన శిశువు పుట్టినప్పుడు 2.5 నుంచి 4 కేజీల బరువు ఉంటుంది. భారతీయుల విషయానికి వస్తే గరిష్ట బరువు 3.5 కేజీలు. ఐదవ నెల నిండేసరికి పిల్లలు... పుట్టిన నాటికి ఉన్న బరువుకు రెండింతలు అవుతారు. ఏడాది నిండేసరికి మూడింతలవుతారు. మొదటి నెల నుంచి మూడవ నెల వరకు సరాసరిన నెలకు 800 గ్రాముల నుంచి కేజీ వరకు బరువు పెరుగుతారు. ఏడు నుంచి పన్నెండు నెలల వరకు నెలకు 250 గ్రాముల చొప్పున పెరుగుతారు. ఏడాది దాటినప్పటి నుంచి యౌవన దశ (14-15 ఏళ్లు) వచ్చేవరకు ఏడాదికి సరాసరిన ఒకటిన్నర నుంచి రెండు కిలోల బరువు పెరుగుతారు.

సాధారణ పురోగతి ఇలా...
6-8 వారాల వయసులో పలకరింపుగా నవ్వడం, ‘ఊ'కొట్టడం
మూడు నెలల వయసులో మెడ నిలపడం
నాలుగైదు నెలలకు బోర్లా పడడం, పాకడం
ఆరు-ఏడు నెలలకు కూర్చోవడం, తొమ్మిది నెలలకు ఎవరి సహాయం లేకుండా సొంతంగా కూర్చోవడం
పది నెలలకు దేనినైనా పట్టుకుని సొంతంగా లేచి నిలబడడం, ఏదో ఒకటి పలకడం
12-13 నెలలకు సొంతంగా అడుగులు వేయడం, చెప్పాలనుకున్న పదాలు పలకడం.