హానిలేని గర్భ నిరోధక సాధనం....కుంకుడు కాయ!

Basics

oi-Nageswara

By B N Sharma

Published: Saturday, June 30, 2012, 16:14 [IST]

జంటలు రతికార్యం చేయాలంటే గర్భం వస్తుందని భయపడుతూంటారు. అందుకుగాను జంటలు ముందుగా కొన్ని జాగ్రత్తలు పాటించాలి.

అసలు అన్నిటికంటే ముందు, బిడ్డకు జన్మనిచ్చేటందుకు మీ ఆరోగ్యాలు ఎలా వున్నాయనేది చెక్ చేసుకోవాలి. ప్రత్యేకించి తల్లిగా సమర్ధవంతంగా తన పాత్రను పోషించే అవకాశం ఆమెకు వుండాలి. అందుకుగాను అవసరమైన వైద్యపరీక్షలు వంటివి చేయించుకోవాలి. అదే విధంగా బిడ్డకు జన్మనివ్వటంలో సమయం, సందర్భం మొదలగు విషయాలలో జంటలు ఒకే అవగాహనకు రావాలి.

కుటుంబ సహకారం - నేటి రోజుల్లో, జంటలు ఏ బాదరబందీ లేకుండా తామిద్దరూ మాత్రమే వేరుగా వుండాలని కోరుతున్నారు. ఈ పరిస్ధితిలో ఆమె గర్భవతి అయితే, తనంతతాను ఆరోగ్య పరిరక్షణ చేసుకోగలదా? బిడ్డ పుడితే ఆ బిడ్డను జాగ్రత్తగా పెంచగలదా వంటి అంశాలను పరిశీలించాలి. తల్లి తండ్రులవ్వాలనుకునే జంటలకు తమ కుటుంబ సహకారం ఎంతో ప్రధానం. గర్భవతి అయ్యే మహిళ ఎన్నో రకాల మనో భావనలకు గురవుతూంటుంది. అటువంటపుడు ఆమె తల్లి లేక అత్తల సహకారం అత్యవసరమవుతుంది.

ఆర్ధిక పరిస్ధితి - కుటుంబంలోకి బేబీ రాకతో ఆర్ధిక పరిస్ధితి మారుతుంది. మీ ఆర్ధిక పరిస్ధితి ఒక్కసారి సమీక్షించండి. మీ మధ్య ఆర్ధికపర అభిప్రాయ బేధాలు లేకుండా కొనసాగండి. ఈ అంశం నిర్లక్ష్యం చేస్తే అది మీ మధ్య విభేధాలు పెంచే అవకాశం వుంది.

ఈ రకమైన అంశాలను సమన్వయించుకోవటంలో జంటలు ఎన్నో రకాల గర్భ నిరోధక సాధనాలు, మాత్రలు వంటివి వాడుతూంటారు. అయితే ఇటీవల సహజసిద్ధమైన గర్భనిరోధక సాధనంగా కుంకుడు కాయల లేపనం కనుగొనబడింది. గర్భనిరోధ మాత్రలు ముఖ్యంగా హార్మోన్ లకు సంబంధించినవిగా ఉంటాయి. మహిళ గర్భం ధరించాలంటే, అండోత్సర్గం కావాలి. అయితే ఆమెలో అండం ఎపుడు విడుదలయ్యేదీ సరిగ్గా తెలియకపోయినప్పటికి ఈ లేపనాన్ని ప్రతిరోజు యోనిలోపలిభాగంలో రాయటం అనేది చేస్తే, అండం విడుదలైనప్పటికి అందుకు తగిన అనువైన పరిస్ధితులు లేని కారణంగా అది నిర్వీర్యమైపోతుందంటారు నిపుణులు.

తాజాగా చేసిన ఒక పరిశోధనలో కుంకుడుతో చేసిన గర్భనిరోధక లేపనంమంచి ఫలితాలనిస్తున్నట్లు తేలింది. కుంకుడు కాయ శిరోజాలను కాపాడటమే కాదు గర్భనిరోధక సాధకంగానూ ఉపయోగపడుతుందని తేలింది. లక్నోలోని కేంద్ర ఔషధ పరిశోధన సంస్థ (సీడీఆర్ఐ) శాస్త్రవేత్తలు కుంకుడు కాయ నుంచి గర్భనిరోధక లేపనం తయారుచేశారు. దేశీయ కుంకుడుగింజలతో తయారు చేసిన ఈ లేపనం గర్భ రిరోధక సాధనంగా అమోఘంగా పని చేయగలదని భావిస్తున్నారు.

ఈ లేపనానికి 'కాన్‌సాప్' అనే పేరు పెట్టారు. ఈ పూతను యోని లోపలి భాగంలో పూసుకుంటే గర్భనిరోధక సాధనంగా పనిచేస్తుంది. అంతేకాదు... యోని లోపలి భాగంలోని చెడు బ్యాక్టీరియా, ఇతర ఇన్‌ఫెక్షన్‌లను కూడా తొలగిస్తుంది. మంచి బ్యా క్టీరియాను మాత్రం కాపాడుతుంది. ఈ రకంగా మహిళ జననాంగ భాగాల ఆరోగ్యాన్ని కూడా సంరక్షించుకోవచ్చు.