బయటి ప్రపంచంలో మొదటి అడుగు!

By B N Sharma

Published: Monday, December 12, 2011, 10:33 [IST]

పిల్లాడు మొదటి రోజు స్కూలుకు వెళుతున్నాడంటే ఒక పెద్ద యుద్ధం జరగాల్సిందే. పిల్లాడు ఎన్నో మాయలు చేస్తాడు. వ్యతిరేకత చూపుతాడు. దీనికి కారణం, మూడు సంవత్సరాలనుండి మీ ఒడిలో పెరుగుతూ మొదటి సారి వాడు ఇంటినుండి విడివడి అధిక సమయం గడపటానికి బయటకు వెళ్ళటం. తప్పదు, పిల్లాడికి బయట ప్రపంచం అలవాటు చేయాల్సిందే. దానిలో భాగమే స్కూలుకు పంపటం. పిల్లాడు తేలికగా స్కూలుకు అలవాటు పడేందుకు కొన్ని మార్గాలు చూడండి. మీరు వాడిని మాయమాటలు చెప్పి స్కలు లోపల వదిలేయటం వంటివి చేయకండి. అది ఒక చేదు అనుభవంగా వాడికి మిగిలిపోతుంది. వాస్తవాలు చెప్పి వాడి మనసును అందుకు తయారు చేయండి.

అతి పెద్ద మార్పు - పిల్లాడు స్కూలుకు వెళ్ళటం మొదలు పెట్టాడంటే అది వాడి జీవితంలో అతిపెద్ద మార్పుకు నాందిగా భావించండి. స్కూలుతో మొదలైన విద్య, యూనివర్శిటీల వరకు కూడా కొనసాగుతుంది. ఈ పరిణామాన్ని పిల్లాడికి అర్ధమయ్యే భాషలో తెలియపరచాలి. పిల్లాడిని స్కూలులో దిగబెట్టే ముందు, ఒక్క సారి మీ చిన్నప్పటి సంగతి గుర్తు చేసుకుని వాడికి అతిమెల్లగా స్కూలు అలవాటు చేయండి.

అయితే, ఎట్టిపరిస్ధితులలోను వాడు చేప్పే మాయమాటలకు లోబడిపోయి స్కూలు మానిపించటం వంటివి చేయవద్దు. మీరు గట్టిగా నిర్ణయం చేసుకొని వాడి భవిష్యత్తు బాగు కొరకై పాటుపడాలి. స్కూలుకు వెళితే అనేక లాభాలుంటాయిని వానికి తెలుపండి. ఎంతోమంది స్నేహితులు, చక్కటి దుస్తులు, ఆసక్తి కరమైన బొమ్మల పుస్తకాలు మొదలైనవి కొత్త విషయాలను తెలుపుతాయని వివరించండి. ఇక వాడికి మరికొన్ని ఆకర్షణలుగా, చాక్లెట్ లు, ఇతర తిండి పదార్ధాలవంటివి వుండనే వుంటాయి.