పిల్లలు మిమ్మల్ని ఇష్టపడాలంటే......!

Kids

oi-Nageswara

By B N Sharma

Published: Monday, October 3, 2011, 15:30 [IST]

తల్లి తండ్రులుగా మీరు పిల్లలకు ఒక మార్గదర్శకులుగా, మంచిని చెప్పేవారుగా వుండాలి. రాబోయే తరమైన మీ పిల్లలు, పాత తరం అంటే మీరు - మీతో సఖ్యతగా మెలిగేలా వుండాలి. ఆలోచనలు వారికి మీకు మ్యాచ్ అవాలి. ఎదిగే పిల్లల అవసరాలపట్ల అవగాహన, తగిన జాగ్రత్తలు మీ విధులలో ప్రాధాన్యత కలిగి వుండాలి. ఇదంతా పిల్లలతో మీకుగల మంచి సంబంధాలున్నపుడే సాధ్యం అవుతుంది. మీ పిల్లల హృదయాలను దోచుకోడం ఎలా? వారితో సఖ్యత పొందటం ఎలా అనేది పరిశీలిద్దాం!

1. మీ బిడ్డ ఎలా వున్నప్పటికి, అతనిని మాటలతో లేదా చేతలతో శిక్షించకండి. ప్రేమగా, శ్రధ్ధగా సలహాలు ఇవ్వాలి. మీకు గల భావాలు వారిని తిట్టటంతో కాకుండా అతి జాగ్రత్తగా తెలియజెప్పాలి. పిల్లలు పెద్దవారయ్యే కొద్ది తల్లితండ్రులు చూపే ప్రేమ, జాగ్రత్తలు వారిని మరింత ఆకట్టుకుంటాయి. ఈ రకంగా వారి మనసులు గెలవటం తేలిక, మంచిది కూడాను.

2. మనమందరం మానవులమే కనుక, తప్పులు దొర్లుతూంటాయి. మీరు చిన్నపుడు పొందిన చేదు అనుభవాలను వారికి వివరిస్తూ వారిలో విశ్వాసం నింపండి. అవసరపడినపుడు సలహానివ్వండి. ఎప్పుడూ సలహాలిస్తుంటే వారు పెడచెవిని పెట్టే ప్రమాదముంది. గతంలో వారు చేసిన తప్పులను గుర్తు చేయటం, ఫిర్యాదుగా చేయటం సరైంది కాదు. ఇలా చేస్తే వారు మరింత మొండిగాను, కోపంగాను తయారయ్యే అవకాశాలున్నాయి.

3. అతని అవసరానికి వారి వెనుక అండగా వుండండి. స్నేహితులుగా వుండండి. ఎన్నో కష్టనష్టాలను చూసిన మీరు వారికి స్నేహితులుగా మద్దతునివ్వాలి. వారిని ప్రోత్సహించండి. మంచి పని చేస్తే ప్రశంసించండి. అది వారిలో ఉత్సాహాన్ని నింపుతుంది. అంతేకాక, మీ సంబంధాలు వారికి స్ఫూర్తినిస్తాయి.

4. బహుమతులతో మీ బాబు హృదయాన్ని గెలుచుకోండి. ఆశ్చర్యంగా వారికవసరమైన వస్తువులు బహుమానంగా ఇస్తే, వారు చాలా సంతోషంగా వుంటారు. సంబంధాలు తేలికగా వుంటే, దొంగిలించటం, అబ్ద్ధమాడటం, లేదా రహస్యంగా వుండటం వంటివి పిల్లలలో వుండవు.

5. మంచి ఆహారాన్ని అందించటంతో పిల్లలను ఆకర్షించవచ్చు. వారికిష్టమైన ఆహారాలను వారాంతంలో లేదా వారి పుట్టిన రోజునాడు చేసిస్తే లేదా మార్కెట్ నుండి తెప్పించి ఇస్తే, తల్లితండ్రులతో వారు ఎంతో హృదయపూర్వకంగా ప్రవర్తిస్తారు. రుచికరమైన తిండ్లు వారిని మానసికంగాను, శారీరకంగాను మీకు దగ్గర చేస్తాయి.

గతంలో మీరు ఎదుర్కొన్న కష్ట దశలు, చేసిన కష్టమైన పనులు మొదలైనవి వివరిస్తూ వుంటే వారు భవిష్యత్తులో మంచి వ్యక్తిత్వం కలవారుగా కూడా తయారవుతారు. పిల్లలను అతి జాగ్రత్తగా ప్రేమతో పోషించాలి. విలువలు వారిలో నాటాలి. ఇవే మీరంటే వారు జీవితాంతం గుర్తుపెట్టుకొని ఇష్టపడే దానికి మంత్రాలు.