కంటికింపైతే....తినటం తేలికే!

వాషింగ్టన్: మీ పిల్లాడు తిండి తినటానికి విసిగిస్తున్నాడా? ఏది పెట్టినా వద్దంటాడా? ఇటువంటి పిల్లలకు ఆహారం ఎలా తినిపించాలనేది అమెరికాలోని కార్నెల్ యూనివర్శిటీ పరిశోధకులు తీవ్రంగా పరిశోధించారు. పెద్దవారికంటే కూడా పిల్లలకు రంగులంటే మహా ఇష్టంట. ఒకే ప్లేటులో కనుక రంగురంగుల ఆహారాలు కంటికింపుగా కనపడుతూంటే, పిల్లాడు పెద్దల చేతులలోని ప్లేట్ బలవంతంగా లాగేసుకుని మరీ తినేస్తాడంటున్నారు.

ప్రత్యేకించి ఆహారం ప్లేటులో ఏడు రకాల ఆహార పదార్ధాలు ఆరు వివిధ రంగులలో వుండాలట. ఇలా వుంటే పిల్లలు ఖచ్చితంగా ఎక్కువ మొత్తం లోనే లాగిచ్చేస్తారట. ఈ పరిశోధన 23 మంది పిల్లల పైనా 46 మంది పెద్దలపైనా చేశారు. పెద్దల తో పోలిస్తే పిల్లలు అతి త్వరగా వివిధ రంగులు, రుచులు వున్న ఆహారాలు తినేయటం మొదలెట్టారట. మరి పిల్లలకొరకంటూ ప్రతిరోజూ ఇన్ని ఐటమ్ లు తయారు చేసి అందరికి తినిపించేస్తే, పెద్దలు, పిల్లలు కలసి ఆపై డైటింగ్ కూడా మొదలుపెట్టాలేమో?

పెద్దలకైనా, పిల్లలకైనా, తినే ఆహారానికి రుచి, వాసన, రంగులు ప్రాధాన్యత వహిస్తాయని అంతేకాక, వాటి సైజు ఆకారాలు కూడా పరిగణలోకి తీసుకోవాలని రీసెర్చి టీముకు నేతృత్వం వహించిన ప్రొఫెసర్ కెవిన్ నిఫిన్ తెలిపారు. ఈ అంశాన్ని 'ఎక్టా పెడియాట్రికా ' అనే జర్నల్ ప్రచురించింది.