కుటుంబం కలహిస్తే...పిల్లలు నేర్చుకుంటారు!

Kids

oi-Nageswara

By B N Sharma

Published: Tuesday, April 10, 2012, 10:03 [IST]

సాధారణంగా కుటుంబాలలో తల్లితండ్రులు కలహించుకుంటూనే వుంటారు. అంశం చిన్నదైనా, పెద్దదైనా, ఇంటిలో వచ్చే తగవులు ఒక రోజులో పరిష్కారం కావు. రోజుల తరబడి వారు కలహించుకోవడం చూసిన పిల్లలు సైతం వారి ప్రవర్తనా తీరు మార్చుకుంటారు. ప్రతి అంశానికి పిల్లలు కూడా తమ దౌర్జన్యం చూపి సాధించుకుంటారు. కలహాలు చేసే పిల్లలు ఆ స్వభావాన్ని కుటుంబంలో వారి పెద్దలనుండి నేర్చుకుంటారు. తల్లితండ్రులు తరచుగా కలహిస్తూ వుంటే, పిల్లలు కూడా దౌర్జన్యపరులవుతారని ప్రఖ్యాత సైకాలజిస్టు అరన్ జాజు బెల్లిడో తెలుపుతున్నారు. ఈ అంశంపై ఈమె తాజాగా ఒక పరిశోధన నిర్వహించారు.

బిడ్డప్రవర్తనకు కుటుంబంలోని పరిస్ధితికి నేరుగా సంబంధం వుంది. ఈ అంశంపై రీసెర్చరు సుమారు 251 కుటుంబాలనుండి పిల్లల ప్రవర్తన పరిశీలించారు. పిల్లల కుటుంబ సభ్యులు, స్నేహితులు, స్కూల్ స్నేహితులుమొదలైనవారిని సర్వేలో ప్రశ్నించారు. వీరిలో 15 మంది పిల్లలు పోట్లాటలు పెట్టుకునే స్వభావంగాను మరో ఇద్దరు మరింత తీవ్ర కొట్లాటలు పెట్టుకునేవారిలాగాను కనుగొనబడ్డారు. ఈ పిల్లల కుటుంబ చరిత్రలు పరిశీలిస్తే కుటుంబ కలహాల కారణంగా పిల్లలు ఈ రకమైన కలహాలు చేస్తున్నట్లు తేలింది.

కలహించే కుటుంబాలలో పిల్లలు ఉండటానికి ఇష్టం చూపకపోవటం, అయిష్టంతో తాము కూడా మొండివారిగా తయారవటం, కనపడిన వారితో పోట్లాటలు అకారణంగా పెట్టుకోవడం వంటివి చేస్తున్నారట. పెద్దలు చేసే ఈ కలహాల వలన వారి విద్యా ప్రగతి కూడా కుంటుపడుతోందట. విద్యలేని పిల్లలు మొండివారుగా తయారవుతున్నారు. సమాజం పట్ల కూడా వారు ఇదే తీరు ప్రవర్తిస్తున్నారు. వీరి స్నేహితులుపై సైతం జగడాలమారి పిల్లల ప్రభావం బాగా వుంటోందని కూడా రీసెర్చర్లు తెలుపుతున్నారు.

దీనికి పరిష్కారంగా పెద్దలు తమ మధ్య భేధాభిప్రాయాలున్నప్పటికి వాటిని పిల్లలముందు ప్రదర్శించరాదు. పిల్లలకు ప్రవర్తనా సమస్యలు తేలికగా అలవడతాయి. వారెంతసేపూ పెద్దలను అనుకరిస్తూంటారు. పెద్దలు సరళంగా వుంటే వారు సరళప్రవర్తన నేర్చుకోవడం. పెద్దలు కలహించుకునేవారైతే అదే రీతిలో పిల్లలు కూడా కలహించటం చేస్తారు. పెద్దలు పిల్లలకు అన్ని రకాలుగా ఆదర్శంగా వుండాలి. నేటి పిల్లలే, రేపటి పౌరులు. పిల్లలుగా వున్నపుడే, కలహించేవారైతే, పెద్దవారయి కూడా వారు సమాజంలో చెడుపేరు తెచ్చుకుంటూ, సమస్యలు తెచ్చుకుంటారు. కనుక పిల్లల తల్లితండ్రులు, వారి పిల్లల ముందర ఏ రకమైన వివాదాలు, లేదా పోట్లాటలు జరుగకుండా చూసుకోవాలి. తల్లి లేదా తండ్రి తమ పిల్లలకు సరైన రీతిలో పనులు కేటాయించకపోవడం కూడా వీరి కలహాలకు కారణమవుతోందని రీసెర్చర్లు తెలపుతున్నారు.