పిల్లలలో ఏకాగ్రత పెంచే ఆటలు!

పిల్లల ఏకాగ్రతకు కొన్ని ఆటలు -
నన్ను గుర్తు పట్టు? ఈ ఆటలో టేబుల్ పై కొన్ని వస్తువులు పెట్టాలి. పిల్లాడు సరిగ్గా 30 సెకండ్లు వాటిని పరిశీలించాలి. టేబుల్ కనపడకుండా దాచేయండి. ఒక నిమిషం తర్వాత మీ పిల్లాడిని టేబుల్పై పెట్టిన వస్తువులను తీసుకురమ్మని చెప్పండి. అతను ఎంత బాగా గుర్తుపెట్టుకుంటాడో చూడండి. ఈ ఆటను కొన్ని మాటలతో కూడా ఆడవచ్చు.

మిస్ అయిన నెంబర్ పట్టుకో - ఒకటి నుండి 10 లెక్కించండి. లెక్కించేటపుడు ఒక నంబర్ మీరు మిస్ చేయండి. పిల్లాడు గమనించాడా లేదా చూడండి. మీరు వదిలివేసిన నెంబర్ తెలుపమని పిల్లాడిని కోరండి.

రీకాల్ - పిల్లాడి జ్ఞాపక శక్తి పెంచటానికి ఈ ఆట బాగుంటుంది. రోజు చివరలో ఆరోజంతా అతడు ఏ ఏ పనులు చేశాడనేది తెలుపమనండి. కష్టపడి గుర్తుతెచ్చుకుంటూ అన్నీ చెపుతాడు. మీరు ఒక కధ వినిపించండి. అందులోనుండి కొన్ని ప్రశ్నలు వేసి సమాధానాలు చెప్పమనండి. అన్నీ కరెక్ట్ గా వుంటే, చాక్లెట్ బహుమానం ఇవ్వండి. ఇది అతడిని ఎంతో ప్రోత్సహిస్తుంది.

పజిల్స్ - పిల్లలు పజిల్స్ ఆడేందుకు ఇష్టపడతారు. వారాంతంలో మీ పిల్లాడితో పజిల్స్ ఆడండి. మీరు కొద్ది ఆసక్తి చూపితే, పిల్లాడు మరింత ఆసక్తిగా ఈ ఆటలకు ముందుకు వస్తాడు.