ఇంట్లో పిల్లలు చదవాలంటే!

ముందుగా వారి చదువుకుగాను ఒక ప్రత్యేక గదిని కేటాయించండి. ఆ గదిలో ఫోన్లు, టెలివిజన్లు, ఆహార పదార్ధాలు, లేదా కంప్యూటర్లు, ఆటలకు సంబంధించిన ఇతర వస్తువులు వంటివి లేకుండా చూడండి. ఈ వస్తువులన్ని వారి చదువుకు ఆటంకం కలిగిస్తాయి. గోడకు ఒక వైట్ బోర్డు తగిలించండి. ఆరోజు వారు చదవాల్సినవి, వ్రాయాల్సినవి అందులో రాయండి. స్కూలుకు అవసరమైన చదువు, ఇంటిలో ప్రత్యేకంగా వారు నేర్చుకొనే కొత్త విషయాలు విడి విడిగా వ్రాయండి. వారికి సౌకర్యమైన ఒక కుర్చీ, గట్టి టేబుల్ ఇవ్వండి. దీనితో వారి మైండ్ లో ఆనందంగా చదవాలనే కోర్కె పుడుతుంది.

పిల్లల వయసుకు తగిన చదువుకునే వస్తువులే వారికి అందించాలి. మీ బాబు లేదా పాపకు రోజూ ఒకటి లేదా రెండు గంటలు బోధన చేయటానికి గాను ఇంటివద్దే ఒక మంచి అనుభవజ్ఞుడైన బోధకుడిని నియామకం చేయండి. దీనితో మీరు పిల్లలకు సమయం కేటాయించకపోయినప్పటికి వారికి ఇంటిలో మంచి శిక్షణ లభిస్తుంది. వారు నేర్చుకోవలసిన అంశాలపై పుస్తకాలు, లేదా ఇంటర్నెట్ సాధనాలవంటివి వారికి అందుబాటులో వుంచండి. అన్నిటిని మించి ప్రతిరోజూ వారికి చదువుకునేందుకు ఒక సమయాన్ని నిర్ణయించి వారు దానిని ఆచరించేలా పర్యవేక్షించండి.