పిల్లలకొచ్చే వ్యాధులు ...వాటికి జాగ్రత్తలు!

By B N Sharma

Published: Sunday, April 15, 2012, 11:08 [IST]

సాధారణంగా చిన్న వయసులో పిల్లలకు అనేక వ్యాధులు తేలికగా వచ్చేస్తాయి. దానికి కారణం వారి శరీరాలకు వ్యాధి నిరోధకత పూర్తిగా లభించకపోవటం, మరియు వారు ఆటపాటల పేరుతో అతి త్వరగా అనారోగ్యకర వాతావరణానికి గురిగావటం అని చెప్పాలి. పిల్లలలో ప్రత్యేకించి శ్వాస సంబంధిత వ్యాధులు వస్తూంటాయి. రెస్పిరేటరీ సింక్ టీటియల్ వైరస్ లేదా ఆర్ ఎస్ వి అనే వైరస్ పిల్లలలో జలుబు, న్యూమోనియా వంటివి కలిగిస్తుంది. న్యూమోనియా కారణంగా ప్రపంచ వ్యాప్తంగా ఏటా షుమారు రెండువందల వేలమంది పిల్లలు మరణిస్తున్నట్లు ఎడిన్ బర్గ్ యూనివర్శిటీ రీసెర్చర్లు వెల్లడిస్తున్నారు.

ఆర్ ఎస్ వి క్రిమి చాలావరకు రెండు సంవత్సరాల లోపు పిల్లలకే సోకుతుంది. ముందుగా అది జలుబు వంటి లక్షణాలు కలిగిస్తుంది. ముందస్తుగా పుట్టిన పిల్లలకు లేదా గుండె వ్యాధులు కల పిల్లలకు అతి త్వరగా సోకుతుంది. పిల్లలలో వచ్చే ఊపిరితిత్తుల సమస్యలకు చాలావరకు ఈ క్రిమి కారణంగా వుంటుంది. ఒక సారి ఈ క్రిమి శరీరంలో చేరిందంటే, వ్యాధి నివారణ కొంచెం కష్టంగానే వుంటుంది.

రీసెర్చర్లు నిర్వహించిన సర్వేలో షుమారు 3.4 మిలియన్ మంది పిల్లలు ఈ వ్యాధికి గురై చికిత్స కొరకు ఆస్పత్రికి చేరటం జరుగుతోంది. ఒక మారు తగ్గినప్పటికి, పిల్లలలో ఈ వ్యాధి మరోమారు లేదా తరచుగా కూడా వచ్చే అవకాశాలుంటాయని రీసెర్చర్లు వెల్లడించారు. వ్యాధి నివారణకు గాను పిల్లలను వీలైనంతవరకు చలి వాతావరణానికి గురిచేయరాదు. సాధారణంగా ఈ వ్యాధి వర్షాకాలం లేదా చలికాలాలలో అధికంగా వస్తుంది. ఆ సమయంలో పిల్లలను వీలైనంతవరకు వెచ్చటి గుడ్డలలో వుంచటం, లేదా వెచ్చని దుస్తులు ధరింప చేయటం వంటివి చేయాలి. పాలు పట్టే తల్లులైతే వారు కూడా తగిన జాగ్రత్తలు తీసుకోవాలి.

ఏ మాత్రం అజాగ్రత్తగా వున్నా ఈ క్రి మి ఆహార పదార్ధాలద్వారా లేదా గాలి ద్వారా, నీటిద్వారా సోకే ప్రమాదం వుంది. అందుకని తల్లి తినే ఆహార పదార్ధాలు కూడా ఎప్పటికపుడు వేడిచేసినవై వుండాలి. తాగే నీరు సైతం గోరు వెచ్చగా వుండి హాని కలిగించనిదై వుండాలి. బిడ్డకు ఈ సమయంలో పట్టే బాటిల్ పాలు ఎప్పటికపుడు వేడిగా లేదా గోరు వెచ్చగా వుండేలా జాగ్రత్తతీసుకోవాలి. వ్యాధి ముదరకముందే, వైద్యులను సంప్రదించి మందులు వాడాలి.