తగవుల పిల్లలు - చెడు అలవాట్లు!

By B N Sharma

Published: Sunday, March 18, 2012, 11:37 [IST]

హైస్కూలు విద్యార్ధులై వుండి తరచుగా తమ తరగతి విద్యార్ధులతో పొట్లాటలు పెట్టుకుంటున్నారా? అలాగయితే, వీరు సిగరెట్లు తాగడం, మందుకొట్టడం, హుక్కా పీల్చడం వంటి చెడు అలవాట్లకు లోనయ్యేప్రమాదం వుందంటున్నారు కొంతమంది పరిశోధకులు. తగవులు పెట్టుకొనే విద్యార్ధులే కాక, వాటి ప్రభావాన్ని అనుభవంచే విద్యార్ధులు సైతం చెడు అలవాట్లకు లోనవుతారట. ఒక చెడు సంఘటన జరిగితే, దానికి సంబంధించి మరో చెడు జరుగుతుందంటున్నారు స్టడీ నిర్వహించిన ఓహియో స్టేట్ యూనివర్శిటీ సైకాలజీ స్కూల్ అసిస్టెంట్ ప్రొఫెసర్ కిష ర్యాడ్ లిఫ్.

ఉదాహరణకు ఇతర విద్యార్ధులతో పోట్లాటలు సాగించేవారు ఏదైనా పదార్ధాల ఉపయోగానికి కూడా ఆసక్తి చూపుతారు. ఇదే అంశాన్ని రివర్స్ లో చెప్పాలంటే...చెడు పదార్ధాల అలవాట్లకు బానిసైనవారు పోట్లాటలు సాగిస్తారు. ఈ స్టడీలో షుమారు 74,247 మంది విద్యార్ధులను వీరు పరిశీలించారు. షుమారు 152 ప్రశ్నలను సర్వేలో వేసి జవాబులు రాబట్టారు. అబద్ధాలు చెప్పడం, పుకార్లు రేపటం తోటి విద్యార్ధులపై హింసాత్మక ధోరణి వంటివి కూడా వీరు పరిశీలించి, ఈ రకమైన చేష్టల విద్యార్ధులు భవిష్యత్తులో మత్తుమందులకు బానిసలవుతారని తెలిపారు.

వీరు సర్వే చేసిన విద్యార్ధులలో 5 శాతంమందికి అప్పటికే సిగరెట్లు, ఆల్కహాల్ వంటి అలవాట్లున్న్నట్లు కనుగొన్నారు. హైస్కూలు విద్యార్ధులలో 32 శాతం ఆల్కహాల్ తాగుతున్నట్లు తెలుపగా, 14 శాతం సిగరెట్లు, 16 శాతం ఇతర మత్తు పదార్ధాలు సేవిస్తున్నట్లు తెలిపారు.