బిడ్డ పుడితే భాధ్యతలు డిప్రెషన్ కలిగిస్తాయా?

By B N Sharma

Published: Friday, January 20, 2012, 14:50 [IST]

మీరు ఇటీవలే బిడ్డకు జన్మనిచ్చినట్లయితే, అంతులేని ఆనందం, భయం, ఆందోళన ఎన్నో వుంటాయి. కొంతమందికి అధికమైన ఈ భావాలు డిప్రెషన్ తెప్పిస్తాయి. సాధారణంగా దీనిని ప్రసవానంతర మనోవేదనగా గుర్తిస్తారు. ఈ డిప్రెషన్ కు కాణం మీకు కొత్తగా ఏర్పడే భాద్యతలు, నిద్ర లేకపోవడం లేదా మీ పైనా, మీ భాగస్వామిపైనా శ్రధ్ధ లేకపోవడంగా చెప్పాలి. అయితే, కుటుంబ సభ్యులు, స్నేహితులు సహకారంతో గతంలోని ఆనందాన్ని మీరు మరోమారు పొందవచ్చు. మాతృత్వాన్ని పూర్తిగా అనుభవించవచ్చు.

ఈ దశలో శారీరక, మానసిక మార్పులు మీలో ఎన్నో కలుగుతాయి. బిడ్డ పుట్టిన వెంటనే హార్మోన్లలో మార్పులు కలుగుతాయి. అవి మీ మూడ్ ను మార్చివేస్తూంటాయి. శారీరక రూపం లో సమస్యలేర్పడతాయి. బిడ్డ పుట్టిన తర్వాత కుటుంబ సభ్యులలో వచ్చే తీరు తెన్నులు కూడా కొంత ఒత్తిడి కలిగిస్తాయి. అయితే. మహిళలు, ప్రసవానంతరం కొంత మనోవేదన వుంటుందని గ్రహించాలి. ఈ డిప్రెషన్ మూడ్ స్ధాయిలలో వుంటుంది.

మొదటి స్దాయి డిప్రెషన్ లో మూడ్ లో తరచుగా మార్పులు వస్తూంటాయి. ఆనందం, విచారం, ఆందోళన, చికాకు వంటివి కలుగుతాయి. ఈ లక్షణాలు బిడ్డ పుట్టిన మూడో రోజునుండి అయిదవ రోజువరకు కొనసాగుతాయి. ఆమె తన శరీరాన్ని బేబీని కూడా సరిగా చూసుకోలేదు. శ్రధ్ధ పెట్టలేకపోతున్నానన్న భావన కూడా వుంటుంది. నిద్రాభంగం, ఆకలి, బిడ్డపై శ్రధ్ధ. కొంతమంది తాము ఏం చేయాలో తెలియక ఆత్మ హత్యకు కూడా పాల్పడేవారున్నారు. ఈ సమయంలో కుటుంబ సభ్యులు అన్ని రకాల సౌకర్యాలతో, మంచి మాటలతో ఆమెకు ఊరట కల్గించాలి. ఆమె ఎలా ప్రవర్తించాలో తెలుపుతూ వుండాలి. భాగస్వామి కూడా తగిన విధంగా ఆమె భాధ్యతలు పంచుకోవాలి. అన్నిరకాలుగా ఆమెకు అండగా వుంటే మహిళ త్వరలో కోలుకొనే అవకాశాలుంటాయి.