చలికాలం స్పెషల్ ఊరగాయ..రుచిలో అమోఘం, ఆరోగ్యానికి అద్భుతం

చలికాలం వచ్చేసింది. ఇలాంటి ఆహ్లాదకరమైన వాతావరణంలో వేడివేడిగా ఏదైనా తినాలని మనసు లాగుతూ ఉంటుంది. వేడి అన్నంలో కాస్త నెయ్యి, ఓ ముద్ద పప్పు వేసుకుని తింటున్నప్పుడు, దానికి తోడుగా ఘాటుగా, కారంగా ఏదైనా నంజుకుంటే ఆ అనుభూతే వేరు. అలాంటి సందర్భాల కోసమే పుట్టింది ముల్లంగి ఊరగాయ.

సాధారణంగా ముల్లంగి అంటే చాలామంది ముఖం చిట్లిస్తారు, కానీ దానితో చేసే ఈ ఊరగాయ రుచి చూస్తే మాత్రం మళ్లీ మళ్లీ కావాలంటారు. దీని ప్రత్యేకత ఏంటంటే ఇది కేవలం రుచికి మాత్రమే కాదు, మారుతున్న వాతావరణంలో ఆరోగ్యానికి కూడా మేలు చేస్తుంది. అన్నం, సాంబార్, చపాతీ, వేడి వేడి పరాఠా..దేనితో తిన్నా దీని రుచి అమోఘం. ఈ అద్భుతమైన ఊరగాయను ఎలా తయారు చేసుకోవాలో ఇక్కడ చూడండి.

కావలసిన పదార్థాలు
తాజా ముల్లంగి - అర కిలో
పచ్చిమిర్చి - 4-5
ఆవ నూనె - 1 కప్పు
ఉప్పు - రుచికి సరిపడా
కారం పొడి - 2 టేబుల్ స్పూన్లు
పసుపు - 1 టేబుల్ స్పూన్
ఆవపిండి - 2 టేబుల్ స్పూన్లు
సోంపు పొడి - 1 టేబుల్ స్పూన్
మెంతుల పొడి - 1 టేబుల్ స్పూన్
ఇంగువ - చిటికెడు

తయారీ విధానం

-ముందుగా తాజా ముల్లంగిని శుభ్రంగా కడిగి చెక్కు తీయండి. వాటిని పొడవుగా, సన్నని ముక్కలుగా కోసుకోండి. ఈ ముక్కలను ఒక శుభ్రమైన పల్చటి గుడ్డపై పరిచి 3 నుంచి 4 గంటల పాటు ఎండలో ఆరబెట్టాలి. దీనివల్ల ముక్కల్లోని అదనపు తేమ పోయి ఊరగాయ ఎక్కువ కాలం నిల్వ ఉంటుంది. ముక్కలు పూర్తిగా ఎండిపోకుండా, కొద్దిగా తేమగా ఉండగానే తీయడం ముఖ్యం.

-ఇప్పుడు ఒక పెద్ద గిన్నెలో కారం, పసుపు, ఆవపిండి, సోంపు పొడి, మెంతుల పొడి, రుచికి సరిపడా ఉప్పు, చిటికెడు ఇంగువ వేసి బాగా కలపండి.

-తర్వాత స్టవ్ మీద ఒక బాండీ పెట్టి అందులో ఆవ నూనె పోసి పొగలు వచ్చేంత వరకు బాగా వేడి చేయండి. నూనె వేడయ్యాక స్టవ్ ఆఫ్ చేసి, కాస్త చల్లారనివ్వండి. నూనె గోరువెచ్చగా ఉన్నప్పుడు వాడాలి.

-ముందుగా సిద్ధం చేసుకున్న మసాలా మిశ్రమంలో ఈ గోరువెచ్చని నూనె పోసి బాగా కలపండి. ఇప్పుడు ఎండబెట్టిన ముల్లంగి ముక్కలు, పొడవుగా చీల్చిన పచ్చిమిర్చిని కూడా వేసి మసాలా ప్రతి ముక్కకు పట్టేలా చేత్తో గానీ, గరిటెతో గానీ పూర్తిగా కలపాలి.

-అంతే ఘుమఘుమలాడే ముల్లంగి ఊరగాయ రెడీ. దీనిని గాలి చొరబడని శుభ్రమైన గాజు జాడీలోకి మార్చండి. ఈ జాడీని రెండు మూడు రోజుల పాటు ఎండలో ఉంచితే, మసాలాలు ముక్కలకు బాగా పట్టి ఊరగాయ రుచి రెట్టింపు అవుతుంది.