ఇడ్లీ, దోశ, అన్నం దేనిలోకైనా అదుర్స్..ఈ బీహార్ స్పెషల్ చట్నీ ఒక్కసారి రుచి చూస్తే అస్సలు వదలరు

మనం రోజూ తినే అన్నం, కూరలు ఒక్కోసారి బోర్ కొడుతుంటాయి. ఆ సమయంలో నోటికి ఏదైనా కొత్తగా, రుచిగా తగలాలనిపిస్తుంటది?అలాంటప్పుడు బీహార్ ఫేమస్ టీసీ చట్నీ ట్రై చేయండి. ఒక్క ముద్దలో ఈ చట్నీని కలుపుకుని తింటే, ఆహారపు రుచి పదిరెట్లు పెరుగుతుందంటే అతిశయోక్తి కాదు.

బీహార్ వాసులు టీసీ అని పిలిచే ఈ గింజలను మన తెలుగులో అవిసె గింజలు అంటాము. ఇందులో ఒమేగా-3 ఫ్యాటీ యాసిడ్లు, ఫైబర్ పుష్కలంగా ఉంటాయి. ముఖ్యంగా గుండె ఆరోగ్యానికి, బరువు తగ్గాలనుకునే వారికి ఇది బెస్ట్ ఆప్షన్. చలికాలంలో శరీరాన్ని వెచ్చగా ఉంచడానికి బీహార్ ప్రజలు ఈ చట్నీని ఔషధంలా భావించి మరీ తింటారు. బీహార్ ఫేమస్ అవిసె గింజల చట్నీని ఎలా తయారు చేసుకోవాలో ఇక్కడ చూడండి.

కావలసిన పదార్థాలు
అవిసె గింజలు - అర కప్పు
ఎండు కొబ్బరి తురుము - అర కప్పు
వేరుశెనగ గుళ్లు (పల్లీలు)- 4 టేబుల్ స్పూన్లు
కరివేపాకు - అర కప్పు
ధనియాలు - 1 టేబుల్ స్పూన్
జీలకర్ర - 2 టేబుల్ స్పూన్లు
ఎండుమిర్చి -5-6
తెల్ల నువ్వులు - 2 టేబుల్ స్పూన్లు
వెల్లుల్లి రెబ్బలు - 6
మిరియాలు - కొద్దిగా
ఉప్పు - రుచికి సరిపడా
ఇంగువ - చిటికెడు

తయారీ విధానం

-ముందుగా అవిసె గింజలను శుభ్రం చేసుకుని, అందులో రాళ్లు లేదా మట్టి లేకుండా చూసుకోవాలి.

-స్టవ్ వెలిగించి పాన్ పెట్టి, అవిసె గింజలను మీడియం మంటపై వేయించాలి. అవి చిటపటలాడుతూ, మంచి వాసన వచ్చే వరకు వేయించి పక్కన ప్లేట్‌ లో పెట్టుకోవాలి.

-అదే పాన్‌ లో కరివేపాకును వేసి, అందులోని తడి పోయి కరకరలాడే వరకు వేయించి పక్కన పెట్టుకోవాలి.

-ఇప్పుడు పాన్‌ లో ధనియాలు, జీలకర్ర, మిరియాలు, ఎండుమిర్చి వేసి దోరగా వేయించాలి. మంచి సువాసన వచ్చాక వీటిని కూడా ప్లేట్‌ లోకి తీసుకోవాలి.

-చివరగా అదే పాన్‌ లో ఎండు కొబ్బరి తురుము, వేరుశెనగ గుళ్లు, తెల్ల నువ్వులు, వెల్లుల్లి రెబ్బలు వేసి వేయించాలి. వెల్లుల్లి పచ్చి వాసన పోయి, మిశ్రమం లేత గోధుమ రంగులోకి వచ్చేవరకు వేయించి స్టవ్ ఆపేయాలి.

-వేయించిన పదార్థాలన్నీ పూర్తిగా చల్లారాక ఒక మిక్సీ జార్‌ లోకి తీసుకోవాలి. ఇందులో రుచికి సరిపడా నల్ల ఉప్పు, సాధారణ ఉప్పు, చిటికెడు ఇంగువ వేయాలి.

-ఈ మిశ్రమాన్ని మరీ మెత్తని పొడిలా కాకుండా, కాస్త బరకగా (ముతకగా) రుబ్బుకుంటే చట్నీ రుచి అద్భుతంగా ఉంటుంది.

-అంతే ఘుమఘుమలాడే బిహారీ స్టైల్ అవిసె గింజల చట్నీ రెడీ. దీనిని గాలి చొరబడని డబ్బాలో నిల్వ చేస్తే చాలా రోజులు ఫ్రెష్ గా ఉంటుంది. ఇడ్లీ, దోశ, చపాతీలకు కూడా ఇది అదిరిపోయే కాంబినేషన్.