మార్కెట్లో కొనే పనిలేదు.. 100% స్వచ్ఛమైన మామిడి పొడి తయారీ విధానం ఇదే

తీయటి పండ్లే కాదు, పుల్లటి పచ్చి మామిడికాయలంటే కూడా మనలో చాలా మందికి నోరూరిపోతుంది. పప్పు, పచ్చడి, కూరలు..ఇలా ఎందులోకైనా పచ్చి మామిడి వేస్తే ఆ రుచే వేరు. మరి ఈ పుల్లటి రుచిని కేవలం వేసవిలోనే కాకుండా, ఏడాది పొడవునా ఆస్వాదిస్తే ఎంత బాగుంటుందో. అందుకే బయట మార్కెట్లో దొరికే పొడుల కంటే, ఎంతో స్వచ్ఛంగా, సువాసనతో ఉండే ఆమ్చూర్(మామిడి పొడి) ని ఇంట్లోనే సులభంగా ఎలా తయారు చేసుకోవాలో ఇక్కడ చూడండి.

ఆమ్చూర్ పొడి తయారీ విధానం

-ఈ మామిడి పొడిని ఇంట్లో తయారు చేయడానికి ముందుగా మనం సరైన పచ్చి మామిడికాయలను ఎంచుకోవాలి. బాగా పుల్లగా ఉండేవి, లోపల పీచు పదార్థం తక్కువగా ఉండే కాయలైతే ఆమ్చూర్ తయారీకి చాలా అనువుగా ఉంటాయి.

-మీరు ఎంచుకున్న పచ్చి మామిడికాయలను నీళ్లలో వేసి శుభ్రంగా కడగాలి. వాటిపై ఉన్న జిగురు, మురికి పూర్తిగా పోయేలా చూసుకోవాలి. ఆ తర్వాత ఒక పొడి వస్త్రంతో తుడిచి, వాటిలో ఏమాత్రం తడి లేకుండా పూర్తిగా ఆరబెట్టాలి.

-మామిడికాయలు పూర్తిగా ఆరిన తర్వాత, పీలర్ సహాయంతో పైన ఉన్న ఆకుపచ్చని తొక్కను పూర్తిగా తీసేయాలి. ఇప్పుడు ఆ కాయలను కత్తిపీట లేదా చాకుతో వీలైనంత పలుచని ముక్కలుగా కోసుకోవాలి.

-ఒకవేళ మామిడికాయలను పలుచని ముక్కలుగా కోయడం మీకు ఇబ్బందిగా అనిపిస్తే, మీరు వాటిని తురుముకోవచ్చు కూడా. ఇక్కడ మీరు గుర్తుంచుకోవాల్సిన ముఖ్యమైన విషయం ఏమిటంటే.. ముక్కలు లేదా తురుము ఎంత పలుచగా ఉంటే, అవి అంత త్వరగా ఎండిపోయి, పొడి అంత నాణ్యతగా వస్తుంది.

-ఇప్పుడు బాగా ఎండ వచ్చే ప్రదేశాన్ని ఎంచుకుని, అక్కడ ఒక శుభ్రమైన కాటన్ వస్త్రాన్ని పరచండి. దానిపై మీరు ముందుగా సిద్ధం చేసుకున్న పలుచని మామిడి ముక్కలను లేదా తురుమును విడివిడిగా ఆరబోయాలి. ప్రకాశవంతమైన సూర్యరశ్మి తగిలేలా కనీసం నాలుగు రోజుల పాటు వీటిని బాగా ఎండబెట్టాలి.

-నాలుగు రోజుల తర్వాత ఆ ముక్కలను చేతిలోకి తీసుకుని చూడండి. అవి బాగా గట్టిపడిపోయి, చేతితో విరిచినప్పుడు కరకరలాడుతూ సులభంగా విరిగిపోతుంటే.. అవి పొడి చేయడానికి సిద్ధంగా ఉన్నాయని అర్థం.

-ఎండిన ఈ ముక్కలను మిక్సీ జార్‌లో వేసి మెత్తని పౌడర్‌లా గ్రైండ్ చేసుకోవాలి. గ్రైండ్ చేసిన తర్వాత ఈ పొడిని సన్నటి జల్లెడ పట్టి చూస్తే, ఎంతో సువాసన భరితమైన స్వచ్ఛమైన ఆమ్చూర్ (మామిడి పొడి) మీ ఇంట్లోనే రెడీ.

నిల్వ చేసుకునే విధానం
ఆమ్చూర్ పొడిని తయారు చేయడం ఎంత ముఖ్యమో, దానిని సరైన పద్ధతిలో నిల్వ చేసుకోవడం కూడా అంతే ముఖ్యం. ఈ పొడిని ఎప్పుడూ పొడిగా ఉన్న గాలి చొరబడని గాజు సీసాలో మాత్రమే భద్రపరుచుకోవాలి. దీనికి ఏమాత్రం తేమ తగలకుండా చూసుకుంటే, ఈ మామిడి పొడి సులభంగా ఏడాది పాటు తాజాగా ఉంటుంది. మీ రోజువారీ వంటకాల్లో ఈ పొడిని చిటికెడు చల్లి చూడండి, మీ వంటల రుచి అమాంతం రెట్టింపు అవుతుంది.