కరకరలాడే బెండకాయ చట్నీ ఎప్పుడైనా తిన్నారా? ఒక్కసారి రుచిచూస్తే వదలరు!

భారతీయ వంటకాలలో, ప్రత్యేకించి మన దక్షిణ భారతీయ భోజనంలో చట్నీలకు ఉండే స్థానమే వేరు. వేడి వేడి అన్నంలో కాస్త నెయ్యి వేసుకుని చట్నీతో తింటే ఆ మజాయే వేరు. పుదీనా, కొత్తిమీర, టమాటా, కొబ్బరి, చింతపండు.. ఇలా ఎన్నో రకాల పచ్చళ్లను మనం రోజూ ఆస్వాదిస్తుంటాం. ప్రతి చట్నీకి దానికంటూ ఒక ప్రత్యేకమైన రుచి ఉంటుంది. అయితే మీరు ఎప్పుడైనా కరకరలాడే బెండకాయ చట్నీ రుచి చూశారా? రోటీ, పరాఠా లేదా పప్పు అన్నంలోకి నంజుకోవడానికి ఇది పర్ఫెక్ట్ కాంబినేషన్.

బెండకాయ చట్నీ తయారీకి కావలసిన పదార్థాలు

లేత బెండకాయలు - 250 గ్రాములు
ఉల్లిపాయ - 1
వెల్లుల్లి రెబ్బలు - 6
పచ్చిమిర్చి - 2
టమాటా - 1
కారం - 1 టీస్పూన్
పసుపు - అర టీస్పూన్
ధనియాల పొడి - 1 టీస్పూన్
ఆమ్చూర్ పొడి లేదా నిమ్మరసం - 1 టీస్పూన్
ఉప్పు - రుచికి సరిపడా
నూనె - వేయించడానికి సరిపడా
పోపు కోసం: ఆవాలు, జీలకర్ర, చిటికెడు ఇంగువ
కరివేపాకు - 6 ఆకులు

బెండకాయ చట్నీ తయారీ విధానం

-ముందుగా బెండకాయలను శుభ్రంగా కడిగి, పొడి బట్టతో తుడిచి పూర్తిగా ఆరబెట్టాలి. వాటిలో తడి అస్సలు ఉండకూడదు. ఆ తర్వాత వాటిని సన్నగా, పొడవాటి ముక్కలుగా కట్ చేసుకోవాలి. తడి లేకపోతేనే బెండకాయలు కరకరలాడుతూ వస్తాయి.

-కడాయిలో నూనె వేడి చేయండి. అందులో సన్నగా తరిగిన బెండకాయ ముక్కలను వేసి, మీడియం మంటపై దోరగా వేయించండి. ముక్కలు బంగారు రంగులోకి మారి కరకరలాడేలా తయారయ్యాక, అదనపు నూనెను పీల్చుకోవడానికి వాటిని తీసి ఒక టిష్యూ పేపర్ మీద వేసుకోండి.

-వేరొక పాన్‌ లో 1-2 టీస్పూన్ల నూనె వేడి చేసి ఆవాలు, జీలకర్ర, ఇంగువ, కరివేపాకు వేసి చిటపటలాడించండి. తర్వాత సన్నగా తరిగిన వెల్లుల్లి, పచ్చిమిర్చి వేసి కాస్త వేయించండి. తర్వాత ఉల్లిపాయ ముక్కలు వేసి అవి లేత బంగారు రంగు వచ్చేవరకు వేయించాలి.

-ఇప్పుడు అందులో టమాటా ముక్కలు వేసి మెత్తబడేదాకా ఉడికించండి. ఆపై పసుపు, కారం, ధనియాల పొడి, తగినంత ఉప్పు వేసి బాగా కలపండి. మసాలా పచ్చివాసన పోయి నూనె పైకి తేలుతున్నప్పుడు, అందులో ఆమ్చూర్ పొడి వేసి కలపాలి. మంటను పూర్తిగా సిమ్‌ లో పెట్టి, ముందుగా వేయించి పెట్టుకున్న కరకరలాడే బెండకాయ ముక్కలను ఈ మసాలాలో వేయండి. ముక్కలు విరిగిపోకుండా చాలా సున్నితంగా కలుపుతూ, మసాలా అంతా పట్టేలా 1-2 నిమిషాలు ఉంచి స్టవ్ ఆపేయండి.

-అంతే ఎంతో రుచికరమైన, నోరూరించే కరకరలాడే బెండకాయ చట్నీ రెడీ.