ఇన్ని పోషకాలున్న లడ్డును ఎప్పుడూ చూసుండరు..జుట్టుకి, చర్మ మెరుపుకి కేక..ఎలా చేసుకోవాలంటే..

జుట్టు రాలడం, చర్మంపై ముడతలు వంటి సమస్యలన్నింటికీ వంటింట్లోనే ఒక అద్భుతమైన పరిష్కారం ఉంది. అదే అవిసె గింజల లడ్డు. అవిసె గింజల్లో ఒమేగా-3 ఫ్యాటీ యాసిడ్స్, ఫైబర్ పుష్కలంగా ఉంటాయి. ఇవి జుట్టు కుదుళ్లను బలపరిచి, జుట్టు రాలడాన్ని అరికడతాయి.

అలాగే ఇందులో ఉండే యాంటీ ఆక్సిడెంట్లు చర్మంపై ముడతలను తగ్గించి, యవ్వనంగా కనిపించేలా చేస్తాయి. ఈ లడ్డులో వాడే నువ్వులు, బాదం, వాల్‌ నట్స్, బెల్లం వంటివి శరీరానికి కావాల్సిన జింక్, ఐరన్, కాల్షియంను అందిస్తాయి. అవిసె గింజల లడ్డును ఎలా తయారు చేసుకోవాలో ఇక్కడ చూడండి.

కావలసిన పదార్థాలు
తామర గింజలు (ఫూల్ మఖానా) - 1 కప్పు
అవిసె గింజలు - 1 కప్పు
తెల్ల నువ్వులు - పావు కప్పు
బాదం పప్పులు - అర కప్పు
వాల్‌నట్స్ - పావు కప్పు
ఎండు కొబ్బరి తురుము - అర కప్పు
ఎండు ద్రాక్ష (కిస్మిస్) - పావు కప్పు
బెల్లం పొడి/తురుము - ముప్పావు కప్పు
ఏలకుల పొడి - అర టీస్పూన్
నెయ్యి - 2 టేబుల్ స్పూన్లు
నీళ్లు - పావు కప్పు

తయారీ విధానం

-ముందుగా స్టవ్ వెలిగించి ఒక మందపాటి పాన్ పెట్టుకోండి. అందులో మఖానా వేసి, అవి క్రిస్పీగా గట్టిగా అయ్యే వరకు సుమారు 3 నిమిషాల పాటు దోరగా వేయించి పక్కన పెట్టుకోండి.

-అదే పాన్‌ లో ఒక కప్పు అవిసె గింజలు వేసి వేయించండి. ఇవి చిటపటలాడుతున్నప్పుడు, 2 నిమిషాల తర్వాత పావు కప్పు తెల్ల నువ్వులు కూడా వేసి మరో 2 నిమిషాలు వేయించి వీటిని కూడా పక్కన ప్లేట్‌ లోకి తీసుకోండి.

-ఇప్పుడు బాదం, వాల్‌ నట్స్‌ ను పాన్‌ లో వేసి దోరగా వేయించి పక్కన పెట్టుకోవాలి. చివరగా ఎండు కొబ్బరి తురుము,ఎండు ద్రాక్షలను వేసి కేవలం ఒక నిమిషం పాటు వేయించి తీసేయండి.

-అదే పాన్‌ లో ముప్పావు కప్పు బెల్లం తురుము వేసి అందులో పావు కప్పు నీళ్లు పోయాలి. బెల్లం పూర్తిగా కరిగి నీళ్ళలో కలిసే వరకు మరిగిస్తే చాలు తీగ పాకం రానవసరం లేదు. బెల్లం కరిగాక స్టవ్ ఆఫ్ చేయండి.

-ఇప్పుడు ఒక మిక్సీ గిన్నెలో ముందుగా వేయించి పెట్టుకున్న అవిసె గింజలు, నువ్వులు వేసి మెత్తగా పొడి చేసి ఒక పెద్ద గిన్నెలో వేసుకోండి. ఆ తర్వాత తామర గింజలు, బాదం, వాల్‌నట్స్, కొబ్బరి మిశ్రమాన్ని కూడా మిక్సీలో వేసి కొంచెం బరకగా పొడి చేసుకుని అదే గిన్నెలో వేసుకోండి.

-ఇప్పుడు ఈ పొడి మిశ్రమంలో అర చెంచా ఏలకుల పొడి, 2 టేబుల్ స్పూన్ల నెయ్యి వేసి చేత్తో బాగా కలపండి. చివరగా కరిగించి పెట్టుకున్న బెల్లం నీటిని వడకట్టి కొద్ది కొద్దిగా వేస్తూ కలపండి. మిశ్రమం వేడిగా ఉన్నప్పుడే మీకు నచ్చిన సైజులో గుండ్రని లడ్డూలుగా చుట్టుకోండి.

-అంతే అవిసె గింజల లడ్డూలు రెడీ. వీటిని గాలి చొరబడని డబ్బాలో నిల్వ చేసుకుంటే 15 రోజుల వరకు ఫ్రెష్ గా ఉంటాయి.

-రోజుకొక లడ్డు తినడం ద్వారా మీ జుట్టు, చర్మ సమస్యలే కాకుండా, కీళ్ల నొప్పులు కూడా తగ్గి, రోజంతా ఉల్లాసంగా ఉంటారు.