అమృతం లాంటి రాగి గంజి.. బరువు తగ్గేందుకు బెస్ట్..ఎలా చేసుకోవాలంటే..

ఈ రోజుల్లో చాలా మందిని వేధిస్తున్న ప్రధాన సమస్య అధిక బరువు. మీరు కూడా పెరిగిన శరీర బరువుతో ఇబ్బంది పడుతున్నారా? జిమ్ములో గంటల తరబడి వ్యాయామం చేస్తున్నా, డైటింగ్ చేస్తున్నా ఆశించిన ఫలితాలు రావడం లేదా? అయితే, కేవలం వ్యాయామం మాత్రమే సరిపోదు, దానికి తోడు సరైన ఆహార నియమాలు కూడా పాటించాల్సిందే.

ముఖ్యంగా మనం రోజును ప్రారంభించే అల్పాహార విషయంలో చాలా జాగ్రత్తగా ఉండాలి. బరువు తగ్గడంతో పాటు, సంపూర్ణ ఆరోగ్యాన్ని ప్రసాదించే అద్భుతమైన ఆహారం రాగులు. రాగులతో తయారు చేసిన రాగి గంజిని ఉదయం అల్పాహారంగా తీసుకోవడం వల్ల శరీరానికి కావాల్సిన శక్తి అందడమే కాకుండా, బరువు సులభంగా తగ్గుతారు. రాగి గంజిని ఎలా తయారు చేసుకోవాలో ఇక్కడ చూడండి.

కావాల్సిన పదార్థాలు
రాగి పిండి: పావు కప్పు
నీళ్లు: 3 కప్పులు (మరిగించడానికి), 1 కప్పు (నానబెట్టడానికి)
చిక్కటి పెరుగు: 3 టేబుల్ స్పూన్లు
ఉల్లిపాయ: 1
పచ్చిమిర్చి: 2
కొత్తిమీర: కొద్దిగా
ఉప్పు: రుచికి సరిపడా

తయారీ విధానం

రాత్రి పడుకునే ముందు ఒక గిన్నెలో రాగి పిండిని తీసుకొని, అందులో ఒక కప్పు నీళ్ళు పోసి ఉండలు లేకుండా బాగా కలపాలి. ఈ మిశ్రమాన్ని రాత్రంతా అలాగే నానబెట్టాలి.

మరుసటి రోజు ఉదయం, నానబెట్టిన రాగి పిండి మిశ్రమాన్ని చూడండి. పైన ఏవైనా నురుగు లేదా తేటలా ఉంటే దానిని తొలగించండి. పిండి అడుగున ఉంటుంది కాబట్టి ఒక చెంచాతో మిశ్రమాన్ని మళ్ళీ బాగా కలపండి.

తర్వాత స్టవ్ వెలిగించి ఒక మందపాటి గిన్నె పెట్టి అందులో 3 కప్పుల నీళ్ళు పోసి మరిగించండి. నీళ్ళు మరుగుతున్నప్పుడు ముందుగా సిద్ధం చేసుకున్న రాగి పిండి మిశ్రమాన్ని అందులో పోస్తూ, ఉండలు కట్టకుండా గరిటెతో తిప్పుతూ ఉండాలి. రాగి పిండి బాగా ఉడికి, మిశ్రమం దగ్గర పడేంత వరకు మరిగించి స్టవ్ ఆఫ్ చేయాలి.

ఉడికించిన రాగి గంజిని పూర్తిగా చల్లారనివ్వాలి.

రాగి మిశ్రమం పూర్తిగా చల్లారిన తర్వాత అందులో 3 స్పూన్ల చిక్కటి పెరుగు, సన్నగా తరిగిన ఉల్లిపాయ ముక్కలు, పచ్చిమిర్చి ముక్కలు వేయాలి. రుచికి సరిపడా ఉప్పు, సన్నగా తరిగిన కొత్తిమీరను చల్లి బాగా కలపాలి. గంజి మరీ చిక్కగా అనిపిస్తే తగినన్ని నీళ్ళు పోసి పల్చగా చేసుకోవచ్చు.

సిద్ధమైన ఈ పోషకాల గనిని ఒక గ్లాసులో లేదా బౌల్ లోకి తీసుకోండి. పైన ఇంకాస్త సన్నగా తరిగిన ఉల్లిపాయ ముక్కలు చల్లి సర్వ్ చేసుకోండి. పుల్లపుల్లగా, కమ్మగా ఉండే ఈ రాగి గంజిని ఉదయం పూట తాగితే ఆ రోజంతా ఎంతో ఉత్సాహంగా ఉంటారు. ఇది బరువు తగ్గించడమే కాకుండా, శరీరాన్ని చల్లబరుస్తుంది.