బోర్ కొట్టిన దోశలకు బదులు..అదిరిపోయే టమాటో దోశ, సింపుల్ గా క్షణాల్లోనే ఇలా చేసుకోండి

రెండు తెలుగు రాష్ట్రాల్లో పొద్దున్నే ఇళ్లల్లో కానీ లేదా హోటల్స్ లో కాని ప్రధానంగా తయారుచేసే వంటకం ఏదైనా ఉందంటే అది దోశనే. దోశ తినని తెలుగువారుండరు. అయితే రోజూ అవే మసాలా దోశలు,అవే ఎగ్ దోశలు, అవే ఆనియన్ దోశలు తిని తిని బోర్ కొట్టేసిందా? అయితే ఓసారి టమాటో దోశ ట్రై చేసి తీరాల్సిందే. మాటల్లో వర్ణించలేని టేస్ట్ టమాటో దోశ సొంతం. సాధారణంగా కడప సహా రాయలసీమలోని కొన్ని ప్రాంతాల్లో దీనిని ఎక్కువగా తయారుచేస్తుంటారు.

ఈ టమాటో దోశను చాలా సింపుల్ గా అప్పటికప్పుడు తయారుచేసుకోవచ్చు. పిల్లల నుంచి పెద్దల వరకు అందరికీ ఇది నచ్చుతుంది. సింపుల్ గా అప్పటికప్పుడు తయారుచేసుకోగలిగే టమాటో దోశను మీ ఇంట్లో చేసుకోడానికి కావలసిన పదార్థాలు,తయారీ విధానం ఇక్కడ చూడండి.

టమాటో దోశ తయారీకి కావలసిన పదార్థాలు
-టమాటో
-ఎండుమిర్చి
-ఉప్పు
-వెల్లుల్లి
-మినపగుళ్లు
-బియ్యం
-నీళ్లు

సూపర్ హెల్దీ బ్రేక్ ఫాస్ట్ సజ్జ దోశ..రుచికి రుచి ఆరోగ్యానికి ఆరోగ్యం.. సింపుల్ గా ఎలా చేసుకోవాలో చూడండి

టమాటో దోశ తయారీ విధానం

-ఒక గిన్నెలో శుభ్రంగా కడిగిన ముప్పావు కప్పు బియ్యం వేసి అందులో నీళ్లు పోసి రెండు గంటల సేపు నానబెట్టాలి.

-తర్వాత మరో గిన్నెలో అరకప్పు మినపగుళ్లు వేసి వీటిని కూడా శుభ్రంగా కడిగి నీళ్లు పోసి కనీసం రెండు గంటలు నానబెట్టుకోవాలి.

-రెండు గంటల తర్వాత నానిన బియ్యం,మినపగుళ్లను మిక్సీ గిన్నెలో వేసి ఇందులో 8 ఎండుమిర్చి, 3 పొట్టుతీసిన వెల్లుల్లి రెబ్బలు,4-5 టమాటోల ముక్కలు,రుచికి సరిపడా ఉప్పు వేసి నీళ్లు పోయకుండా పిండిని మెత్తగా గ్రైండ్ చేసుకోవాలి.

-గ్రైండ్ చేసుకున్న పిండిని ఓ గిన్నెలోకి తీసుకొని ఒక గంటసేపు పక్కనపెట్టుకోండి.

-గంట తర్వాత పిండిలో కొద్ది కొద్దిగా నీళ్లు పోసుకుంటూ దోశ పిండిలా కలుపుకోవాలి.

-తర్వాత స్టవ్ మీద దోశ పెనం పెట్టి వేడి చెయ్యాలి. పెనం వేడయ్యాక దాని మీద గరిట దోశ పిండిని వేసి స్ప్రెడ్ చేయాలి.

-దోశపైన పిండి తడి ఆరిపోయిన తర్వాత దానిమీద కొంచెం నెయ్యి వేసి దోశను బాగా కాల్చుకొని పెనం మీదనుంచి దించేయాలి. అంతే టమాటో దోశ రెడీ. మీకు నచ్చిన చట్నీతో దీన్ని ఆస్వాదిస్తే ఆ మజానే వేరు.