రోజూ అవే చపాతీలు, రోటీలు తిని బోర్ కొట్టిందా? మట్కా రోటీ ఇలా చేస్తే పిచ్చెక్కించే టేస్ట్!

ఇంట్లో రోజూ చేసుకునే గోధుమ రోటీలు, చపాతీలు తిని బోర్ కొట్టిందా? పప్పు, కూర ఏదైనా సరే.. ఎప్పుడూ ఒకేలా ఉండే రోటీలు తింటే కాస్త విసుగు రావడం సహజమే. అయితే మీ డైనింగ్ టేబుల్‌పైకి ఏదైనా కొత్త రుచిని తీసుకురావాలనుకుంటే, ఈసారి మట్కా రోటీ (కుండ రొట్టె) ట్రై చేయండి. పేరు కాస్త వెరైటీగా అనిపించినా.. పాపడ్‌ లా పల్చగా, కరకరలాడుతూ, లోపల మెత్తగా ఉండే ఈ రోటీ రుచి అద్భుతంగా ఉంటుంది. ప్రస్తుతం సోషల్ మీడియాలో ట్రెండ్ అవుతున్న ఈ దేశీ స్టైల్ రోటీని ఇంట్లోని మట్టి కుండతో హోటల్ రుచిని తలపించేలా చాలా ఈజీగా ఎలా తయారుచేసుకోవాలో ఇక్కడ చూడండి.

మట్కా రోటీ తయారీకి కావలసిన పదార్థాలు

గోధుమ పిండి - 1 కిలో
ఉప్పు - 1 టీస్పూన్
నీరు - తగినంత
నూనె - కుండకు రాయడానికి కొద్దిగా
మట్టి కుండ - 1

ఎలాంటి మెషీన్ లేకుండానే ఇంట్లోనే స్వచ్ఛమైన వేరుశెనగ నూనె..ఎలా చేయాలో చూడండి..

మట్కా రోటీ తయారీ విధానం

-ముందుగా ఒక గిన్నెలో గోధుమ పిండి, ఉప్పు వేసి, సాధారణ రోటీల కంటే కాస్త మెత్తగా, తేమగా ఉండేలా నీళ్లు పోసి కలుపుకోవాలి. ఈ పిండిపై మూతపెట్టి సెట్ అవ్వడానికి అరగంట పాటు పక్కన పెట్టాలి.

-30 నిమిషాల తర్వాత, పిండి నుంచి ఒక చిన్న ముద్దను తీసుకుని 5-10 నిమిషాల పాటు బాగా పిసకాలి. దానిపైన కొద్దికొద్దిగా నీళ్లు చల్లుతూ మరో 15 నిమిషాల పాటు మర్దన చేయాలి. ఈ ప్రక్రియను 3-4 సార్లు రిపీట్ చేయాలి. పిండి సాగే గుణం వచ్చే వరకు, చేతికి అంటుకోకుండా మృదువుగా మారే వరకు ఇలా చేయాలి. పిండిని లాగితే తెగకుండా సాగుతోందంటే.. మీ రోటీ పర్ఫెక్ట్‌ గా వస్తుందని అర్థం.

-కట్టెల పొయ్యి లేకపోయినా కంగారు వద్దు. మీ ఇంట్లోని గ్యాస్ స్టవ్ మీద కూడా కుండను బోర్లించి ఈ రోటీలు చేసుకోవచ్చు. ఇప్పుడు మట్టి కుండను బోర్లించి స్టవ్ మీద వేడి చేయాలి. రోటీ వేసే ముందు కుండ అడుగు భాగానికి (పైకి ఉండే వైపు) కొద్దిగా నూనె రాయాలి. దీంతో రోటీ కుండకు అతుక్కోకుండా సులభంగా వస్తుంది.

-ఇప్పుడు చేతిలోకి కొద్దిగా పిండిని తీసుకుని, చేతులతోనే గుండ్రంగా, పల్చగా సాగదీయాలి. దీన్ని నెమ్మదిగా వేడి కుండ మీద వేయాలి. ఎక్కడైనా పల్చబడినా, చిరిగినట్లు అనిపించినా కొద్దిగా పిండిని అక్కడ అద్దండి.

-కేవలం ఒక్క నిమిషంలోనే రోటీ ఉడికిపోవడం మీరు గమనిస్తారు.

-కాలిన తర్వాత పల్చటి గరిటె లేదా చాకు సహాయంతో జాగ్రత్తగా తీసేయండి. కుండ చాలా వేడిగా ఉంటుంది కాబట్టి చేతులతో నేరుగా తాకవద్దు.