టమాటాలు ఉడకబెట్టకుండా..నిమిషాల్లో నిల్వ పచ్చడి..ఎలా చేసుకోవాలంటే

ఈరోజుల్లో మనం ఉరుకుల పరుగుల జీవితంలో ఉన్నాం. ఇంట్లో ఏది చేసినా సరే, త్వరగా అయిపోవాలని చూస్తుంటాం. ఇలాంటి వారికి నిల్వ పచ్చళ్ళు చాలా ఉపయోగపడతాయి. ముఖ్యంగా, టమాటో నిల్వ పచ్చడి ఇంట్లో ఉంటే, వేడి వేడి అన్నంతో కలుపుకుని తినేయవచ్చు. ఇది అన్నంలోకే కాదు, ఇడ్లీ, దోశ, పూరీ, చపాతీ వంటి వాటిలోకి కూడా చాలా రుచిగా ఉంటుంది. టమాటోలను ఉడికించే పనిలేకుండా నిమిషాల్లో అదిరిపోయే టేస్ట్ తో టమాటో నిల్వ పచ్చడిని ఎలా తయారు చేసుకోవాలో ఇక్కడ చూడండి.

టమాటో పచ్చడి తయారీకి కావాల్సిన పదార్థాలు

-చింతపండు
-టమాటోలు
-కరివేపాకు
-ఇంగువ
-మినపప్పు
-ఆవాలు
-జీలకర్ర
-పచ్చి శెనగపప్పు
-ఎండుమిరపకాయలు
-వెల్లుల్లి
-వేయించి పొడి చేసిన మెంతుల పొడి
-వేయించి పొడి చేసిన ఆవ పొడి
-ఆయిల్
-కారం
-ఉప్పు
-పసుపు

టమాటో పచ్చడి తయారీ విధానం

-ముందుగా అరకేజీ బాగా పండి గట్టిగా ఉన్న టమాటోలను తీసుకోండి.

-టమాటోలను ముక్కలుగా కట్ చేసి వాటిని మిక్సీజార్ లో వేసి, ఇందులోనే నిమ్మకాయ సైజ్ అంత చింతపండు,3 టేబుల్ స్పూన్ల కారం, 12 వెల్లుల్లి రెబ్బలు, రుచికి సరిపడా ఉప్పు వేసి వీటన్నింటిని కచ్చాపచ్చాగా గ్రైండ్ చేసుకోవాలి. మరీ మెత్తని పేస్ట్ లా చేసుకోవద్దు.

-తర్వాత స్టవ్ మీద పాన్ పెట్టి అందులో ముప్పావు కప్పు ఆయిల్ పోయండి.

-ఆయిల్ కాగిన తర్వాత అందులో 1 టీస్పూన్ పచ్చిశెనగపప్పు, 1 టీస్పూన్ జీలకర్ర, 1 టీస్పూన్ మినపప్పు, 1 టీస్పూన్ ఆవాలు వేసి చిటపటలాడేదాకా వేయించాక అందులోనే కచ్చాపచ్చాగా దంచిన 10 వెల్లుల్లి రెమ్మలు, 6 ఎండుమిరపకాయ ముక్కలు, 3రెమ్మల కరివేపాకు, కొంచెం ఇంగువ,కొంచెం పసుపు వేసుకోవాలి.

-పోపు మెత్తం వేగిన తర్వాత అందులో ముందుగా గ్రైండ్ చేసుకున్న పచ్చడి మొత్తాన్ని వేసి తక్కువ మంట మీద మధ్యమధ్యలో కలుపుతూ ఆయిల్ పైకి వచ్చేదాకా వేయించాలి.

-పచ్చడి ఉడుకుతున్న సమయంలో వేయించి పొడి చేసిన మెంతుల పొడి పావు టీస్పూన్, వేయించి పొడి చేసిన ఆవ పొడి పావు టీస్పూన్ వేసి కలుపుకోవాలి.

-పచ్చడి ఉడికి ఆయిల్ పైకి తేలుతున్న సమయంలో స్టవ్ ఆఫ్ చేసేయండి.

-పచ్చడి బాగా చల్లారిన తర్వాత ఏదైనా డబ్బా లేదా సీసాలో నిల్వచేసుకుంటే వారం రోజులకు పైనే ప్రెష్ గా ఉంటుంది.