నూనె లేని స్నాక్..ఆరోగ్యం ప్లస్ రుచి.. 5 నిమిషాల్లోనే బీట్‌ రూట్ క్యారెట్ శాండ్‌ విచ్

శీతాకాలం వచ్చిందంటే చాలు.. సాయంత్రం వేళ చల్లని గాలికి ఏదైనా వేడివేడిగా, కరకరలాడుతూ తినాలనిపిస్తుంది. కానీ నూనెలో వేయించిన చిరుతిళ్లు తింటే ఆరోగ్యం పాడవుతుందన్న భయం వెంటాడుతోందా? అయితే కేవలం 5 నిమిషాల్లో అందుబాటులో ఉండే కూరగాయలతో బీట్‌ రూట్ క్యారెట్ శాండ్‌ విచ్ చేసుకోండి.

బీట్‌ రూట్ క్యారెట్ శాండ్‌ విచ్ మీ ఆకలిని తీర్చడమే కాదు, ఆరోగ్యాన్ని కూడా కాపాడుతుంది. పిల్లలు కూరగాయలు తినమని మారాం చేస్తుంటే, ఈ క్రీమీ శాండ్‌ విచ్ చేసి పెట్టండి, ఒక్క ముక్క కూడా వదలకుండా తినేస్తారు. బీట్‌ రూట్ క్యారెట్ శాండ్‌ విచ్ మీ ఇంట్లో ఎలా తయారుచేసుకోవాలో ఇక్కడ చూడండి.

కావలసిన పదార్థాలు
బ్రెడ్ ముక్కలు
తురిమిన బీట్‌రూట్ - 1 కప్పు
తురిమిన క్యారెట్ - 1 కప్పు
సన్నగా తరిగిన ఉల్లిపాయ - 1
మయోన్నైస్ లేదా గట్టి పెరుగు- 3 టేబుల్ స్పూన్లు
మిరియాల పొడి - 1 టేబుల్ స్పూన్
చిల్లీ ఫ్లేక్స్ - 1 టేబుల్ స్పూన్
నిమ్మరసం - 1 టేబుల్ స్పూన్
ఉప్పు - రుచికి సరిపడా
వెన్న - కాల్చడానికి సరిపడా

తయారీ విధానం

-ఒక వెడల్పాటి గిన్నెలో తురిమిన బీట్‌ రూట్, క్యారెట్, ఉల్లిపాయ ముక్కలు వేయండి. అందులో రుచికి సరిపడా ఉప్పు, మిరియాల పొడి, చిల్లీ ఫ్లేక్స్, నిమ్మరసం వేసి బాగా కలపండి.

-ఇప్పుడు ఈ మిశ్రమంలో మయోన్నైస్ లేదా గట్టి పెరుగును వేసి బాగా కలపండి. ఇది శాండ్‌ విచ్‌ కి మంచి క్రీమీ ఆకృతిని ఇస్తుంది.

-బ్రెడ్ ముక్కలకు ఒక వైపు వెన్న రాయండి. వెన్న రాసిన వైపు కాకుండా, మరోవైపున తయారు చేసుకున్న కూరగాయల మిశ్రమాన్ని మందంగా పరచండి. మరో బ్రెడ్ ముక్కతో దానిని కవర్ చేయండి.

-స్టవ్ మీద పాన్ పెట్టి లేదా శాండ్‌ విచ్ మేకర్‌ లో బ్రెడ్ ముక్కలను ఉంచండి. రెండు వైపులా బంగారు గోధుమ రంగు వచ్చే వరకు వెన్న లేదా నెయ్యితో కాల్చుకోండి. బీట్‌ రూట్ క్యారెట్ శాండ్‌ విచ్ రెడీ.

-బీట్‌ రూట్, క్యారెట్‌ లను పచ్చిగా వాడటం వల్ల పోషకాలు పూర్తిగా అందుతాయి. కానీ పచ్చి వాసన నచ్చని వారు ఈ తురుమును ఒక్క నిమిషం పాటు నెయ్యిలో వేయించి వాడుకోవచ్చు.-

-బీట్‌ రూట్‌ లో ఐరన్ పుష్కలంగా ఉంటుంది. ఇది రక్తహీనతను తగ్గించి, రక్తపోటును అదుపులో ఉంచుతుంది. క్యారెట్ ‌లో ఉండే విటమిన్-ఏ కంటి ఆరోగ్యానికి ఎంతో మంచిది. ఈ రెండు కూరగాయల్లో ఉండే యాంటీఆక్సిడెంట్లు శీతాకాలంలో వచ్చే జలుబు, దగ్గు వంటి వాటిని తట్టుకునేలా రోగనిరోధక శక్తిని పెంచుతాయి. ఇందులో ఫైబర్ అధికంగా ఉండటం వల్ల జీర్ణక్రియ సాఫీగా సాగుతుంది.