చపాతీ, పరోటాలోకి అదిరిపోయే కాంబినేషన్..కేరళ స్టైల్ కంఠారి చికెన్..చేయడం చాలా ఈజీ

చపాతీలతో పాటు ఎప్పుడూ చేసుకునే రొటీన్ చికెన్ కర్రీ కాకుండా, కాస్త కొత్తగా, ఘాటుగా ఏదైనా ప్రయత్నించాలని ఉందా? అయితే కంఠారి చికెన్ ట్రై చేయాల్సిందే. కేరళ స్టైల్ వంటకాలను ఇష్టపడే వారికి ఈ పేరు సుపరిచితమే. సాధారణ పచ్చిమిరపకాయల కంటే ఎంతో ఘాటుగా, ఆరోగ్యకరంగా ఉండే కాంఠారి మిర్చితో చేసే ఈ చికెన్ రుచి అమోఘం.

ఇది కేవలం చపాతీకే కాదు.. పరోటా, దోశ, అప్పం, చివరికి ఘీ అన్నం లేదా బగారా రైస్ లోకి కూడా అదిరిపోయే కాంబినేషన్. చాలా తక్కువ సమయంలో, సులభంగా ఈ టేస్టీ రెసిపీని ఎలా చేసుకోవాలో ఇక్కడ చూడండి.

కావలసిన పదార్థాలు
చికెన్: అర కిలో
కాంఠారి మిరపకాయలు (గుండు పచ్చిమిర్చి): 10
సాంబార్ ఉల్లిపాయ తరుగు: 1 కప్పు
టమోటా: 1
అల్లంవెల్లుల్లి పేస్ట్: 2 టేబుల్ స్పూన్లు
కొబ్బరి నూనె: 3 టేబుల్ స్పూన్లు
చిక్కటి కొబ్బరి పాలు: పావు కప్పు
జీడిపప్పు: 10
కరివేపాకు: 1 రెమ్మ
కొత్తిమీర: ఒకటిన్నర టీస్పూన్లు
ధనియాల పొడి: ఒకటిన్నర టీస్పూన్
పసుపు: అర టీస్పూన్
మిరియాల పొడి: అర టీస్పూన్
గరం మసాలా: అర టీస్పూన్
ఉప్పు: రుచికి సరిపడా
వేడినీరు: అర కప్పు

తయారీ విధానం

-ముందుగా స్టవ్ మీద పాన్ పెట్టి అందులో కొబ్బరి నూనె వేసి వేడి చేయాలి.

-నూనె వేడెక్కాక తరిగిన చిన్న ఉల్లిపాయలు, 3 కాంఠారి మిరపకాయలు, కొద్దిగా ఉప్పు, తాజా కరివేపాకు వేసి వేయించాలి. చిన్న ఉల్లిపాయలు వాడటం వల్ల కూరకు మంచి తీపి, రుచి వస్తుంది.

-ఉల్లిపాయలు పారదర్శకంగా మారిన తర్వాత అందులో అల్లం వెల్లుల్లి పేస్ట్, మిగిలిన తరిగిన కాంఠారి మిరపకాయలను వేసి వేయించాలి. ఉల్లిపాయలు బంగారు రంగులోకి వచ్చేవరకు వేయిస్తే గ్రేవీ చిక్కగా వస్తుంది.

-ఇప్పుడు మంటను సిమ్ లో పెట్టి పసుపు, ధనియాల పొడి, మిరియాల పొడి వేసి పచ్చి వాసన పోయే వరకు 2 నిమిషాలు వేయించాలి. ఆ తర్వాత సన్నగా తరిగిన టమోటాలు వేసి, అవి మెత్తగా గుజ్జులా అయ్యేవరకు 3-4 నిమిషాలు ఉడికించాలి. సరిపడా ఉప్పు చూసుకుని వేసుకోండి.

-ఇప్పుడు శుభ్రం చేసి పెట్టుకున్న చికెన్ ముక్కలను మసాలాలో వేసి బాగా కలపాలి. మసాలా ముక్కలకు పట్టేలా 5 నిమిషాలు మధ్యస్త మంటపై వేయించాలి. తర్వాత అర కప్పు వేడి నీళ్లు పోసి, మూత పెట్టి చికెన్ మెత్తగా ఉడికేవరకు ఉంచాలి. మధ్యమధ్యలో కలుపుతూ ఉండాలి.

-చికెన్ ఉడికిన తర్వాత గరం మసాలా పొడి, ముందుగా సిద్ధం చేసుకున్న జీడిపప్పు పేస్ట్ వేసి ఒక నిమిషం పాటు ఉడికించాలి.

-చివరగా స్టవ్ ఆపే ముందు చిక్కటి కొబ్బరి పాలు, మరికొన్ని కరివేపాకు రెమ్మలు వేసి బాగా కలపాలి. కొబ్బరి పాలు వేసాక ఎక్కువ సేపు ఉడికించకూడదు, కేవలం తక్కువ మంటపై 2 నిమిషాలు ఉంచి స్టవ్ ఆపేయాలి.

-అంతే ఘాటైన, రుచికరమైన కాంఠారి చికెన్ గ్రేవీ రెడీ. వేడి వేడి చపాతీలు లేదా దోశలతో వడ్డిస్తే ప్లేట్లు ఖాళీ అవ్వడం ఖాయం.