ఉల్లిపాయ పకోడీ బోర్ కొట్టిందా? ఈ కరకరలాడే దొండకాయ పకోడీ ట్రై చేయండి..లొట్టలేసుకుంటూ తింటారు!

సాధారణంగా దొండకాయ కూర లేదా ఫ్రై అంటే పిల్లలు ముఖం చాటేస్తారు. కానీ ఇలా పకోడీలా చేసి పెడితే లొట్టలేసుకుంటూ తింటారు. సాయంత్రం వేళ వేడి వేడి టీ లేదా కాఫీతో పాటు కరకరలాడే దొండకాయ పకోడీ తింటుంటే ఆ రుచే వేరు. ఇది ఉల్లిపాయ పకోడీకి భిన్నంగా, ఇది కొంచెం గట్టిగా, కరకరలాడుతూ, మసాలా రుచితో అద్భుతంగా ఉంటుంది.

సాంబార్ అన్నం లేదా రసంలోకి నంజుకోవడానికి చాలా బాగుంటుంది. కేవలం 20 నిమిషాల్లో దీన్ని తయారు చేసుకోవచ్చు. పెళ్లి భోజనాల్లో వడ్డించే ఈ స్పెషల్ దొండకాయ పకోడీని అంతే రుచితో మీ ఇంట్లో ఎలా తయారు చేసుకోవాలో ఇక్కడ చూడండి.

కావలసిన పదార్థాలు

లేతగా, గట్టిగా ఉన్న దొండకాయలు: పావు కిలో
శనగపిండి : 4 టేబుల్ స్పూన్లు
బియ్యం పిండి: 2 టేబుల్ స్పూన్లు
కార్న్ ఫ్లోర్: 1 టేబుల్ స్పూన్
అల్లం వెల్లుల్లి పేస్ట్: 1 టీస్పూన్
కారం: 1 నుండి 1.5 టీస్పూన్
ఉప్పు: రుచికి సరిపడా
గరం మసాలా: అర టీస్పూన్
ధనియాల పొడి: అర టీస్పూన్
పసుపు: చిటికెడు
కరివేపాకు: రెండు రెమ్మలు
జీడిపప్పు: గుప్పెడు
నూనె: డీప్ ఫ్రై చేయడానికి సరిపడా
ఫుడ్ కలర్: చిటికెడు

తయారీ విధానం

-ముందుగా లేతగా, పచ్చగా ఉన్న దొండకాయలను శుభ్రంగా కడిగి, ఒక పొడి గుడ్డతో తడి లేకుండా తుడవాలి. దొండకాయకు రెండు వైపులా ఉన్న తొడిమలను తొలగించాలి.

-ఇప్పుడు దొండకాయను నిలువుగా సన్నని పొడవాటి ముక్కలుగా కోయాలి. ఒక దొండకాయను నిలువుగా 4 లేదా 6 ముక్కలుగా చీల్చాలి. గుండ్రంగా చక్రాల్లా కోయకూడదు.

-నిలువుగా కోసి పెట్టుకున్న దొండకాయ ముక్కలను ఒక వెడల్పాటి గిన్నెలోకి తీసుకోండి. ఇప్పుడు అందులో రుచికి సరిపడా ఉప్పు, పసుపు, కారం, ధనియాల పొడి, గరం మసాలా, అల్లం వెల్లుల్లి పేస్ట్ వేసి చేతితో కలిపి ఒక 5 నిమిషాలు పక్కన పెడితే నీరు ఊరుతుంది.

-తర్వాత ఆ మిశ్రమంలో శనగపిండి, బియ్యం పిండి, కార్న్ ఫ్లోర్(మొక్క జొన్న పిండి) వేయండి. నీళ్ళు పోయకుండా గట్టిగా నొక్కుతూ కలపండి. ఒకవేళ మరీ పొడిగా అనిపిస్తే 1-2 స్పూన్ల నీళ్లను చిలకరించండి. చివరగా కొన్ని కరివేపాకు రెమ్మలు, పల్లీలు కూడా ఈ పిండి మిశ్రమంలో వేసి కలపండి.

-ఇప్పుడు స్టవ్ మీద బాండీ పెట్టి డీప్ ఫ్రైకి సరిపడా నూనె పోసి వేడయ్యాక మంటను మీడియంలో పెట్టి కలిపి పెట్టుకున్న దొండకాయ మిశ్రమాన్ని కొంచెం కొంచెంగా తీసుకుని, నూనెలో విడివిడిగా పడేలా వేయాలి. ముద్దలు ముద్దలుగా వేయకూడదు.

-వెంటనే గరిటతో కలపకుండా, ఒక నిమిషం పాటు వేగనివ్వండి. ఆ తర్వాత నెమ్మదిగా కలుపుతూ అన్ని వైపులా సమానంగా వేయించండి. దొండకాయ ముక్కలు బంగారు రంగులోకి వచ్చి, గలగలలాడే శబ్దం వచ్చే వరకు వేయించాలి.

-బాగా వేగిన తర్వాత, జాలి గరిటతో తీసి పక్కన పెట్టుకోండి. స్టవ్ ఆపేసే ముందు అదే వేడి నూనెలో కొంచెం కరివేపాకు, గుప్పెడు జీడిపప్పు వేసి దోరగా వేయించి పకోడీలపై చల్లుకోండి.