దసరా,దీపావళి స్పెషల్..షక్కర్ పారా ఇలా చేస్తే నూనె పీల్చకుండా గుల్లగా కరకరలాడతాయ్!

షక్కర్ పారా అనేది భారతదేశంలోని అనేక ప్రాంతాల్లో ముఖ్యంగా నార్త్ ఇండియాలో,మహారాష్ట్రలో బాగా ప్రాచుర్యం పొందిన సాంప్రదాయ తీపి వంటకం. దీనిని కొన్ని ప్రాంతాలలో శంకర్ పాలి లేదా ఖుర్మ అని కూడా పిలుస్తారు. దసరా, దీపావళి వంటి పండుగల సమయాలలో లేదా కేవలం ఇంట్లో తీపి తినాలనిపించినప్పుడు దీనిని తరచుగా తయారు చేస్తారు. ఇవి మైదాతో తయారు చేయబడి, నూనెలో లేదా నెయ్యిలో వేయించబడి, ఆ తర్వాత చక్కెర పాకంలో ముంచుతారు. షక్కర్ పారా తయారుచేయడం కొంచెం శ్రమతో కూడుకున్న పని అయినప్పటికీ, దాని రుచి మిమ్మల్ని ఖచ్చితంగా సంతృప్తి పరుస్తుంది. దీనిని ఇంట్లోనే ఎలా తయారుచేసుకోవాలో ఇక్కడ చూడండి.

కావలసిన పదార్థాలు

మైదా పిండి- 2 కప్పులు
చక్కెర-పావు కప్పు
రవ్వ (సెమోలినా)-2 టేబుల్ స్పూన్లు
నెయ్యిలేదా నూనె-పావు కప్పు
యాలకుల పొడి-అర టీస్పూన్
పాలు లేదా నీరు-తగినంత
ఉప్పు- చిటికెడు
చక్కెర పాకం కోసం:
పంచదార-1 కప్పు

నీరు- అర కప్పు

యాలకుల పొడి-పావు టీస్పూన్

వేయించడానికి
నూనె లేదా నెయ్యి- డీప్ ఫ్రై కోసం

తయారీ విధానం

-ఒక పెద్ద గిన్నెలో మైదా పిండి, రవ్వ, పంచదార, యాలకుల పొడి, చిటికెడు ఉప్పు వేసి బాగా కలపాలి.

-ఇప్పుడు వేడి చేసిన నెయ్యి లేదా నూనెను పిండిలో వేసి వేడి తగ్గే వరకు చెంచాతో కలపాలి. ఆ తర్వాత చేతులతో పిండి మొత్తానికి నెయ్యి పట్టేలా రుద్దాలి. పిండిని గట్టిగా గుప్పిట పట్టుకుంటే ఉండలా ఏర్పడాలి.

-కొద్దికొద్దిగా పాలు లేదా నీరు కలుపుతూ గట్టిగా మరీ మెత్తగా కాకుండా, కొంచెం గట్టిగా ఉండేలా పిండిని కలపాలి.

-కలిపిన పిండిని తడి గుడ్డతో కప్పి కనీసం 30 నిమిషాలు పక్కన ఉంచాలి. దీనివల్ల రవ్వ మరియు మైదా కొద్దిగా ఉబ్బుతాయి.

-30 నిమిషాల తర్వాత పిండిని కొద్దిగా కలిపి, సమాన భాగాలుగా విభజించాలి.

-ఒక భాగాన్ని తీసుకుని కొంచెం మందంగా సుమారు పావు అంగుళం మందంతో ఒక పెద్ద రోటీలాగా వత్తుకోవాలి.

-ఒక కత్తి సహాయంతో ఈ పెద్ద రోటీని డైమండ్ ఆకారంలో లేదా చతురస్రాకారంలో చిన్న చిన్న ముక్కలుగా కట్ చేయాలి. ముక్కల పరిమాణం ఒకే విధంగా ఉంటే వేయించడానికి సులభంగా ఉంటుంది.

-ఒక వెడల్పాటి కడాయిలో నూనె లేదా నెయ్యి వేసి మీడియం మంటపై వేడి చేయాలి. నూనె మరీ పొగ వచ్చేలా వేడిగా ఉండకూడదు.

-తర్వాత కట్ చేసిన షక్కర్ పారా ముక్కలను కొద్దికొద్దిగా నూనెలో వేయాలి.

-ముక్కలను బంగారు గోధుమ రంగులోకి మారే వరకు, లోపల వరకు ఉడికేలా నెమ్మదిగా వేయించాలి. తక్కువ మంటపై వేయించడం వలన లోపల పిండి లేకుండా స్ఫుటంగా తయారవుతాయి.

-వేయించిన ముక్కలను నూనె నుండి తీసి టిష్యూ పేపర్ ఉన్న పళ్ళెంలో వేసి, అదనపు నూనెను తీసివేయాలి.

-ఇప్పుడు మరో గిన్నెలో పంచదార,నీరు వేసి మీడియం మంటపై వేడి చేయాలి.

-పంచదార కరిగి, పాకం ఒక తీగ పాకం వచ్చే వరకు ఉడికించాలి. అంటే, కొద్దిగా పాకాన్ని వేళ్లతో పట్టుకుని లాగితే ఒక తీగలా ఏర్పడాలి.

-చివరగా యాలకుల పొడి వేసి కలపాలి.

-తయారు చేసిన చక్కెర పాకాన్ని కొద్దిగా చల్లబరచాలి

-వేయించి సిద్ధం చేసిన షక్కర్ పారాలను ఈ పాకంలో వేసి పాకం ముక్కలన్నింటికీ బాగా పట్టేలా మెల్లగా కలపాలి.

-పాకం కోట్ అయిన షక్కర్ పారాలను ఒక ప్లేటులో లేదా పళ్ళెంలో ఒక్కొక్కటిగా వేరు చేసి ఉంచాలి.

-పాకం పూర్తిగా ఆరిపోయి ముక్కల పైన తెల్లటి చక్కెర పొర ఏర్పడే వరకు పూర్తిగా చల్లబరచాలి. రుచికరమైన షక్కర్ పారా రెడీ. దీనిని గాలి చొరబడని డబ్బాలో నిల్వ ఉంచుకోవచ్చు.