ధాబా స్టైల్ టీ ఇంట్లోనే కావాలా? అయితే ఈ 3 సీక్రెట్ మసాలాలు వాడాల్సిందే!

సుదూర ప్రయాణాలు చేస్తున్నప్పుడు, హైవే పక్కన కనిపించే ధాబా వద్ద ఆగి, వేడి వేడిగా ఒక గ్లాసు టీ తాగితే ఆ కిక్కే వేరు. ప్రయాణపు అలసటనంతా ఇట్టే మాయం చేసే ఆ చిక్కటి, ఘుమఘుమలాడే ధాబా టీ రుచి మనందరికీ ఎంతో ఇష్టం. ఆ కమ్మని రుచిని ఆస్వాదించిన ప్రతిసారీ, "ఇలాంటి టీ మన ఇంట్లో ఎందుకు కుదరదు?" అనే సందేహం చాలామందికి వస్తుంటుంది.

ఇంట్లో మనం ఎంత ఖరీదైన టీ పొడి వాడినా, ఎంత చిక్కటి పాలు పోసినా.. ఆ రోడ్డు పక్కన దొరికే ధాబాల రుచి, సువాసన మాత్రం రావు. దీనికి కారణం ఏంటో తెలుసా? ధాబా స్టైల్ టీ అసలు రహస్యం కేవలం వారు వాడే టీ ఆకులు లేదా పాలు మాత్రమే కాదు... అందులో వాళ్లు సరైన పాళ్లలో ఉపయోగించే ప్రత్యేకమైన మసాలా దినుసులు. మీరు కూడా ఆ అద్భుతమైన రుచిని మీ ఇంట్లోనే ఆస్వాదించాలనుకుంటే, టీ తయారుచేసేటప్పుడు ఈ మూడు ముఖ్యమైన మసాలాలను ఖచ్చితంగా చేర్చాల్సిందే.

అల్లం

ధాబా టీ అనగానే ముందుగా గుర్తొచ్చేది ఘాటైన అల్లం రుచి. అల్లం టీకి ప్రాణం లాంటిది. తాజా అల్లాన్ని కచ్చాపచ్చాగా దంచి మరుగుతున్న నీటిలో వేయాలి. ఇలా చేయడం వల్ల అల్లంలోని సహజసిద్ధమైన సువాసన, ఘాటు ఆ నీటిలోకి చేరతాయి. అల్లం కేవలం టీ రుచిని పెంచడమే కాకుండా.. గొంతు నొప్పి, జలుబు, దగ్గు వంటి సమస్యల నుండి గొప్ప ఉపశమనాన్ని ఇస్తుంది. ఒక కప్పు టీకి ఒక అంగుళం తాజా అల్లం ముక్కను దంచి వేయడం వల్ల టీ రుచి అమాంతం రెట్టింపు అవుతుంది.

యాలకులు
పొయ్యి మీద టీ మరుగుతుంటే ఆ సువాసన ఇల్లంతా గుబాళించాలంటే అందులో యాలకులు పడాల్సిందే. ధాబాల్లో టీ అంత అద్భుతమైన వాసన రావడానికి వాళ్లు వాడే యాలకులే ప్రధాన కారణం. టీ చేస్తున్నప్పుడు ఒకటి లేదా రెండు పచ్చ యాలకులను తీసుకుని, వాటిని తేలికగా నలిపి మరుగుతున్న నీటిలో వేయాలి. యాలకులు టీకి అద్భుతమైన సుగంధాన్ని, ఒక రకమైన తేలికపాటి తీపిని అందిస్తాయి. ప్రతి గుక్కను ఇవి ఎంతో ప్రత్యేకం చేస్తాయి.

దాల్చినచెక్క
చాలామందికి తెలియని సీక్రెట్ ఇది. ఒక చిన్న దాల్చినచెక్క ముక్క మీ రోజువారీ సాధారణ టీని అత్యంత ప్రత్యేకంగా మార్చగలదు. దీనిలో ఉండే సన్నని తీపి, ఘాటైన సువాసన టీ రుచికి సరికొత్త కోణాన్ని జోడిస్తాయి. పేరుపొందిన మసాలా చాయ్ తయారీదారులు, ప్రసిద్ధ ధాబాల వారు దీనిని తప్పక వాడతారు. అయితే దాల్చినచెక్కను చాలా తక్కువ పరిమాణంలో మాత్రమే వాడాలి.

పర్ఫెక్ట్ ధాబా స్టైల్ టీ తయారీ విధానం

-ముందుగా ఒక గిన్నెలో తగినన్ని నీళ్లు పోసి పొయ్యి మీద పెట్టి మరిగించండి.

-నీళ్లు మరుగుతుండగా అందులో దంచిన అల్లం, నలిపిన యాలకులు, ఒక చిన్న దాల్చినచెక్క ముక్క వేయండి. ఈ మసాలాల రుచి, సువాసన నీటికి పూర్తిగా పట్టాలంటే సన్నని మంట మీద కనీసం 2-3 నిమిషాల పాటు బాగా ఉడకనివ్వండి.

-ఇప్పుడు అందులో మీ ఫేవరెట్ టీ పొడి వేసి మరో నిమిషం పాటు మరిగించండి.

-ఇప్పుడు అందులో తగినంత చక్కెర, చిక్కటి పాలు పోసి మంటను తగ్గించండి. టీ పొంగు వస్తున్నప్పుడు కొన్ని నిమిషాల పాటు తక్కువ మంటపై బాగా మరగనివ్వండి.

-టీ రంగు ముదురుగా మారి, ఆ మసాలాల సువాసన మీ ముక్కుపుటాలను తాకుతున్నప్పుడు పొయ్యి ఆపేయండి. అంతే ధాబా టీ మీ ఇంట్లోనే రెడీ