నోట్లో వేసుకుంటే కరిగిపోయే బనానా కేక్..ఇంట్లోనే ఈజీగా ఎలా చేసుకోవాలంటే..

నోట్లో వేసుకుంటే కరిగిపోయేంత మెత్తగా, తియ్యగా ఉండే బనానా కేక్ అంటే చాలామందికి ఇష్టం ఉంటుంది. వంటలో కొత్తగా ప్రయోగాలు చేసేవారైనా సరే ఇంట్లోనే ఈ కేక్‌ను చాలా తేలికగా తయారుచేయవచ్చు. బాగా పండిన అరటిపండ్ల సహజమైన తీపిదనంతో నిండిన ఈ కేక్.. బయట కొనే కేకుల కన్నా ఆరోగ్యకరంగా, తక్కువ ఖర్చుతో మీ ఇంటిల్లిపాదికీ ఆనందాన్ని పంచుతుంది. ఈ టేస్టీ బనానా కేక్ ఇంట్లో తయారుచేసుకోడానికి కావాల్సిన పదార్థాలు, తయారీ విధానం ఇక్కడ చూడండి.

కావలసిన అద్భుతమైన పదార్థాలు
బాగా పండిన అరటిపండు గుజ్జు - 1 కప్పు
మైదా పిండి - 2 కప్పులు
బేకింగ్ పౌడర్ - 2 టీస్పూన్లు
చక్కెర - 1 కప్పు
కాచిన పాలు - 160 మి.లీ
కరిగించిన వెన్న - 100 గ్రాములు
వెనిల్లా ఎసెన్స్ - 2 టీస్పూన్లు
ఉప్పు - చిటికెడు
గుడ్లు - 2

తయారీ విధానం

కేక్ తయారీకి ముందుగా అవసరమైన అన్ని పదార్థాలను (గుడ్లు, వెన్న, పాలు) గది ఉష్ణోగ్రతకు తీసుకురండి. ఇలా చేయడం వల్ల పదార్థాలు బాగా కలిసి, కేక్ స్పాంజిలా మెత్తగా వస్తుంది.

ఇప్పుడు బేకింగ్ పాన్‌ కు వెన్న లేదా నూనె రాస, దానిపై కొద్దిగా మైదా పిండిని చల్లి సిద్ధంగా ఉంచుకోండి.

మీ ఓవెన్‌ను 170°C దగ్గర 15 నిమిషాల పాటు ప్రీ హీట్ చేయండి.

ఒక పెద్ద గిన్నె తీసుకుని అందులో మైదా పిండి, బేకింగ్ పౌడర్, చిటికెడు ఉప్పు వేసి జల్లించుకోవాలి. మరో గిన్నెలో మెత్తని వెన్న, చక్కెర వేసి అది నునుపైన క్రీమ్‌ లా మారే వరకు బాగా గిలకొట్టండి. ఆ తర్వాత ఒక్కొక్కటిగా గుడ్లను పగలగొట్టి వేస్తూ కలపండి. చివరగా వెనిల్లా ఎసెన్స్, అరటిపండు గుజ్జు వేసి బాగా కలపాలి.

ఇప్పుడు మీరు సిద్ధం చేసుకున్న తడి పదార్థాల మిశ్రమంలో జల్లించి పెట్టుకున్న పొడి పిండిని కొద్ది కొద్దిగా వేస్తూ కలపాలి. అదే సమయంలో పాలను కూడా కొద్దిగా పోస్తూ ఉండాలి. ఈ మిశ్రమాన్ని ఉండలు లేకుండా మృదువుగా మారేంతవరకు నెమ్మదిగా కలపాలి. ఎక్కువగా కలిపితే కేక్ గట్టిపడుతుంది.

తయారుచేసుకున్న కేక్ మిశ్రమాన్ని ముందుగా సిద్ధం చేసుకున్న బేకింగ్ పాన్‌ లో పోయాలి. గాలి బుడగలు లేకుండా మిశ్రమం సమానంగా ఉండడానికి పాన్‌ ను మెల్లగా రెండుసార్లు కదపండి. ఇప్పుడు ఈ పాన్‌ ను ప్రీ హీట్ చేసిన ఓవెన్ మధ్య రాక్‌ పై జాగ్రత్తగా ఉంచండి.

కేక్‌ ను 25 నుండి 30 నిమిషాల పాటు బేక్ చేయండి. ఈ సమయంలో మీ ఇల్లంతా కేక్ సువాసనతో నిండిపోతుంది. కేక్ ఉడికిందో లేదో తెలుసుకోవడానికి, దాని మధ్యలో ఒక టూత్‌ పిక్‌ ను గుచ్చి తీయండి. టూత్‌పిక్ శుభ్రంగా, ఏమీ అంటకుండా బయటకు వస్తే మీ కేక్ సంపూర్ణంగా బేక్ అయినట్లే. లేకపోతే మరో 5 నిమిషాలు బేక్ చేయండి.

బేక్ అయిన కేక్‌ ను ఓవెన్ నుండి తీసి పూర్తిగా చల్లారనివ్వండి. వేడిగా ఉన్నప్పుడు కేక్ కట్ చేస్తే విరిగిపోయే అవకాశం ఉంది. పూర్తిగా చల్లారిన తర్వాత మీకు నచ్చిన ఆకారంలో ముక్కలుగా కట్ చేసి ఆస్వాదించండి.