వేసవి స్పెషల్.. ఎవరూ ఊహించని పుచ్చకాయ తొక్క హల్వా.. వావ్ అనాల్సిందే!

వేసవి కాలం రాగానే మనందరికీ ముందుగా గుర్తొచ్చే పండు పుచ్చకాయ. ఎండ వేడికి అల్లాడిపోయే శరీరానికి చల్లదనాన్ని, కావాల్సినంత నీటి శాతాన్ని అందించి సేదదీర్చడంలో దీనికి మరేదీ సాటిరాదు. అయితే ఎర్రగా, తియ్యగా ఉండే లోపలి భాగాన్ని మాత్రమే తిని, ఆకుపచ్చని తొక్కను చెత్తబుట్టలో పారేయడం మనకు అలవాటు. పుచ్చకాయ తొక్కతో నోరూరించే హల్వా తయారు చేయవచ్చని మీకు తెలుసా? దీన్ని ఒక్కసారి మీ ఇంట్లో వారికీ రుచిచూపించారంటే, మళ్లీ మళ్లీ కావాలని అడిగి మరీ చేయించుకుంటారు.

పుచ్చకాయ తొక్కలో పోషకాలు ఉండవని అనుకుంటే పొరపాటే. ఈ తొక్కలో ఫైబర్ పుష్కలంగా ఉంటుంది. ఇది మలబద్ధకం సమస్యను దరిచేరనీయకుండా జీర్ణక్రియను మెరుగుపరుస్తుంది. అంతేకాకుండా, చెడు కొలెస్ట్రాల్‌ ను తగ్గించడంలో, రక్తంలో చక్కెర స్థాయిలను నియంత్రించడంలో కూడా ఇవి అద్భుతంగా పనిచేస్తాయి. చర్మ సౌందర్యాన్ని పెంచే విటమిన్లు ఇందులో దాగి ఉన్నాయి.

పుచ్చకాయ తొక్క హల్వా తయారీకి కావలసిన పదార్థాలు

పుచ్చకాయ తొక్క
నీళ్లు - 2 కప్పులు
పంచదార - ఒకటిన్నర కప్పులు
ఉప్పు - చిటికెడు
పచ్చ కర్పూరం - చిటికెడు
యాలకుల పొడి - అర టీస్పూన్
కుంకుమపువ్వు - చిటికెడు
స్వచ్ఛమైన నెయ్యి - 4 నుండి 5 టేబుల్ స్పూన్లు
జీడిపప్పు - 20
నిమ్మరసం - 2, 3 చుక్కలు

పుచ్చకాయ తొక్క హల్వా తయారీ విధానం

-ముందుగా పుచ్చకాయ తొక్కల బయట ఉండే కఠినమైన ఆకుపచ్చని పొరను చెక్కు తీసి, లోపలి తెల్లటి భాగాన్ని మాత్రమే తీసుకోవాలి. ఆ తెల్లటి భాగాన్ని సన్నగా తురుముకుని, అందులో ఉన్న నీటిని గట్టిగా పిండేసి పక్కన పెట్టుకోవాలి.

-మందపాటి అడుగు ఉన్న ఒక గిన్నెలో నీటిని మరిగించాలి. నీరు మరుగుతున్నప్పుడు ఈ తురుమును అందులో వేసి, తొక్క పారదర్శకంగా, మెత్తగా అయ్యేంత వరకు ఉడికించాలి. ఈలోపు మరో చిన్న పాన్‌ లో నెయ్యి వేసి, జీడిపప్పులను దోరగా వేయించి పక్కన పెట్టుకోవాలి.

-తురుము బాగా ఉడికిన తర్వాత అందులో చక్కెర, చిటికెడు ఉప్పు వేసి బాగా కలపాలి. మంటను మీడియంలో ఉంచి, ఈ మిశ్రమం పాకంలా దగ్గరపడే వరకు గరిటెతో తిప్పుతూ ఉండాలి. మిశ్రమం దగ్గర పడుతున్నప్పుడు కొద్దికొద్దిగా నెయ్యి కలపాలి. నెయ్యిని హల్వా పీల్చుకుని, గిన్నె అంచులకు అంటుకోకుండా నిగనిగలాడుతూ విడిపోవడం ప్రారంభమవుతుంది. ఆ సమయంలో యాలకుల పొడి, కుంకుమపువ్వు వేసి అంతా కలిసేలా తిప్పాలి.

-చక్కెర పాకం గడ్డకట్టకుండా ఉండేందుకు రెండు, మూడు చుక్కల నిమ్మరసం వేయాలి. చివరగా, హల్వాకు అద్భుతమైన సువాసన రావడానికి చిటికెడు పచ్చ కర్పూరం వేసి కలపాలి. హల్వా గిన్నెకు అంటుకోకుండా నెయ్యిని వదులుతున్నప్పుడు, వేయించిన జీడిపప్పుతో అలంకరించి స్టవ్ ఆఫ్ చేయాలి.

-అంతే ఘుమఘుమలాడే హల్వా రెడీ.