కేవలం 4 పదార్థాలతో..అమృతం లాంటి పీనట్ బటర్..ఎలా చేసుకోవాలంటే..

చలికాలం వచ్చిందంటే చాలు సాయంత్రం వేళ వేడివేడిగా వేరుశెనగలు తింటూ కుటుంబంతో కబుర్లు చెప్పుకోవడం ఎంతో ఆహ్లాదకరంగా ఉంటుంది. వేరుశెనగలు కేవలం రుచికరమైన చిరుతిండి మాత్రమే కాదు, ఇవి ఆరోగ్యానికి కూడా ఎంతో మేలు చేస్తాయి. ముఖ్యంగా మొక్కల ఆధారిత ప్రోటీన్ కోసం చూసే వారికి ఇవి అద్భుతమైన వరం.

అందుకే ఫిట్‌ నెస్ ప్రియులు, జిమ్ చేసేవారు తమ డైట్‌ లో పీనట్ బటర్ ను తప్పనిసరిగా చేర్చుకుంటారు. అయితే మార్కెట్లో దొరికే పీనట్ బటర్‌ లో రుచి కోసం అధిక మోతాదులో చక్కెర, నిల్వ ఉండటానికి ప్రిజర్వేటివ్స్, నాణ్యత లేని నూనెలు కలుపుతుంటారు. ఇవి ఆరోగ్యానికి హాని కలిగించవచ్చు. ఎలాంటి కల్తీ లేకుండా, స్వచ్ఛమైన,ఆరోగ్యకరమైన పీనట్ బటర్‌ ను మనమే ఇంట్లోనే ఎలా తయారుచేసుకోవాలో ఇక్కడ చూడండి.

కావలసిన పదార్థాలు
వేరుశెనగలు: 300 గ్రాములు (2 కప్పులు)
నల్ల ఉప్పు: పావు టీస్పూన్
తేనె: 1 టీస్పూన్
నెయ్యి: 1 టీస్పూన్

తయారీ విధానం

-ముందుగా మందపాటి అడుగు ఉన్న పాన్‌ ను స్టవ్ మీద పెట్టి వేరుశెనగలను వేయండి. మంటను చాలా తక్కువలో ఉంచి, సుమారు 20 నిమిషాల పాటు దోరగా వేయించాలి. గరిటెతో కలుపుతూనే ఉండాలి, లేకపోతే మాడిపోయే ప్రమాదం ఉంది. గింజల నుంచి పచ్చి వాసన పోయి, మంచి సువాసన వచ్చే వరకు వేయించాలి.

-వేయించిన వేరుశెనగలను ఒక ప్లేట్‌ లోకి తీసుకుని చల్లారనివ్వాలి. అవి పూర్తిగా చల్లారాక ఒక శుభ్రమైన కాటన్ టవల్‌ లో వేసి మూటకట్టి, చేతితో బాగా రుద్దాలి. ఇలా చేయడం వల్ల పొట్టు సులభంగా వేరుపడుతుంది.

-మీకు పీనట్ బటర్ తినేటప్పుడు పంటికి గింజలు తగలాలంటే పొట్టు తీసిన గింజల్లోంచి గుప్పెడు గింజలను మిక్సీలో వేసి బరకగా పొడి చేసి పక్కన పెట్టుకోండి.

-ఇప్పుడు మిగిలిన వేరుశెనగలను మిక్సీ జార్‌ లో వేసి మెత్తగా గ్రైండ్ చేయడం ప్రారంభించండి. మొదట పొడిలా అవుతుంది, ఆపై గింజల్లోని సహజ నూనెలు బయటకు వచ్చి ముద్దగా మారుతుంది. మిశ్రమం మరీ పొడిగా అనిపిస్తే ఒక టీస్పూన్ నెయ్యి జతచేయవచ్చు.

-మిశ్రమం వెన్నలా మృదువుగా మారాక దానికి తగినంత తేనె, చిటికెడు నల్ల ఉప్పు వేసి పల్స్ మోడ్ లో ఒకటి రెండు సార్లు తిప్పాలి. చివరగా ముందుగా పక్కన పెట్టుకున్న బరక పొడిని కూడా కలిపితే ఎంతో రుచికరమైన క్రంచీ పీనట్ బటర్ రెడీ.