పులిసిపోయిన పెరుగుతో ఎన్ని లాభాలో.. ఇన్ని చేయొచ్చని తెలిస్తే ఇకపై అస్సలు పారబోయరు.!

పెరుగు తాజాగా, తియ్యగా ఉంటేనే తినడానికి బాగుంటుంది. కొంచెం పుల్లగా ఉన్నా, పులిసినా తినడానికి కష్టంగా అనిపిస్తుంది. పెరుగు రెండు, మూడు రోజులు అలాగే బయట ఉంది అంటే పులిసిపోతుంది. అందుకే పుల్లగా అయిన పెరుగును చాలా మంది పడేస్తుంటారు. కొంతమంది వేస్ట్‌ చేయడం ఇష్టం లేక మజ్జిగ చేసుకుని ఉప్పు కలుపుకొని అయిష్టంగానే తాగేస్తుంటారు. కానీ ఇకపై ఆ అవస్థలు వద్దు.. పులిసిన పెరుగును పడేయకుండా ఇలా ఇంట్లో చాలా పనులకు ఉపయోగించుకోవచ్చు. అవేంటో చూద్దాం..

పెరుగు పుల్లగా అయినంత మాత్రాన అది పాడైపోయినట్లు కాదు. ఎక్కువగా పులిసిపోవడం వల్ల అందులోని ప్రొబయాటిక్‌ శాతం పెరుగుతుంది. అయితే ఈ పుల్లటి పెరుగులో కూడా మంచి బ్యాక్టీరియా, లాక్టిక్ యాసిడ్, విటమిన్ డితో సహా అనేక పోషకాలు పుష్కలంగా ఉండటంతో ఆరోగ్యానికి, చర్మానికి, జుట్టుకు, మొక్కలకు వివిధ రకాలుగా మేలు చేస్తుంది. ఈ క్రమంలో ఈసారి పెరుగు పులిసిపోయినప్పుడు ఇలా చేయడం మరిచిపోకండి.

రుచికరమైన కూర చేయొచ్చు..

పులిసిపోయిన పెరుగును కూరల్లో లేదా బోండాలకు వాడుకుంటే భలే రుచిగా ఉంటుంది. బోండాల్లో పుల్లటి పెరుగు వాడటం ద్వారా మంచి ఉబ్బుతూ, రుచికరంగా వస్తాయి.

పూజా సామగ్రి శుభ్రం చేయొచ్చు

పుల్లటి పెరుగును తినలేకపోతే అందులో కొంచెం నిమ్మరసం కలిపి పూజ గదిలోని రాగి, ఇత్తడి పాత్రలను శుభ్రం చేయొచ్చు. ఈ మిశ్రమాన్ని పాత్రలకు పూసి కొన్ని నిమిషాల పాటు అలాగే వదిలేయండి. తర్వాత స్క్రబర్‌తో సామగ్రిని తోమినట్లయితే తలాతలా మెరుస్తాయి.

తలకు దివ్య ఔషధం

పులిసిన పెరుగును పొడి జుట్టుపై పట్టించడం ద్వారా చుండ్రు సమస్యను నివారిస్తుంది. కురులను సాఫ్ట్‌గా, హెల్తీగా మారుస్తుంది. మీకు చుండ్రు సమస్య ఎక్కువగా ఉంటే పెరుగులో కొంచెం నిమ్మరసం కలిపి తలకు పట్టిస్తే మంచి ప్రయోజనం ఉంటుంది. ఆరోగ్యకరమైన, బలమైన జుట్టును సొంతం చేసుకోవచ్చు.

మొక్కలకు మంచి ఎరువు..

పులిసిపోయిన పెరుగును బాగా గిలక్కొట్టి దానిని నాలుగు రెట్ల వరకు నీళ్లు కలపండి. దీనిని మొక్కలకు ఎరువుగా పోయడం ద్వారా పచ్చగా, ఏపుగా పెరుగుతాయి. క్రిమికీటకాలు పట్టకుండా కాపాడుతుంది. తరచుగా ఇలా చేస్తే ప్రయోజనం ఉంటుంది.

బ్యూటీ కోసం

పుల్లటి పెరుగును ముఖానికి మసాజ్‌ చేస్తూ రాసినట్లయితే డెత్‌ స్కిన్‌సెల్స్‌ తొలగిపోతాయి. చర్మం, కాంతివంతంగా మెరుస్తుంది. సాఫ్ట్‌గా అవుతుంది. చర్మ సంరక్షణలో పెరుగు బాగా పనిచేస్తుంది. ఇందులో తేనె, పసుపు, శనగపిండి కలిపి ఫేస్‌ప్యాక్‌లా ఉపయోగిస్తే సహజ నిగారింపు మీ సొంతం.