నేను పక్కా మాస్, మా పక్క ఊరి పిల్ల లైన్లోకి వచ్చింది, కొడితే రెండు రోజులు కోమాలోకి #mystory218

సైకిల్ పై ముందు కూర్చొంటే

పక్క ఊరి నుంచి మా ఊరికి రావాలంటే ఆటోలే దిక్కు. అప్పుడప్పుడు అవి కూడా ఉండవు. ఆటోలు తిరగడం లేదు నాకు తెలిస్తే వెంటనే సైకిల్ వేసుకుని ఆమె దగ్గర వాలిపోయేవాణ్ని. తను సైకిల్ పై ముందు కూర్చొంటే ఎక్కడలేని ఎనర్జీ వచ్చేది. క్షణాల్లో తనని కంపెనీ వద్ద డ్రాప్ చేసేవాణ్ని.

గాజులు కొనిచ్చాను

మా పక్క ఊర్లో తిరుణాళ్లకు వెళ్లినప్పుడు తనకు గాజులు కొనిచ్చాను. మరుసటి రోజు తను పట్నంలో నాకు షర్ట్ తీసుకొచ్చింది. దాన్ని వారం రోజుల పాటు అలాగే వేసుకున్నా. అంత ప్రేమ తనంటే. ఆదివారం పూట ఇద్దరం పట్నానికి వెళ్లేవాళ్లం. ఉదయం నుంచి రాత్రి వరకు అంతా తిరిగి రాత్రికి మళ్లీ ఎవరి ఊళ్లకు వాళ్లం వెళ్లేవాళ్లం.

లోకం అస్సలు కనపడేది కాదు

ఆ పిల్ల వాళ్ల నాన్న తాగుబోతు. దీంతో వాళ్ల అమ్మ, ఈ అమ్మాయి ఇంటిని నడిపేవారు. తనతో ప్రేమలో ఉన్నప్పుడు నాకు ఈ లోకం అస్సలు కనపడేది కాదు. తను తప్ప మరెవరూ ఈ లోకంలో లేరనుకునేవాణ్ని. అలా చాలా రోజులు మా ప్రేమాయాణం నడిచింది.

ఆర్ ఎక్స్ 100 మూవీ చూసి

ఒక రోజు నేను సిటీకి వెళ్లాను. సంధ్య థియేటర్ లో ఆర్ ఎక్స్ 100 మూవీ చూసి బయటకొచ్చాను. నా చుట్టు ముట్టూ నాలుగు బైక్ లను ఆపారు. వాళ్లలో కొందరి ఫేస్ లు ఎప్పుడో చూసినట్లుగా అనిపించాయి. నేను గతంలో కొట్టిన వారు ఎవరైనా ఉండొచ్చు అనుకున్నా. నా కళ్లలో వాళ్లకు భయం కనపడలేదు. అందుకే నా వైపు కసిగా చూశారు.

మా కులం అమ్మాయిని ఎందుకు ప్రేమించావు?

ఎందుకురా మా కులం అమ్మాయిని ప్రేమించావు? అని అడిగాడు ఒకడు. అప్పుడనిపించిది. వీళ్లంతా ఆ పిల్లకు సంబంధించిన మనుషులనీ. మీరు ఎవడ్రా అన్నాను. అంతలోనే వెనుక నుంచి ఒకడు కొట్టాడు. పక్కనే ఉన్న రాడ్ తీసుకుని వాడి తలపై కొట్టాను. రక్తమడుగులో పడిపోయాడు.

ఆమె బావ పెళ్లి చేసుకోవాలనుకుంటున్నాడు

నన్ను వాళ్లంతా చితకబాదారు. రెండు రోజుల తర్వాత కోమాలో నుంచి తేరుకున్నా. నన్ను కొట్టిన వాళ్ల గురించి మా వాళ్లు తెలుసుకున్నారు. వాళ్లను కూడా చితకబాదారు. ఆ అమ్మాయి బావ, మరికొందరు మనుషులు నన్ను కొట్టారు. ఆమె బావ తనని పెళ్లి చేసుకోవాలనుకుంటున్నాడు. దాంతో పాటు నా కులం వేరు. వాళ్ల కులం వేరు.

ట్రాక్టర్ నిండా మనుషులతో అక్కడ దిగాను

తనని కూడా వాళ్లు చాలా టార్చర్ చేశారు. నాకు మాత్రం నేను ప్రేమించిన అమ్మాయిని భార్యగా చేసుకుని ప్రేమగా చూసుకోవాలి అనే కల మాత్రమే ఉండేది. కానీ ఆ కల నెరవేరకుండా చాలా మంది అడ్డుకున్నారు.

చివరకు ఆమెకు తన బావతో పెళ్లి నిశ్చయం చేశారు. పక్క ఊరి రాములోరి గుడిలో పెళ్లి అని తెలిసింది. వెంటనే ట్రాక్టర్ నిండా మనుషులతో అక్కడ దిగాను. అడ్డువచ్చినవాళ్లు కొట్టి అమ్మాయిని ఎత్తుకొచ్చుకున్నా. అదే రోజు పెళ్లి చేసుకున్నా.

ఊరిని వదలడమంటే నా ప్రాణం విడిచిపెట్టడమే

ఊర్లో పంచాయతీ పెట్టారు. నా తప్పు ఏమీ లేకున్నా ఊరి నుంచి వెళ్లిపొమ్మని పెద్ద మనుషులు తీర్పు ఇచ్చారు. తప్పని పరిస్థితుల్లో ఊరి నుంచి బయటకు వచ్చాను. తర్వాత కూడా నాపై అటాక్ జరిగింది. ఇప్పుడు మా ఊరికి, ఆ మనుషులకు దూరంగా నా భార్యతో ఉంటున్నాను. ఒకప్పుడు మా ఊరు అంటే నాకెంతో ఇష్టం. ఊరిని వదలడమంటే నా ప్రాణం విడిచిపెట్టడమే అనుకునేవాణ్ని. కానీ ఇప్పుడు ప్రాణాలతో భార్యాపిల్లలతో సంతోషంగా బతకాలంటే ఊరికి దూరంగా ఉండాల్సిందే.