Women's Day Special :పెళ్లికి ముందు ఏదైనా సాధ్యమేనట.. కానీ పెళ్లి తర్వాత అన్నింటికీ కాంప్రమైజ్ కావాల్సిందేనట..

ఆ వయసు వచ్చేసరికి..

అమ్మాయిలైనా.. అబ్బాయిలైనా 20 సంవత్సరాలు దాటితే చాలు ఇంకా మీరు సింగిల్ గా ఉన్నారా? త్వరగా పెళ్లి చేసుకోమని సూటి పోటీ మాటలతో వేధిస్తుంటారు. ఫలానా అమ్మాయి ఉందని.. ఫలానా అబ్బాయి ఉన్నాడని తెగ విసిగిస్తుంటారు. ‘కళ్యాణమొచ్చినా.. కక్కు వచ్చినా ఆగదు‘ అని ఆట పట్టిస్తుంటారు. అంతేకానీ మీరేమవ్వలనుకుంటున్నారు? మీకేం కావాలి? అని అడిగే వారు మనకు చాలా అరుదుగా కనిపిస్తారు.

పెళ్లి చేసుకుంటే..

అయితే ఒకవేళ మీరు పెద్దల మాట విని పెళ్లి వెంటనే చేసుకుంటే మాత్రం మీరు మీ వ్యక్తిగత జీవితంలో ఆనందాన్ని కోల్పోయినట్టేనని లండన్ స్కూల్ ఆఫ్ ఎకనామిక్స్ కి చెందిన బిహేవియరల్ సైన్స్ ప్రొఫెసర్ పౌల్ డోలన్ అంటున్నారు.

పెళ్లి గురించి...

ఆ ప్రొఫెసర్ తను రాసిన హ్యాపీ ఎవర్ ఆఫ్టర్ : ఎస్కేపింగ్ ద మిత్స్ ఆఫ్ ద పర్ఫెక్ట్ లైఫ్ అనే పుస్తకంలో పెళ్లికి సంబంధించిన అపొహల గురించి.. పెళ్లి తర్వాత జీవితంపై చూపించే ప్రభావం గురించి చెప్పుకొచ్చారు. ఇటీవల వేల్స్ లోని ఓ పుస్తక ప్రదర్శనలో పాల్గొన్న ఆయన ఈ విషయంపై తన అభిప్రాయాన్ని కూడా వెల్లడించారు.

అలా చేస్తేనే...

పెళ్లి అయిన వ్యక్తులు ఆనందంగా ఉండాలంటే తమ భాగస్వామితో కలిసి అదే గదిలో ఉండి మాట్లాడుతూనే ఉండాలని.. అలా చేస్తేనే వారిలో ఆనందం ఉంటుందని.. అలా చేయకపోతే వారిలో ఆనందం అనేదే ఉండదని చెప్పారు.

గదిలో లేకపోతే...

అయితే తమ భాగస్వామి వారితో లేకపోతే, వారు ఆనందంగా ఫీల్ అవ్వలేరట. తమ భాగస్వామి తమ గదిలో లేకపోతే వారు ఏదో కోల్పోయినట్లుగా.. చాలా బాధగా ఫీలవుతారట.

ఆడవారే ఎక్కువగా...

అయితే ఈ బాధ ఎక్కువగా ఆడవారిలోనే ఉందని ఆయన చెప్పడం గమనార్హం. అయితే మగవారిలో చాలా మంది అంతగా బాధ పడటం లేదని ఆయన గుర్తించారట. అందుకే ఆడవారు త్వరగా పెళ్లి చేసుకోవద్దని తను సలహా ఇస్తాను అని చెప్పారు.

అలాంటి వారిపై కేస్ స్టడీ..

ఆయన పెళ్లయిన గ్రూపును ఒకసారి.. అదే వయసులో ఉండి పెళ్లి కాని ఓ గ్రూపు వారిని పరిశీలించి ఆయన కేస్ స్టడీ చేశారంట. ఆ పరిశోధనలో వివాహితులైన వారితో పోలిస్తే వివాహం కాని వారే మహిళలే ఆనందంగా ఉన్నారని గ్రహించారట. వివాహం అయిన వారిలో చాలా మంది తాము ఏ మాత్రం ఆనందంగా లేమని, పైగా అనారోగ్యాల బారిన పడ్డామని చెప్పుకొచ్చారట.

పెళ్లి చేసుకోని వారైతే..

అందుకే ప్రపంచంలోనే ఆనందకరమైన వారు ఎవరైనా ఉన్నారంటే పెళ్లి కాని వారే అని ఆయన స్పష్టంగా చెబుతారు. ఎందుకంటే పెళ్లి అయిన మహిళలు ఇల్లు, పిల్లలు, వర్కింగ్ ఉమెన్ వంటి బాధ్యతలతో పాటు ఆఫీసు పనులను కూడా నిర్వహించాలి. కానీ గర్భం ధరించడం, పిల్లలు వంటి కారణాల వల్ల వారు కెరీర్ లో ముందుకు వెళ్లడం చాలా కష్టంగా ఉంటుందని చెప్పారు.

ఫలానా వయసుకి..

ఈ కారణాల వల్ల ‘‘అమ్మాయిలు ఫలానా వయసుకి తప్పనిసరిగా పెళ్లి చేసుకోవాలి‘‘ అంటూ సమాజంలో ఉన్న ఆలోచనను మార్చుకోవాల్సిన అవసరం ఎంతైనా ఉందని ఆయన తెలిపారు. అంతేకాదు అమ్మాయిలు.. అబ్బాయిలు పెళ్లి చేసుకోకుండా ఉండటం తప్పు కాదని.. ఇలా చేయడం వల్ల వారు ఆనందంగా ఉంటున్నారు. కాబట్టి వారు చేసే పని కరెక్టేనని అందరూ గ్రహించాలి.

అందుకే పెళ్లి చేసుకోని వారిని..

అందుకే ముప్పై ఏళ్ల వయసు పైబడిన వారి లాంటి వారు మీకు కనిపిస్తే, ఇంకా పెళ్లి చేసుకోలేదా? ఇప్పటికైనా మీ జీవితంలోకి మంచి వ్యక్తి తన రావాలని చెప్పడం కంటే.. తను జీవితంలో ఆనందంగా ఉండాలని విష్ చేయడం మంచిదట. ఎందుకంటే పెళ్లి వల్ల వ్యక్తిగత జీవితంలో ఆరోగ్యం, ఆనందం రెండూ తగ్గిపోయే అవకాశాలు ఎక్కువగా ఉన్నాయట.